咩係「紋章」?

香港盾徽最近好似成日出現（譬如龍獅旗），但係「盾徽」又或者係「紋章」究竟係一件咩回事？想知就要睇下呢篇文章嘞——

喺中世紀歐洲嘅封建社會，貴族出征打仗係一件好常見嘅事。高高在上嘅貴族，爲咗保護自己脆弱嘅軀殼，就用重重嘅裝甲去保護自己（同埋佢嘅名駒）。但係，當人人都係着住鐵甲嘅時候，其他人好難分得出你係邊個。於是乎，有人就諗到「不如喺個盾到畫啲嘢」呢條絕世好橋喇。後嚟，盾上面嘅徽號慢慢發展爲一個成熟嘅系統，去表示人嘅身份地位象徵。

〔圖甲〕英法百年戰爭嘅愛靜閣之役。畫面中間偏右、頭盔外面戴住皇冠、好似嗰啲電影主角唔使戴面罩嗰個人，就係英王亨利五世，佢著住件衫就係屬於英國國王嘅紋章圖案。左邊正常少少識得戴面罩、攞住紅黃色盾、盾上面有粒星星嗰個，應該係第11代牛津伯爵理查·德·維爾，因爲個盾上面嘅紋章所以認得出係佢。（右邊個盾白底紅十字黑雀仔嗰個我搵唔到係邊個。）

「盾徽」同埋「紋章」呢兩個詞語，喺一般情況之下可以相通。不過喺紋章學裏面，「紋章」係一個準確啲嘅叫法，因爲雖然個盾係成個紋章嘅聚焦點。但係喺個盾以外嘅其他嘢都好重要㗎。譬如香港紋章裏面，龍獅呢兩隻扶盾獸就出名過個盾本身嘞。

〔圖乙〕香港紋章

喺歐洲各國，紋章有各式各樣嘅規矩。喺某啲國家（譬如英格蘭同蘇格蘭），紋章通常只可以係屬於個人，子裔要承傳家族嘅紋章，就一定要係長輩嘅紋章上面劃花佢，唔可以直接用；不過第二啲國家就無呢個規定（譬如意大利同德國）。有啲國家有專屬嘅組織去掌控授予紋章嘅權利（例如英國嘅紋章院 College of Arms 等等），有爵位嘅貴族或者鄉紳先可以被賜予紋章；但係有啲國家無呢種組織，或者去到近代先成立，所以人人都可以隨便畀個紋章自己，荷蘭比利時嘅商人同埋商會就係一個好好嘅例子。

當然，呢啲硬性嘅規定到咗現代已經式微。喺18、19世紀，歐洲各國陸續設立紋章嘅管理局，或者立法去管理紋章。管理紋章嘅方針，由中世紀嘅封建主義，變成咗類似商標註冊嘅雛形。今時今日，除咗個人可以用紋章之外，商會、公會、公司或者學校都會有代表自己嘅紋章。喺香港，雖然無乜歐洲貴族後代，但係好多學校都有盾徽作爲校徽，亦都有唔少公會有自己嘅紋章。

一個紋章除咗靚之外，好多時都有深遠嘅意義喺入面。下次見到紋章嘅時候，瞭解下，可能可以發掘得到呢個團體嘅歷史、又或者可以估到創辦人嘅初心呢！

〔圖甲〕約瑟夫·彭恩《英王亨利五世英勇赴愛靜閣之役》1915年畫作。維基共享資源連結。公有領域（過咗作者死後70年）。

〔圖乙〕香港徽號。1963年御賜。維基共享資源連結。公有領域。