​ခေါင်း​ဆောင် နှင့် မန်​နေဂျာ

များ​သောအားဖြင့် ​ခေါင်း​ဆောင် နှင့် မန်​နေဂျာ မှာ ခွဲခြား၍ မလွယ်​ပေ။ သို့​သော် ခွဲခြား၍ မလွယ် ​သော်လည်း ကွဲပြားခြားနားပုံကို နားလည်ဖို့ လိုသည်။

ဦးဝင်းမြင့်က ကား ၆ စီးမလို၊ ရုံးတက်ရန် ကားတစ်စီးသာ ထားခဲ့ရန်​ပြော​သောအခါ လူအ​တော်များများက တုံးလှချည်ရဲ့၊ မာစီးဒီးကားဆိုသည်မှာ ​နေရာတကာ မစီးသင့်၊ ကားများကို သူ့​နေရာနှင့်သူ စီး၍ မပျက်စီးသင့်သည်ကို မပျက်စီး​စေပဲ လဲလှယ် စီးသင့်သည်၊ ဦးဝင်းမြင့် စီမံခန့်ခွဲမှု ညံ့ဖျင်းသည်ဟု မြင်ကြသည်။ ​နေ့စဥ် အသုံးပြုမည့်ကားကိုသာ ထားခဲ့ခိုင်းပြီး ကျန်ကားများကို ဘုံအဖြစ်ထားပြီး အခြားနိုင်ငံ​တော် အဆင့် ဝန်ကြီးများနှင့် ​ဝေငှသုံးစွဲ၍ ရသည်။ အနည်းငယ် ပို၍ခက်ခဲစွာ ခန့်ခွဲရမည်ဖြစ်​သော်လည်း Uber နှင့် အခြား​သော Sharing Economy အယူအဆကို သိ​သောသူများ နားလည် လက်ခံ၍ ရလိမ့်မည်။

မည်သို့ပင်ဖြစ်​စေ ဦးဝင်းမြင့် ထိုသို့ ကား ၆ စီး မလိုဟုဆိုသည်မှာ ​NLD ၏ ထိပ်တန်း အရာရှိတစ်​ယောက် အ​နေဖြင့် အခြား ဝန်ကြီးများနှင့် လက်​အောက်ငယ်သားများကို နိုင်ငံ​တော်ဘဏ္ဍာကို မလိုအပ်လျှင် မသုံးကြနှင့်ဟု ရိုးသားမှု အနစ်နာခံမှု စံ တစ်ခုကို သတ်မှတ်ခြင်း ဖြစ်သည်။

ဤ​နေရာတွင် ဦးဝင်းမြင့် လုပ်​ဆောင်လိုက်သည်မှာ စီမံခန့်ခွဲမှု မဟုတ်ပဲ ​ခေါင်း​ဆောင်မှု ဖြစ်​လေသည်။

ယခုတခါ စက်ဘီးစီး၍ ရုံးတက်မည့် ​​ဒေါက်တာမျိုး​အောင် ဟုခေါ်သည့် နောက်ဝန်ကြီးတစ်​ယောက်​ ပေါ်လာ​တော့လည်း ကိုယ်က အ​ရေးကြီး ပုဂ္ဂိုလ်တစ်​ယောက် ဖြစ်သည့်အတွက် ကိုယ့်ကိုကိုယ် ပင်ပန်း​အောင် မနှိပ်စက်သင့်၊ အ​ရေးကြီးတာဝန်များကို ကျန်းကျန်းမာမာ လန်းလန်းဆန်းဆန်း ထမ်း​ဆောင်သင့်သည်၊ ောက်ပို​တွေ မလုပ်သင့်ဟု ဆိုကြပြန်သည်။ ဖြည့်​တွေးပြန်လျှင်လည်း ​နေပြည်​တော်မှ လမ်းများသည် သူ့မြို့သူ့ဇာတိမှ ​မြေနီလမ်းထက်စာလျှင် အင်မတန် ​ကောင်း​နေပုံရသည်။ စက်ဘီးစီးလျှင်လည်း မနက် ည​နေ အချိန်များတွင် ​လေတဖြူးဖြူးနှင့် ​ကောင်းမွန်ပြီး ကျန်းမာ​ရေးနှင့် အင်မတန် ညီညွတ်နိုင်သည်။ ​နယူး​ယောက် မြို့​တော်ဝန်က နယူး​ယောက်မြို့လယ်မှ ကားပါကင်များကို ဖျက်သိမ်းပြီး ​ဝေငှ သုံးစွဲနိုင်​သော စက်ဘီးများ ချ​ပေးသည်။ ပြည်သူအများစု သွားရလာရသည်မှာ အဆင်​ပြေ​ချော​မွေ့သွားသည့်အတွက် အားလုံးကြိုက်ကြသည်။ စက်ဘီးစီးခြင်းသည် ပြဿနာ တစ်ခု မဟုတ်​ပေ။ ​ခေတ်မှီ ခြင်းသာ ဖြစ်​လေသည်။

ဝန်ကြီးအ​နေဖြင့် ရုံးသွားရုံးပြန် စက်ဘီးစီးခြင်းဖြင့် မလိုအပ်​သော စရိတ်များ ​လျော့ချနိုင်သည့် အပြင် ​ခေတ်မှီ ကျန်းမာ​သော လူ့အဖွဲ့အစည်း တစ်ခုကို ဦး​ဆောင်သွားနိုင်သည်။

ဤသူများသည် မတ်တူးစီး​သော၊ နိုင်ငံ၏ ဆင်းရဲမွဲ​တေမှု အ​ခြေအ​နေကို အ​လေးထား​သော ​ဒေါ်​အောင်ဆန်းစုကြည် ၏ ​ခေါင်း​ဆောင်မှု ​အောက်တွင် ​ပေါ်​ပေါက်လာ​သော ​နောက်ထပ် ​ခေါင်း​ဆောင်​ကောင်းများ ဖြစ်ကြ​လေသည်။ စီမံခန့်ခွဲမှု​ကောင်း​သော ကုမ္ပဏီ တစ်ခုမှ မန်​နေဂျာများ မဟုတ်ကြပါ။ ထိုသူများ သိလျက်နှင့်ဖြစ်​စေ မသိလျက်နှင့် ဖြစ်​စေ လုပ်​ဆောင်​နေသည်မှာ လူမှုဝန်ထမ်း စံ တစ်ခု၊ စိတ်ဓါတ်အရည်အ​သွေး တစ်ခုကို ဖန်တီး​နေသည့် ​ခေါင်း​ဆောင်မှု တစ်ခုသာဖြစ်သည်။

​ခေါင်း​ဆောင်​ကောင်းသည် ​နောက်ထပ်​ခေါင်း​ဆောင်များကို ဖြစ်ပွား​စေသသည့် သ​ဘောတရားသာ ဖြစ်သည်။

ဤကဲ့သို့ ​ခေါင်း​ဆောင်မှုကို အလွယ်ကူဆုံး ဥပမာ ပြပါဆိုလျှင် သင့်မိဘများကိုကြည့်ပါက သိနိုင်သည်။ ပင်ပင်ပန်းပန်း အလုပ်မှပြန်လာ​သော သင်၏ မိဘများသည် သူတို့ မနက်ဖြန် အလုပ်လုပ်ရန် အားပြည့်​နေဖို့အတွက် ထမင်းဝိုင်းတွင် အ​ကောင်းဆုံး အများဆုံး စားမည် မဟုတ်​ပေ။ သင်ပိုမို ကြီးထွားဖွံ့ဖြိုးဖို့သာ သင့်ကို အ​ကောင်းဆုံး​ ​ကျွေး​မွေး​ပေလိမ့်မည်။ ထိုအပြုအမူအတွက် ရှင်းလင်းချက် မလို​ပေ။ မိဘသည် သဘာဝအားဖြင့် မိသားစုကို ဦး​ဆောင်သည့် ​ခေါင်း​ဆောင်များ ဖြစ်ကြသည်။

အရင်အဘ​တွေ​ကော ဤကဲ့သို့ ​ခေါင်း​ဆောင်မှု ဆိုသည့်အရာကို လုပ်သလားဟု​ မေးချင်မည်။ လုပ်ပါသည်။

ဦးသိန်းစိန် ရိုးသားစွာ​နေမည်၊ ပင်စင်ယူလျှင် မုန့်ဟင်းခါး ​ရောင်းမည်ဟု ​ပြောခြင်းမှာ နိုင်ငံ့ ဝန်ကြီးများ နှင့် ဝန်ထမ်းများကို ရိုးသားမှုအား စံ တစ်ခုအ​နေနှင့် ထားရန် ဦးဆောင်ပြခြင်းသာ ဖြစ်သည်။

နဂို ​ခေါက်ရိုးကျိုး​နေ​သော အမူအကျင့်များ အားသာလွန်းခဲ့​သော​ကြောင့်၊ သူ၏ အနီးကပ် ဝန်ကြီးများက ဦးဝင်းမြင့်က ​ဒေါ်​အောင်ဆန်းစုကြည်၏ စံ ကို ထပ်ချပ်မကွာလိုက်၍ ဦး​ဆောင်ဦးရွက် ပြုသကဲ့သို့ မလုပ်ခဲ့ခြင်း​ကြောင့် မ​အောင်မြင်ခဲ့ခြင်းသာ ဖြစ်သည်။ ဦးသိန်းစိန် ​နှုးညံ့ပျော့​ပြောင်းလွန်းသည် ဟုလည်း ဆိုနိုင်သည်။ သို့​သော် သူ့​နေရာတွင် ဝင်ကြည့်မှသာ ထိုအုပ်စုကို ​ခေါင်း​ဆောင်ရသည်မှာ မည်မျှ ခက်ခဲသည်ကို သိနိုင်​ပေမည်။ အတွင်း ဖိအား ဘယ်​လောက်များလည်းကိုလည်း သိနိုင်မည်။

ဤ​နေရာတွင် ဦးသိန်းစိန်ထက် ​ခေါင်း​ဆောင်မှုတစ်ခု၊ ​ခေါင်း​ဆောင်မှု နိုင်ငံဝန်ထမ်း စံနှုန်းတစ်ခုကို အချိန် လုံလုံ​လောက်​​လောက် ပြင်ဆင်ခွင့် ရခဲ့​သော ​ဒေါ်​အောင်ဆန်းစုကြည် အင်မတန် ကံ​ကောင်းသည်ဟု ဆိုနိုင်သည်။ သူတို့သည် ယခင် အစိုးရထက် နိုင်ငံ​ကောင်းစား​ရေး လုပ်နိုင်ရန် များစွာ အဆင်သင့်ဖြစ်​နေပြီဟု သတ်မှတ်လို့ ရပါသည်။ မြန်မာပြည်သူများ ဤအစိုးရသစ် လက်ထက်မှစ၍ ပိုကံ​ကောင်းကြပါ​စေ။