見最近接觸多幾首，一於應下節，短短哋寫返篇，介紹下可能少啲人知嘅粵音、粵語聖誕歌，都算襯返黃志華先生日前對1974年前三代歌手《Jingle Bells》改詞作嘅介紹嘅，冇咩大道理㗎。
聖誕翻唱版
Swing《1984 — Last Christmas 版》
除咗開頭Silent night, holy night引入，編曲都見到Eric Kwok嘅心思。最後一段用咗Frosty the Snowman嘅旋律引入，並且有以下嘅歌詞：
Frosty the snowman, everyone here used to know—
Frosty, frosty, snowman, snowman—
We wish you a merry Christmas.
係想呼應返組合舊名Snowman。
麥浚龍《聖誕有人》
相比起上首，伍生就欠缺咗啲誠意嘞。《有人》多一句歌詞，咁都得。XD
聖誕歌
《放學ICU》主持 — 過聖誕
《又到聖誕》（《Santa Claus is Coming to Town》）都可以好啱音，唔使「柔道聖誕」㗎。真真正正粵文填詞，又不失節日歡樂氣氛。我哋嘅兒歌，亦都應該重拾昔日嘅美好。 歌詞：https://hk.answers.yahoo.com/questi...
Cookies《曲奇聖誕歌》
開頭嗰一大段呻新瓶包裝舊酒都費事，「開罐頭聽到厭」，冇新意，於是就有「就由我去唱首好過」、「讓我去唱唱我的感覺」嘅動機。因為想貼地夾新鮮，黃偉文就算「我歌我不懂作過，但詞也從頭填過」，嚟緊改八段傳統聖誕歌做串燒咁話。簡單嚟講[1]，唔鸚鵡學舌，喺語言（粵語入詞）、內容貼近後生嘅心態、消費享樂嘅時代。咁樣做亦都襯返Cookies少女組合嘅身份。
語言方面，雖然唔係全篇，不過都睇得出黃氏喺《你唔愛我啦》（2002）為代表嘅「新廣東歌運動」之後嘅努力。值得一記。
內容提到唱K唱慘情歌（「笑笑口挨住各位 好過集體唱爛泥」），講緊K歌都要鬥慘，慘到要自虐自貶自憐，點《爛泥》呢啲歌唱。諷刺嘅係，Wyman都寫過唔少，有份造就「傷情歌」嘅風氣──唔通《痛愛》（2001）唔痛咩？《垃圾》（1998）自貶到不得了添啦。我唔覺佢踩緊呢種風氣，話晒係共業嚟嘅。至於消費，更（ang3）重物質、更掛住禮物，都尚且有衣食、有口齒，遠遠未有「節墮」至此。
喺香港，表面係歌舞昇平嘅盛世，實情係粉飾太平嘅混世，咁嘅時勢，苛刻啲乜吖？施捨你五、十年不變都偷笑啦，恩賜喎。嚟緊廿年都嚟緊喇。
吳浩康《又到聖誕》
明白夕爺用意都係在於「無法看窄也就要看開 何必急於今天被愛」，但係講太多，只會滲咗一大陣酸味。例如：
問那些相戀的
為何要趁那晚
為有感情傍身曬一番
好像到平常日子
這些戀人也快樂有限
大佬，我唔覺人哋平時冇曬開，淨係「那晚變做愛侶騷」囉，佢哋都唔會理人咁多啦。唔算心胸狹窄嘅，自尋煩惱啫。何必呢？「僥倖我毫無負擔，找單身人湊數未算難 」之後，最後一段偏偏煞有介事講咩「誰那晚 正降生 神蹟般 肯慰問 可令我 也僥倖 與她 得到你歡心」，又係何苦來甚？
麥浚龍《平安夜》
呢首好似冇咁酸，但係「最難捱的晚上 仍過得到」，跟手就「沒有你的愛慕 都孤單得自豪」，自欺味濃喎，仲衰。
Originally published at www.facebook.com.
下篇：
