原來當經濟活動停止後，大自然自會有佢嘅修復機能︰威爾斯小鎮被山羊佔領﹑威尼斯河道有鱷魚……似乎人類存在就只有破壞冇貢獻。好似今日晏晝，買咗五個飯盒，食完之後就剩返五個懶係靚又唔捨得掉嘅雞肋空盒。雖然有人話抗疫時代唔顧得環保，但係咪真係完全冇計呢？
近年已經有唔少人自備餐具﹑隨行杯，甚至自備餐盒，減少浪費。但係呢啲自發性嘅行為有兩個問題︰一係唔啱size，唔係個盒太細網裝唔落，或者裝太少自己蝕底（你扣底要少啲賣家唔會減價俾你），就係作用唔大︰你用少一個兩個幾十個，生產嗰個一樣照生產。「你自己唔用咋嘛，關我咩事？」呢個問題，一定要全世界合作，加上源頭減廢，直頭唔可以生產即棄餐具先掂。
就算有行政命令唔俾生產即棄用品，咁頭先第一個問題點解決呢？有一個唔知有冇用嘅廢提議︰將所有食物同飲品好似衫咁分size，例如一共XXS﹑XS﹑S﹑M﹑L﹑XL﹑XXL七種，每種size都有長闊高規定。全球所有的食店做外賣都只可以賣呢七個size嘅食物。同時間生產商只可以生產呢七種食物盒或飲杯，要係裝得落兼唔漏汁嘅。如果你要分開裝或者有特別要求，唔好意思唔該你堂食。
將所有size統一，呢個做法唔單止可以用響單人嘅外賣上，外賣到會一樣ｍ可以，10人／15人／20人咁分……可以由外賣食店自己包埋餐具或者自備呢類餐具。
Size或細節都唔係重點，重點係全球性將食物分量嘅體積大小（定重量？）規限化，咁係咪可以解決到自備餐盒嘅困難呢？至於生產餐具嘅商家，唔好意思，為咗全人類嘅未來，不如轉行啦。
