［分析員基本功］點解富智康發盈警係好消息
Facebook 專頁有更多短文: https://www.facebook.com/ivanliresearch
首先，我可以發毒誓，諗住寫呢篇文係星期五收市後嘅事，而篇文係星期日晚寫，寫到星期一淩晨寫完。當然係星期一未開市，但剛剛知道當撈侵又話徵關稅乜鬼。節目調動關係，呢篇文當然係星期一開市後，甚至收市先出。
個故事係，星期五，有個咁嘅新聞。富智康升18%，收市發盈警。哈哈
蘋果嘅標題，並無不妥，唔止一間係咁寫。當然兩者有冇因果關係，另一回事，而咁寫會唔會令讀者覺得有因果關係，又係另一回事。但，反正讀者點都覺得有關架啦！有冇咁啱呀？
先講頭半，富智康近排勁升，當然同郭台銘選總統有關。我在面書都有寫。我完全唔明點解郭台銘參選會有利富智康，唔知個邏輯在邊。但市場理得你。首先市場有時唔講邏輯，況且，我可能錯架嘛！
總之，升就升咗啦。甚至有人（其實係我），心諗郭台銘會唔會順手配股集資咁仆街。不過機會都係細，唔係郭台銘菩薩心腸，而係，鬼咩，隻富智康咁細。配就配台灣鴻海精密科技啦（但鴻海精密科技冇勁升）！
結果炒上後，出嚟嘅係，公佈盈警。
兩者有冇關？我覺得得冇，但你堅持有我都吹唔脹。信念嘅嘢
不過畀啲客觀證據你。富智康年年都係五月中左右就出個季度嘅數據（並唔係業績，陣間再解），咁既然輸錢，就當然之前要出盈警，呢個時間出，好合理。
況且，更重要嘅係，富智康往年都係呢個時間出盈警！5月4號！今年放假咪提早一天！
係啦，重點嚟啦喎，富智康，根撚本就成日都出盈警架啦！
如果冇睇錯，近兩年，佢地基本上每次業績都出盈警！有時仲一次盈警講兩次業績（例如九個月時預計埋全年，三個月時預計埋半年），十分貼心。等你睇少次。
原因，就當然係業務疲弱啦。由賺多多到賺少少，由賺少少變蝕錢，過去四個季度全數見紅。咁當然就次次都出盈警。至於點解業務咁差，我就真係隔行八重山，唔好評論咁多，反正我唔識（我連工業富聯 鴻騰 鴻海精密科技 同富智康有乜分別都係早排先知）
不過我知嘅係乜？我知，今次個盈警，係好消息！
換著啲三九唔識七睇兩句又以為自己專家嘅，又嚟屌你老母埃汾人地盈警仲好消息害人，你識唔撚識架？
我唔撚識，你識？
咁梗係有理由啦。
粗重嘢等我做，其實做就好快，但作為一個前教師，當然要提升埋讀者嘅水平，要畀晒所有資料同workings 同 steps你嘛 （小弟純數A1絶非僥倖）（四十歲人仲講呢啲，都幾失敗）
睇晒下面啲圖。第一張係今次盈警內容，之後四張係富智康之前四次嘅公佈。
另外留意，呢堆嘢當然在港交所搵。你搵其他網站呀彭博呀，未必搵到季度嘅數。因為富智康季度（一季三季）嗰啲唔係叫業績，叫做 「若干財務資料」。係有埋純利的，但就唔係成盤數出畀你。
另另另外，好彩富智康係十二月結。換著啲九月結之類，又要同你解一大輪點解第三季即係四月至六月之類，至憎。其實分析員一定慣晒（一皮嘢個助理都應該未入職就識），啲sales基金經理都明晒，但我嘅任務係畀行外人（即係你）睇嘛。
廢話講晒，睇完後，我地跳落去。
好，綜合晒以上嗰堆東西，就有下面呢個表。單位係 千美元，下同。有啲數字迫出嚟，有啲原文有，不用深究，反正小學數學。右邊嗰堆順手仲可以用嚟cross check，但主要睇左邊
咁樣表達你就明啦！富智康舊年，一季差過一季，越蝕越多。但今年第一季呢？嘩，係仲係蝕，但只係舊年第一季一半多啲，同舊年第四季比更加大翻身，仲唔係好消息？
仲有，睇埋中期，其實都阿媽係女人。係呀，發埋中期業績盈警。但，預會少過舊年上半年了。但其實都好明顯，舊年半年輸349，今年第一季先69，斷估今年半年好難輸得多過舊年半年。
所以，盈乜鬼警？根本係盈喜！
不過，話就話係好消息，但唔代表實升的。首先，隻富士康之前已經因為郭台銘話選總統炒高不少（其實定係因為個業務轉好？但冇人知，當係因為郭台銘先）。換著仲係頭三個月 八九毫子嗰啲位，我就估出完呢個 「盈警」實升。但而家個四，就另一回事。星期五我問同事，都冇一個好有信心嘅答案，估到升定跌。
呢啲基本常識，你所謂好消息壞消息，對股價嘅影響，除咗睇反映未，仲睇埋估值。你隻嘢（或者個市）殘都不堪嘅，再多壞消息都冇反應，甚至照升。你隻嘢炒到癲嘅，好消息都散落嚟。
另外，當然仲要睇個市啦。星期五前，呢排個市都冇乜大郁動，咁你個股嘅消息，咪歸個股。
但不幸地，星期日晚傳來當撈侵又搞搞震。咁有相當大機會拖低個市的（呢排都乜大消息，大市估值亦唔平）。咁個股反應又未必反映個消息了。星期五放工先同同事講，換著週末核爆嘅，乜都跌啦。
但你叫我搏，我都仲係估富智康可以升。係，炒起咗都照升，大跌市都照升。睇下點？
後記：呢排重睇 虎與狐。十幾年前嘅書了。虎係郭台銘，佢正係屬虎。狐，當然就係 Foxconn。正所謂好似老虎咁惡，但又似狐狸咁靈巧。 Float like a butterfly, sting like a bee
（結果：星期二隻嘢彈返些少，但星期一跌成10%。證明侵侵一出講乜分析都多餘，但我依然堅信個「盈警」根本係好消息）
Facebook 專頁有更多短文: https://www.facebook.com/ivanliresearch
