（多圖小字）可能係香港第一篇新界鄉紳新股分析！
Facebook 專頁有更多短文: https://www.facebook.com/ivanliresearch
上次「可能係全香港第一篇雞煲新股分析」大受歡迎，證明讀者鍾意多圖小字。今次繼續，遲早成為一個系列
可能係全香港第一篇雞煲新股分析
風險因素。頂你，自家雞汁都講知識產權。好似可樂或肯德雞配方咁得兩個創辦人知每人得半包溝埋先整到？咁緊要應該學澳牛炒蛋秘方咁去瑞士銀行開個保險箱鎖住佢。
medium.com
報紙有報啦，新公司上市，業務冇乜特別，分銷（？）紅酒及其他酒。股東特別，大股東陳嘉和，新界鄉紳、新界社團聯會名譽主席
咁，梗係睇招股書啦。初步啫。
政治真係唔識，所以陳嘉和我都唔識，講新界鄉紳，我以為係啲爆炸頭花T 恤茶色方型太陽眼鏡嘅友。原來陳生仲後生過我。
又，當我歧視都好，遙距學習我就已經心中打個折。咁呢間「美國管理科技大學」，行內幾出名，你懂的。
不過，大佬，而家唔係請分析員嘛。野雞學校咪野雞學校咯，賣紅酒要讀Ivy League咩。野雞，如實披露，冇犯法，好盡責喎。你話亂作哈佛（哈爾濱佛學院？）畢業就話有問題啫。
咁當然啦，正如陳婉嫻住半山，新界鄉紳，都係住半山的。唔通你以為住圍村？
咁另外，啲非執董都好大來頭。第一位，曾先生，就係曾鈺成。很靚的CV，冇乜好寫。唯獨係有人奇怪，條友唔係讀數學咩？做乜係文學士學位。答案好簡單：因為當年的港大數學就係文學士。數學係咪科學都係一個幾深嘅問題。
另外呢位，呢排幾出位噃。份CV冇曾鈺成咁靚，冇乜出奇。但，發唔發現冇咁啲嘢？
係啦，邊度讀書嘅呢？曾鈺成有講，葉議員做乜唔講？ 華南師範大學唔係好失禮者（應該），點都好過「美國管理科技大學」
業務，其實有乜好寫。留意客戶就呢啲，鍾意杯葛嘅，唔食富臨阿一鮑魚事小，但唔幫襯shitty supper好似有啲難度。五大客戶先佔一成多啲，相當分散。最大嘅都唔夠4%。
利錢等等，望落幾好。但廢話，有邊間公司上市前啲利潤唔好？正如邊個男人呃你上床前唔係聖人？（其實有的，美國而家好興蝕錢上市，蝕得越多好升得越勁添）。一億生意，賺千幾萬，幾好架啦。至少冇得講「柏林仔都搵得多過你間公司」
息方面，上市前係冇派嘅。其實不能一概而論，但感覺總好過上市前借大大舊錢派畀大股東。
上市前借大大舊錢派畀大股東，有咁X？其實都幾常見，可能你都估到，呢期最出名咪安樂工程（1977），鄭若驊老公間嘢。犯唔犯法？都話其實唔罕見。賤唔賤？兩睇。咁公司上市前分紅畀舊股東好合理啫。你話借到一身街數然後上市集資還錢？咁就真係冇人拎支槍迫你買嘅。下次睇清咗招股書先。
其他咩古惑嘢？我道行低又趕住收工，唔多覺。真係要講嘅，舊年公司最大嘅供應商，佔公司探購超過10%嘅，正係大股東本人。又係嗰句，有披露的。合唔合法？我估合法掛，犯法都印在招股書？？況且，去到今年已經唔再在榜上，至少招股書咁寫。招股書畀假資料犯法架下。當然用咩人頭之類就另一回事，但冇得講了。
無聊偶拾兩則
第一，呢個「複合年增長率」指「複合年增長率」係咪好白痴？其實唔係。係中文版先有呢啲看似弱智嘅嘢。因為係譯英文版，原文係CAGR，右邊畀返個全寫 Compound annual growth rate。教埋你，扮晒嘢，分析員讀K架，或者卡架，唔好分開四個字母讀。
又，只係我估。因為我根本冇睇過英文版，但估都估到。而同你估嘅唔同，我正常係睇英文招股書嘅。唔係我英文勁，而係好多上市文件啲中譯本都十分惡啃。咁點解我篇篇文都貼中文招股書？就讀者水平咯。都有啲悲。
第二，作為一個白酒愛好者，驚見香港真係冇人飲白酒？呢度嘅白酒唔係茅台嗰啲，係真係葡萄酒。你見佔銷售少過3%，唔好話少過紅酒少過威士忌少過其他（甜酒汽酒之類）。就連放紅酒嘅業務都不如。定，只係白酒平啲，所以量唔少但佔收入少？
睇返成個行業（預測就算鳩數啦），又好似唔係咁，可能只係呢間公司唔多賣白酒。成個行業，白酒增長仲快過紅酒（後者飽和啦？），仲快過威士忌？不過當然應該冇計你直接在日本買嗰啲。鳩估，香港人個個一年去幾次日本，使撚經你香港舖頭買畀你賺咩。但就唔係個個一年去幾次法國，或智利，或美國。
亦都同你嘅常識符合，白酒係平過紅酒嘅。而不幸地，本人至愛Riesling，德國係不在白酒三大進口國的。定其實係美國嘢多？冇留意。法國都有Riesling，但正如周恩來話齋，中國嘅妓女在台灣，法國嘅Riesling在阿爾薩斯（Alsace），而亞爾薩斯自古（？）以來就係德意志（？？）不可分割的神聖領土一部份。
最後，威士忌。當然日本大獲全勝。英國？係英國。蘇格蘭係英國一部份嘛，暫時仲係。台灣似乎仲未成氣侯，雖則Kavalan 本人鍾意。
講多樣，比較三個圖，發唔發現，哈，威士忌仲平過紅酒？又同你常識違背。但睇下個圖。唔係per serving，係每公升計。你唔會飲幾個紅酒杯嘅威士忌掛？所以可比性唔高，反而你話白酒平過紅酒似乎有可比性。雖則我冇研究，其實係咪白酒飲得多啲（凍飲嘛）。
呢個亦係本人常玩嘅gag：樽裝水貴過石油。唔信？你計下數，一桶原油差不多180公升，五六十蚊美金。你買幾多支水先裝得滿？
所以張五常嗰派話頭（小弟正係港大學生），Water and Diamond Paradox，根本偽命題。水同鑽石比，幾多同幾多比先？都唔同單位，點比？
最後問題。抽唔抽得過？你咪撚玩啦，價都未定。即係支酒冇價值牌你問我買唔買。
Facebook 專頁有更多短文: https://www.facebook.com/ivanliresearch
