技術文：貨幣操縱國嘅嘢，搬埋龍門都射唔中喎
Facebook 專頁有更多短文: https://www.facebook.com/ivanliresearch
原本想星期二寫，但邊有事事咁如意。星期二朝嘅震憾彈。美國財政部話中國係操縱匯率國喎。反應幾快。基本上人民幣一破7，佢就即時做嘢。或者掉轉睇，一早預咗你中國有呢招。
前因後果大約係：美國話再加關稅，星期一人民幣即時就大跌，係咪官方推動定默許就另講（定，其實官方係托住呢？）。但出面解讀唔多唔少係中國應對，或報復。
某評論員出晒位，言論其實冇乜新意，但用字夠吸睛：「1至10分嚟講，中國嘅報復強度係11分」。所以唔好只怪content farm要標題黨click bait，外國都係咁。因為人性係咁，世界難撈，除非你只針對最（自命）知識份子嘅一班人，例如Financial Times, Economist, New York Times 之類就唔使行標題黨呢套
中國有冇操縱貨幣？有點複雜。同李天命（應該冇記錯）話齋，「柬埔寨是否民主國家」一類問題，睇你點定義。當然，正如一切事情，特別係涉及中國，同政治，主流反應都係兩分：一係話中國擺明操縱貨幣可撚恥壓低匯價不公平優勢（問：講嗰個有冇經歷過港紙高水過人民幣嘅年代？）。另一方面就係，美國都一樣操縱貨幣，其他國家一樣有，whataboutism
咁有冇持平啲嘅講法？雖然好多人都係「啱聽就持平」，自己啱聽咪人話（例如蔣元秋都講人話）。但，你問金融界，搵個有財經常識嘅人睇下，正路都大約同意我以下講嘅嘢
何謂操縱貨幣國，主要真係一個政治問題。甚至同你有冇操控貨幣冇關，正如你有冇殺人同你係咪殺人犯，係可以冇關的。實務上，都真係美國說了算，佢話你係就係，唔使證據。
唔信？美國為咗令個過程「好似」透明啲，「好似」要證據，都真係列咗堆標準出嚟。拿，你踩中呢啲嘢，你就係貨幣操縱國。
標準係乜，容後講。但事實係，今年5月尾，唔夠3個月前，美國財政部出嘅報告，同樣係呢個總統呢個部長出嘅，都話中國唔係匯率操縱國。
咁做乜3個月唔夠，中國又忽然變咗匯率操縱國？唔知喎，冇人解過。似乎都係：我話你係就係
講返美國自己列嘅證據，話你符合以下三樣嘢，你就係匯率操縱國。標準點樣為某啲國家度身訂造不重要，但總之係有堆標準：
1: 對美貿易順差達 200 億美元以上
2. 經常帳盈餘大於 GDP3%
3. 持續性的干預外匯，年買匯淨額超過 GDP 2%
美國白紙黑字寫明，而且講明係三項齊中先計，唔使拗係咪中一樣就係
咁，呢堆標準合唔合理係另一回事（點解所有國家都係計200億美金？明顯針對大國，某大國）。但出咗後，要驗就相對地幾客觀，可以Fact Check。你見所有報紙都話你知，中國只係符合第一個條件
所以，就都係美國說了算。
做乜忽然又變匯率操控國？樓上呢堆標準就固然移動龍門咗。而美國官方講法，就係今次「唔係我話你係，你自己都話你自己係」。
唔，咁明顯地之前人民銀行就冇咁講過的，好似係，除非唔係。而其他國家又係冇咁講的，應該係，否則唔係。
話說回頭，不滿美國嘅，特別係（但不限於）大陸內部，都有一種講法，話美國先係最大嘅操控匯率國。
理據多數係講侵侵打開口牌啦，影響聯儲局減息啦。或者美國聯儲局QE，量化寬鬆，印銀紙（嚴格嚟講唔係，但都差不多），水淹全球。遠少少嘅，美國政府在金融海嘯期間，一樣大救市，攬銀行，甚至買起企業。
不過始終，以上種種都仲係「間接」操縱匯率，唔係直接入場。當然實務上冇乜分別。正如美國話唔係國家機器唔會指揮企業：不過你同伊朗做生意就收監咁解，依法治國。
但，就講直接干預呢方面，美國當然一樣大把經驗。只係後來開始話人操縱，自己就少啲直接去做。直接操縱貨幣，美國之前一樣係大國。唔係大公報講，金融時報講的。你即管話佢五毛舔共咯。
而侵侵亦都明顯地，打晒開口牌，想要整弱美金。只係身邊啲人阻止佢，亦係可信媒體嘅報導
仲有，唔少人都有提嘅一樣嘢。Whataboutism。其他國家呢？
首先，美國原本suppose去判斷係咪操縱國嘅三大準則，第一條（ 對美貿易順差達 200 億美元以上）係最搵笨，只計數字，冇考慮對手嘅經濟規模，擺明係針對大國，即係中國，你阿努阿圖之類點操縱貨幣都冇可能去到呢啲數字。反而另外兩條係有的，以對手國家GDP為測。如此求其就已經夠搞笑。
另外，匯率當然永遠係相對，美國唔會接受話因為係美金強所以人民幣弱（但，其實好明顯侵侵係知的，你見佢講明話叫減息壓低美金）。
不過，其實好易有客觀證據。如果中國係刻意操控人民幣壓低匯價（其實，可能係掉轉）的話，咁人民幣對其他貨幣應該升啦？其他貨幣又唔應該對美金太弱啦？
事實係：即使計埋呢兩日嘅急跌都好，年初至今，在主要亞洲貨幣中，台幣同韓圜，兩大美國盟友，對美金都跌得多過人民幣。咁你話係人民幣弱，定因為美金強？
睇到全世界，更加不撚得了。隨手都搵到十隻八隻貨幣，係對美金弱過人民幣嘅。包括十分去熱門嘅歐元，英鎊，澳紙，全部都係。咁你話，係人民幣弱，定美金強？人民幣對眾多貨幣都升噃。
仲有，其實央行干預匯市，實在係閒事，你覺得十惡不赦？遠嘅唔講。就講呢一兩個星期：
南韓財長講到明會干預匯市，亦都似乎一早做咗。反正第二段佢亦都認咗。吹咩。
日本，好似仲未發生，但吹打已經估日本央行會出手。而大家都知，唔係為中國，甚至唔係為美國，而係劍指南韓。韓圜對日元，年初至今跌咗十幾%，
而我甚至唔係講澳洲、新西蘭、馬來西亞、菲律賓、印度、韓國、印尼齊齊減息呢啲間接嘢：中國連息都冇減過喎。
所以呢，結論係：中國由咸豐年代開始已經干預匯市—正如美國自己，正如日本韓國。但干預匯市不等於就係操縱國。同其他人比中國不見得特別干預，同自己比亦係。而中國甚至連美國度身訂造嘅條件都未滿足。咁你話呢？
計我話，又係同你想像中完全相反：如果中國真係唔干預匯市，人民幣邊止咁少？證據？咪望返上面個圖，睇下其他貨幣跌幾多。
睇完文仲係堅持中國肯定係匯率操控國嘅.......就，都冇乜好講嘅。性交改運都有人信啦，大把人話地球係平嘅添。 正所謂 my ignorance is just as good as your knowledge .
NASA scientist says Mars is probably uninhabited; Professor Snooks says it is teeming with aliens. It’s really a matter of opinion. —呢啲野好主觀既， 唔好咁獨裁，點解你講一定啱。
有興趣嘅，可以睇埋舊文，都係講匯率，其實寫得幾差，但好多人睇：
Facebook 專頁有更多短文: https://www.facebook.com/ivanliresearch
