［業績亂打］阿信屋（759）純利大升！好似係！除非唔係！
Facebook 專頁有更多短文: https://www.facebook.com/ivanliresearch
- 聖誕報喜！草根生意唔受衰退影響！唔係LV，唔做大陸客，所以又唔受冇大陸客嚟影響！留意返4月年結，今次中期業績係5–10月
2. 睇真啲業績，原來所謂大增2.54倍，係140萬升到507萬！買層新界樓都未得（當然不能咁比）。
3. 咁你話，升即係升啦，都係喜訊。總好過蝕，咁環境唔蝕執到。又其實係。不過，睇埋點解賺錢？稅前賺520萬（近乎唔使畀稅啦），但有480萬係賣物業（舖？但賺咁少？定倉？定乜？唔知）。即係本業係零利潤 — 當然，總好過蝕
4. 又所以插嘴講下，點解香港地，賣米線又好，賣燒鵝又好，援交妹賣身都好，都係買樓買樓再買樓，或者買樓買舖買廠。都唔好話廿年前啲廠佬買樓買舖買廠賺嘅錢，係佢做本業幾世都搵唔到。正面啲睇，就算落難之時，就係靠賣呢啲嘢頂住，渡過難關。只要不死就是活著，留得賓周在哪怕沒春袋，話唔定之後又一條好漢。你見一仔之前落難，都係靠賣台灣物業頂住。
5. 仲有個技術啲嘅問題。如果冇理解錯，阿信屋係日圓升值嘅受害股，基本上yen跌佢就升，yen升佢就跌。因為生意收港紙，但部份來貨要畀日圓，日圓升就唔太好玩。其實係好渣頸就命望天打掛。你啲濕鳩大學Finance 大學生就梗係走去教人用Derivatives Hedge啦。咁易呀可？（當然唔排除其實好多公司係唔Hedge，自己take position）
6. 而一年去幾次日本嘅（例如我，你睇呢篇文時我就在日本買薯片）就當然知日圓4–10月相當強。有乜影響？其實上面講嘅未反映晒。For some 會計理由，有啲東西冇直接唔計入賺蝕—但其實我覺得係搵笨實嘅
7. 呢個叫total comprehensive income嘅東東，十分反智。見到啦，阿信屋話賺507萬，但呢個外匯蝕返1500萬！十分甘。不過舊年仲勁，3200萬！所以扣埋呢啲就直頭「蝕」
8. 但你話，喂，冇計落個損益表P and L喎，報出嚟係賺錢。係嘅。咁有乜影響？使乜理？梗係有啦。因為，會直接在你本book度冇咗的！「即係你入賭場兩個鐘後冇輸錢，不過最初拎500萬換籌碼，而家畀返400萬你」。正式啲講就係，真蝕錢咪經P and L再扣本book，呢啲就直扣。
9. 阿信屋嘅例子，所以你咪見到，明明賺錢，又冇派息，但本book居然縮咗。亦因為呢啲原因，你睇啲咩保險股，睇佢咩賺同蝕，係浪費時間的。本book可以縮咗一半，但公司仲係話冇蝕錢。
10. 講下其他。阿信屋，講緊半年做9億幾生意架！都真係唔好講乜利錢，實情已經連蝕咗N年。呢類就真係表面風光，外行人以為身光頸靚，內行人有苦自己知（唔係扮）。半年都9億生意到你手喎，實情賺到嘅極少，甚至好多時要蝕。
11. 最風光嗰時（2011），阿信屋一年6億生意，賺3000萬左右。5%純利率，其實相當好架啦。但就只係嗰年。又係老生常談，護城河嘛。Scarcity。你有議價能力，定係消費者有，業主有，供應商有？
12. 阿信屋點玩，應該大把人熟過我，但我睇返嚟嘅，咩成個櫃咁入貨，日本人點信你 — 人地唔識抄？日本人凈係信你一個咩。呢啲生意係好難持續嘅。反而你見啲快餐店，純利率都可能係5%，但相對地個生意冇咁易畀人取代（你可以聽日開間777問韓國泰國拎貨，但你可唔可以聽日開間大家樂？）
13. 不過又話說回頭，業績差就還業績差。甚至你可以學埃汾金句：業績只有合唔合預期，但公司應該冇分析員跟了。其實得返2億幾市值，應該呢啲小小賺蝕唔會影響到，賺幾百萬同蝕幾百萬，對股價影響應該一樣。係生死問題，唔死就唔係呢個價啦
14. 之前都寫過，蝕錢唔緊要，蝕唔食得起？。阿信屋本book都仲4億，今年半年勉強好似力保不失，上年全年就蝕1千萬，咁如果只係每年一千甚至幾千萬咁蝕，都有排未死嘅。
15. 呀仲有，睇嘢實在唔好咁表面。阿信屋應該唔係好受大陸客影響，但不等於會好做。正如LVMH好受大陸客影響，但股價業績坐火箭，大股東幾乎變埋世界首富，仲大把錢周圍買嘢。
16. 呀仲仲有。真係唔好做。半年9億生意，上市公司又點？你見，舊年係冇一條友有100萬人工！（今年好啲，有一個）。然後你班冷氣西裝友叫人地搞ESG。哦。真係講ESG嗰堆友大把人工都唔止100萬啦
Facebook 專頁有更多短文: https://www.facebook.com/ivanliresearch
