睇有線電視: 蝕錢唔緊要，但蝕唔蝕得起？
Facebook 專頁有更多短文: https://www.facebook.com/ivanliresearch
勁蝕4.56億 有線裁百人
後半冇乜特別，雖然有人奇怪原來有線都仲有咁多人炒。正如亞視炒50人，都有人奇怪原來仲有50人可以炒。
前半就比較有趣，值得講下。雖然同樣地，居然可以蝕到成5億，又唔係炒嘢，都唔係咁容易的。仲要做住12億生意喎。而其實有線其他業務，包括惡名昭彰嘅有線寬頻，仲有錢賺嘅—即係有線電視本身蝕得仲多。
就咁，好多時你班友，只係著眼於蝕幾錢乜乜物物，而忽視咗最重要嘅一樣嘢：蝕唔蝕得起先。
舉個同業嘅例子，無線（電視廣播，511啦下）舊年都蝕2億，30年嚟首次，一眾憤青都當然好開心，好似佢有份咁。但同有線好唔同，你話爛船三斤釘又好乜都好。就算唔講任何節目好唔好睇有乜影響力之類，只講數字。首先，無線嘅「本業」仲係賺錢嘅。當然賺錢不代表好叻（你拎去銀行做定期都賺錢的），亦不代表股價會升，更不代表你應該買，三回事。但同有線（或亞視）嘅情況實在爭好遠。
第二，更重要啦，無線蝕2億。但其實總權益（股東資金，所謂的Book value，帳面值，凈資產，同一回事）60億咁滯，唔入肉嘅。況且都話「本業」仲係賺錢，有理由相信之後就會好轉（before getting worse）。
有線呢？勁咯。蝕4億半，但個總權益，先7億多啲。仲要啲虧損係含金量好高，唔係因為咩一次性嘅嘢，「即係你預佢下年都應該繼續蝕」。你以為不務正業炒燶期油買垃圾債券減值好大鑊？我話你知，專注本業都仲蝕到仆街先最大鑊。
事實有線蝕足10年，呢10年累積蝕咗過20億，加埋新鮮滾熱辣整多4億半，下年（未執的話）應該有機會累計蝕夠30億。之前嘅數懶搵，但直覺都話你知肯定之前賺埋嘅都在呢10年嘔突。咁情況你要人注資，都幾難。買影響力還影響力，10年30億喎，就算對一線富豪嚟講都唔係小數。況且，有錢做乜要益你？一千萬對李澤楷都唔係錢，你下次見到佢叫佢畀你丫（除非你係郭嘉文啦）。
另一個睇法：7億多啲嘅 book，舊年蝕4億半。即係蝕多兩年（呢7億已扣除舊年4億半了），你間嘢就變負資產，資不抵債，negative book value。咁都得？冇PE（市盈率）聽得多，冇Price to book 都得？咩唔得，有見過嘅。當年金融海嘯東航都係咁，負130嘅book value，股票繼續trade，飛機繼續飛，糧照出，但人地有老母錫住。渡過難關後而家總算正正常常。
咁其實皇牌FOV，始終棋高一著啦。見到唔對路，你估真係蝕多年先搵人救咩。未出業績就已經宣佈咗供股啦，其實有線股東（如果仲有）都慣啦，近年都唔記得供過幾多次股。幸好我有寫低，自己去考下古。簡單嚟講，最近呢次（今年年頭）供股，係上次（舊年年尾）方案被否決咗之後嘅修正版，14日就出到街，第樣嘢唔見咁有效率。而今年年頭呢次，都係未過股東大會批嘅，4月尾先舉手。
彩蛋係：最近呢次供股（再講一次，未過的，即係未開始，未收到錢），正係集資4.7億 — 基本上就係舊年蝕嘅錢。巧合啫應該。就算唔係巧合亦冇乜出奇。供股1月宣佈，公司呀CEO呀老細呀一早知蝕幾錢啦，你估同你一齊夜晚11點上港交所係咁F5咩。
同樣道理，國泰之前連蝕兩年（2016及2017），一年12億半，一年近5億。但有冇諗過公司有幾大？話晒都（嗰時）藍籌，香港最大嘅五十間公司喎。當年國泰book value 成610億（最新去到640億），莫講話12億，120億都蝕得起。人地仲要冇供過股仲有息派添，話咁快仲可以收購埋同業添。驚人執笠？你都係顧掂自己先啦。
講返有線，其實都係，冇乜好講的了。曾經唔少朋友在嗰度做，後來都走嘅走，都唔使點就住講了。實情係傳媒蝕錢買影響力，大家都知。但得罪講句，有線有乜鬼影響力呢？唔好成日睇啲記者（特別係上咗岸嗰啲）圍爐打飛機啦。咁嘅影響力搵人年年幾億幾億咁輸？係，生意人有錢，但唔係白痴的，我拎去literally 燒銀紙煲糖水（胭脂扣？）包養女明星好過啦。或者搞檔網媒好過，01都唔使年年蝕幾億啦下話？
我就當（雖則我幾懷疑）啲用戶個個月比幾舊水係為咗睇新聞（其實會唔會太睇得起自己？我訂 Financial Times都未使一個月幾舊水，你啲新聞好過佢？Really？不過Financial Times冇歐聯睇）．就唔係咩話做好內容乜柒就有用嘅（正如講國泰個個網友都話要做好服務，但本人就唔會比貴啲，錢由天度落嚟嘅）。對有線最不利嘅係：其實唔係冇人睇或冇人比錢，係根本已經好多人睇同比緊錢。有線而家都仲80萬用戶（一家幾條友睇喎），可以有幾多增長空間？同樣地，我唔知你畀緊幾錢個月睇有線，我都唔知（嗯）。但，加價空間都係冇乜嘅。我想像唔到有人畀一千蚊個月睇有線。
最後少少技術嘢：其實呢個總權益/股東資金/Book value/帳面值/凈資產，quite simply，就係真係屬於股東嘅嘢。「乜有嘢唔係股東架咩？」。大撚把。會計101有教啦（唔識嘅真係幫你唔到），Balance Sheet Assets = Liabilities + Equity 嘛。你間公司嘅嘢（資產），一係就股東嘅，一係就街外其他人借返嚟嘅，就係咁簡單。亦都所以呢舊嘢亦係「凈資產」，減咗負債後嘅資產。
實務上點運作？點解有線得返7億國泰有640億？其實同你樓下檔茶餐廳嘅原理都差不多。賺錢嘅咪一路滾上去，年年蝕錢嘅咪係咁陰乾，有線蝕足咁多年乜都乾晒。另外仲有咩會影響呢舊嘢？派息啦，派咗息呢舊嘢咪少咗，由公司去咗股東手上嘛（知道「公司」as a 法人同「股東」as a 自然人係不同東西架可？雖然好多華資公司當朕即天下）。仲有乜？有線咁，供股集資咯，股東再拎錢出嚟入公司，咪碌返大個equity。掉轉頭，回購，咪令個股本縮咗。
至於如果你50億去買間book value 10億嘅東西（正係國泰買港航），會有乜後果，冇咗50資產收返10億嘢咁點算，就下篇文試下講了。
Facebook 專頁有更多短文: https://www.facebook.com/ivanliresearch
