講緊你呀,劉肇邦警司。
做得記者,一般都有初心,想為民請命。不過共業係,香港記者都做咗兩三年,就會轉行,一般都係會轉公關。我好理解,因為留喺傳媒入邊打滾,係會冇乜前途。
不過有一種公關,我呢世都唔會理解。就係幫政府 spin 的公關。
你係用自己喺傳媒行業入邊學到嘅嘢,對付返傳媒。
反轉豬肚就係仆街。
我明白人要食飯要供樓,但係我冇辦法接受,一個為民請命嘅記者,最後變成一個幫當權者作惡的工具。做品牌公關,都係推 product 湊客 sell 記者,但做政府公關,係幫政府掩蓋謊話、文過飾非、扭曲黑白。
劉肇邦同羅永聰之流,我都好討厭。羅永聰都叫好啲,佢個老細都識講人話,佢自己都識講人話。
請問劉肇邦你羞唔羞愧?你做咗五年 TVB ,攞前戰地記者呢個名出去招搖撞騙打響知名度,到今日為警方買埋個屎忽。
我後尾起佢底嗰陣發現,呢位警司,曾經就讀浸大新聞系,同呂秉權同期。
食蛋都冇咁燥底。Poly 今晚搞到咁,劉警司,你為當權者顛倒是非黑白,可睡得安穩?
為路西法賣命,會有報應的。
我今晚睇住一班和理非出去圍魏救趙,好多人身上連豬咀都冇。佢哋好驚,好唔熟手,但係都一直向前行,一路嗌「一二一二」,一路向警察防線推進。結果唔到三分鐘就出催淚彈,濃到有豬咀都擋唔到嗰一種。好可怕,但冇人走。
只求明早更多人出來反包圍。928 做到,今日都可以。