唔知由幾時開始鬥黃變成風氣，一大班黃衛兵四處出沒，以批鬥黃圈一切事物為己任，唔知咩心態
你啲嘢唔好食咩，又鬥
你啲嘢賣得貴咩，又鬥
你伙計做錯嘢咩，又鬥
你老闆講錯說話咩，又鬥
你企得唔夠前呀，又鬥
你企咁前，都唔知博乜，一樣鬥
你問我，我從來唔認為黃衛兵係黃。道理一字咁淺，出面更多又紅又藍又黑又白嘅人/公司/食肆，佢哋反而全部視若無睹 ── 只係一味以鬥死「黃」圈為樂，係咪巧打耳先？
今次悦和醬園出事，源自有人於一個黃圈群組上出帖指佢哋響 TBB 某電視節目入面賣廣告，於是樓下就例牌一堆人化身成判官，紛紛指罵醬園係「偽黃」，隨之而來就更加集體去到悅和 FB 留言責問。
之所以睇到㷫，皆因又見到嗰幾個鬥黃常見盲點浮晒出嚟
1. 暗黃就唔係黃？
悦和同好多鋪頭/人一樣偏於暗黃；從平日言行上你絕對會睇得出佢政治傾向係黃，但你要呢類人講到明自己係黃？絕對強人所難。同時，真係有必要全世界都大大聲公告天下「我係黃架」咩？成熟啲啦好心，靜靜雞咁贏聽過未呀。
2. 未審先判
蜂起責罵嘅人當中，大部份都只係聽信一帖之言，並未真正睇過其所謂「廣告」，已經急不及待插定先，享受網絡欺凌之快感。
3. 概念混亂
當然夾硬要講你都可以話一樣，但其實「TBB 介紹佢」同「佢落 TBB 廣告」完全係兩回事。後者你話要杯葛，我同意，但前者你都杯葛？咪玩。
4. 魚死網破
在偉大中央的全面管治思想之下，今時今日拉人根本唔需要理由，黃色經濟圈成為近乎唯一無風險嘅不合作手段。
舉中指可以拉你，唔返上行人路可以拉你，就連著錯顏色衫都已經可以拉你，但幫襯黃店就絕對冇得拉你！畢竟銀兩係你嘅，你鍾意幫襯邊個，玉皇大帝都冇權過問。所以鬥死黃圈後邊個最高興？只要稍為肯用腦，諗下就明。
跟據其 FB 上資料所講，悦和早於1945年創立，係純本地生產製作，由於未有如同珍、淘大等追上現代化潮流，只作家族式地區經營，規模同發展都有侷限，即使在本地名氣亦唔算響。
悦和真正為人認識，又係受惠於社交網絡 ── 嚴格來講只係近一年，反送中運動以後，悅和善用 FB 對社會事件尤其黑白是非上屢屢作出橫抽直拍，下下都中，嘢嘢都應，大快人心之餘仲要結合自身業務範疇處理得絲絲入扣，令到其 FB fans數目短短一年間直線飆。冇錯，我的確係睇住佢由幾百上到依家4萬幾 like，以一個老舊品牌來講，近乎奇蹟，其 admin 駕馭社媒功夫之了得絕對唔講得笑。(據聞悦和嘅 FB admin係家族中人，並非外判俾專業公司卻有超越專業公司嘅水準，更加難得)
