里數教學－亞洲萬里通 135,000 里－頭等來回歐美澳
自從亞洲萬里通轉左新制之後，表面睇落換飛好似貴左好多，你又知唔知其實只需要 135,000 里就可以換到頭等機票亞洲來回歐洲/美國/澳洲？
根據亞洲萬里通網頁公佈嘅換算表，國泰航空單程頭等飛去澳洲就需要 70,000 里（夥伴航空公司需要 75,000 里），歐洲 100,000 里（夥伴航空公司需要 110,000 里），美國西岸東岸就分別 110,000 里同 125,000 里（夥伴航空公司需要 120,000 里同135,000 里）。
國泰及港龍外，亞洲萬里通總共有 23 間夥伴航空公司。規模比較大嘅夥伴航空公司有例如：美國航空，英國航空，日本航空及芬蘭航空等等。
正正常常換個來回頭等就需要至少 140,000 至 270,000 里，你話幾唔抵！
但係當你睇真啲，你會發覺亞洲萬里通單程獎勵機票其實係可以包括一個轉機或中途停留，及總共兩個航段。唯一限制就係，如果第一程出發地同第二程目的地係同一個國家或地區入面，轉機或中途停留亦需要係同一個國家或地區入面。
亞洲萬里通條款講明：
單程飛行獎勵（「寰宇一家」聯盟成員獎勵除外）同一旅程可包含最多2個航段，並僅限1次中途停留或1次轉機。如首個航段的出發地機場與最後一個航段的目的地機場位於不同的城市，但所有航段均屬同一國家/地區內，該旅程仍視為單程飛行獎勵。另一方面，首個航段的出發地機場與最後一個航段的目的地機場位於同一國家/地區的不同城市，且與首個航段的目的地機場不屬同一國家/地區，該旅程將不被視作單程飛行獎勵。*例如 紐約-達拉斯-洛杉磯可視作單程旅行，而紐約-倫敦-華盛頓則不可。
根據網上換算表，頭等單程最多只會需要 125,000 里（夥伴航空公司就 135,000里）。換句話說，如果你唔係第一程出發地同第二程目的地都係香港，125,000 里就可以換到兩程頭等獎勵機票。
以上面去美國洛杉磯為例，你可以坐國泰航空頭等，但如果要用單程方法換機票，回程就要坐夥伴航空公司頭等，因為國泰所有美國航班都係來回香港。所以你嘅頭等回程選擇就有：
美國航空：洛杉磯－東京
日本航空：洛杉磯－東京
*美國航空及日本航空雖然亦有洛杉磯－北京 / 上海 / 大阪等航線，但係佢地並無頭等客艙，所以頭等選擇就只有東京。如果選擇去程頭等回程坐商務嘅話，你就可以使用混合艙機票，下次再詳細解釋。
總結而言，頭等香港－洛杉磯－東京就只需要 135,000 里，抵到爛！你可以選擇買程廉航機票，又或者平平地 10,000 里換多張單程機票就可以返香港。
同樣方法坐頭等來回各大歐洲/美國/澳洲大城市亦可以：
歐洲：倫敦 / 巴黎 / 法蘭克福 / 阿姆斯特丹
美國：芝加哥 / 紐約 / 三藩市
澳洲：悉尼
比如我想去倫敦，我可以選擇下列航線換頭等機票：
去程國泰航空：香港－倫敦
回程坐英國航空：倫敦－北京 / 吉隆玻 / 上海 / 新加坡 / 東京或者日本航空：倫敦－東京
去程回程調轉亦可以，例如：北京－倫敦－香港
以上例子坐頭等香港去倫敦再返新加坡就只需要 135,000 里！然後再買程廉航機票，又或者平平地 10,000 里換多張單程機票就可以返香港。
以洛杉磯同倫敦兩個城市做例子，用單程方法換頭等機票就慳左 85,000 里同埋 65,000 里，足足慳左差唔多四成里數！
仲等？即刻用呢條 link 換返張頭等機票去旅行啦！
