一百七十三蚊的下午茶—蔡瀾越南粉
Facebook 專頁有更多短文: https://www.facebook.com/ivanliresearch/
事忙，呢排都唔多得閒寫文（係喎，之前一日幾篇的）。唯有睬過界寫嘢食。咁啱蔡瀾檔越南粉新屎坑開張，又近我公司，冇理由唔近水樓台去試下嘛。
是的，個題夠嘩眾取寵，但真係$173蚊下午茶呀下（唔係以為食晚飯夠飽掛？女仔可能夠，我唔得咯），唔係兩位甚至幾位夾埋。
認到啦，就係中環鏞記對面，老蘭翠華個位，黃金地段，唔愁生意。其實昨日（七月五號星期四）我去過一次，摸門釘，算係試業咁，只做貴客（即係冇我份），六點至八點。今日（七月六號星期五）我兩點半去到，又摸門釘，話截咗龍。而我其實唔係好明咩意思。總之我得到嘅訊息就係晏啲再去排。咁到大約五點左右我去排，就係咁請況。前面十幾廿人咁咯。我排咗半個鐘左右，算係合理（有得唔合理？）。但重點要強調我自己一個人，同埋肯搭枱（有得唔肯？）。我行入去時前面仲有十個八個人的。所以記住除咗單嫖獨賭，試新嘢食都係一個人去最好。試過唔中伏同埋大約排幾耐先好同女神（如有）去排嘛。
樓上就係餐牌，其實都好多嘢食，我甚至嫌佢太多嘢食。個個新文青講啲咩日本匠人精神，人哋就專心做好一件事嘛。不過算，呢度是腥港，幾時都係茶餐廳文化，唔好講咩日本匠人。
又其實時為五點，我當然係已經食咗午餐未食晚飯，當下午茶。所以唔食得太多嘢，「就求其叫碗粉叫個甜品叫杯嘢飲啦」。咩春卷法棍蝦餅只有下次
價錢係相當合理嘅（又，有唔合理嘅咩？）。六十八蚊碗粉仲想點？你去豚王食都食舊水啦（唔使質疑，就係午餐食完）。咁但，作為一個金融人，我就梗係食最貴嘅一二八「特別牛肉湯河」。關乜事？梗係關拉。相對成本嘛。咩相對成本？排咗半個鐘呀！唔係排咗半個鐘入嚟食六十八蚊下話。要食梗係食到最豪。正如你見啲友去旅行就唔會慳住食，合理的。
講返Pho，「其實我係從來都唔鍾意食的」。如果識我好耐嘅知道我有好長時間（三十年左右啦）係餐餐都要食飯，接受唔到食湯麵做正餐，更唔好講話食件三文治。英國讀書年代啲鬼仔食件cold sandwich做正餐我覺得真係浪費生命（有個可以食包薯片當正餐，好恐怖）。咁但呢啲都已過去，你見我成日食拉麵都知。所以本質上我唔抗拒湯河粉（話大中華膠都好，Pho明顯係中國傳入，名都係，不過而家越南又玩去中國化，居然夾硬話係源自法國，法國佬真係笑到不洞漏拉）。
問題係，真係孤陋寡聞，從冇食過好食嘅Pho。蔡瀾呢檔嘢話係澳洲墨爾本「勇記」配方嘛，睇佢啲文（唔好忘記我睇壹週刊大的，第一期睇到執笠）都知佢成日講，正如新加坡文華酒店雞飯—但我去過澳洲，而冇去過墨爾本咯。而在越南嗰啲更加得啖笑—你可以質疑我話我食嗰啲連鎖店唔好食，咁我相信都係。咁但總之我從冇食過好食嘅Pho係事實
咁講返香港，叫咗，好快就到。你最關心當然係，好唔好食。答你，就係相當好食。至少係我食過最好嘅Pho。當然上面都話你知我冇食過幾多Pho。所以貴客自理，食完覺得唔好食，叫蔡瀾回水畀你啦，關我L事。
至於有幾好食呀，就留畀啲食評周柏豪慢慢寫。或者等啲文青慢慢同你講咩Pho嘅歷史文化，越南人點解去咗澳洲之類。我要寫我都識寫。我細細個就接觸不漏洞拉添。屯門虎地開放營嘛，啲越南佬買晒（我老豆叫我買的）啲啤酒，越南婆就收十二個蘋果上床。
同「幾蚊任摸」互相輝映嘅，當然係「12個蘋果」。係咪12個並不重要，甚至係咪蘋果都不重要，重要嘅係呢個係傳說中性交易嘅報酬（一樣，無人可以證實）。做乜會係生果？因為，係越南女人。何來越南女人？因為，屯門以前有越南難民營，就在虎地（即係而家富泰村，嶺南大學嗰邊）。咁越南難民營關我乜事？因為個營後期變咗開放營，越南難民可以出嚟買嘢，甚至打工。當時我就住在附近，「12個蘋果」冇見過，但就見過越南男人買晒啲啤酒仲同我講唔好意思（因為累我幫唔到老豆買）。種族融和就係咁形成的。
要睇慢慢睇，但本文都係主要講好唔好食。咁答案就係好食。好簡單。湯好味，粉好味，牛肉好味（仲想要乜形容詞？）。同場加映對面個大陸女人問人「你們的生牛肉湯河是不是生的」，難怪畀人小。不過港燦返大陸一樣問人啲麻辣火鍋「辣不辣」，實在沒有誰比誰更高尚。
同場加映，嘢飲喎。冇家父（未變先父）至愛嘅越南33啤（純粹童年記憶，我懷疑佢都唔記得咗呢件事）。咁大熱天時又費事飲滴咖啡（其實費事阻住地球轉啫，早兩晚我在永華都係食熱紅豆沙）。唯有凍啡。普普通通。仲自動送埋膠飲管（我冇用啦下），環保L又可以出嚟鬧- 不過照計環保L就唔應該食萬惡嘅牛肉湯河的。
仲有，甜品，sort of．有諗過叫雪糕，但一來怕佢會即時上（事實都係），二來，覺得雪糕九成九OEM。所以叫呢個青檸香茅凍，感覺好似冇咁OEM。丫，幾好食喎，夏天食特別好。
埋單，一百七十三蚊，冇點你。貴唔貴？梗係唔貴啦。都話你去食個拉麵都舊幾水。水準係有嘅。但排餐飽就有啲無謂。不過佢開在老蘭個位，我估可見將來都仲要排，凈係慕名而來嘅大陸佬都夠排一年啦。
如果在中環返工嘅，例如我，就佳音啦，開到半夜十二點。以後在公司做嘢可以夜晚去食。
店名？貼咗啦。地址？咪話老蘭翠華隔離咯，咁都搵唔到你食一風堂算啦，轉角就係。營業時間？頭先講左啦。開到半夜十二點。係喎，越南人當地傳統唔會日落後食Pho的。但越南人當地講越南話添，你唔講？Fuck that 傳統啦。越南人傳統一七三一個星期人工添。
Facebook 專頁有更多短文: https://www.facebook.com/ivanliresearch/
