死在原稿紙上—悼林振強林燕妮
我好難嬌情造作，事實上我對林燕妮去世，唔係太大感覺。或者話個感覺係當聽故事咁，佢兩個細佬一個妹都早走過佢（三個都係淋巴癌，明顯係基因），之後老豆老母都走埋，一個人頂到最後。還好佢應該仲OK有錢，亦有個仔陪佢。
我輩男兒，照計唔會對林燕妮有乜好大感覺。對，我睇好多女作家嘅書，甚至係女仔睇嘅書。亦舒張小嫻深雪我都睇。但就係冇林燕妮，因為真係時代唔同嘛。我話我好欣賞林燕妮，係呃你嘅。我只見佢日日專欄講自己後生時點靚點多人追（咁呢個係事實），在美國讀書又點巴閉之類。
咁仲寫呢篇文做乜？其實係一併寫埋佢細佬林振強。林振強對我影響就大好多。一般人理解佢係填詞人，做廣告嘅會講佢嘅傳奇生涯—咁當然我都有聽佢填詞嘅歌（《每天愛你多一些》嘛，洗晒腦），亦梗有睇過佢嘅廣告—但呢啲只係佢嘅作品，唔係佢個 「人」。正如我聽容祖兒，但佢唔會影響到我
對我最大影響嘅係文字，係佢寫嘅文章。無論係正經嘅文（其實冇乜！），雜文，鹹濕笑話，打油詩，咩都好。細細個我就睇 「洋蔥頭」啦。仲有，林振強唔做廣告後，去咗幫肥佬黎手。壹週刊創刊時，我正係初中，我係由第一期睇到最後一期嘅忠實讀者。細細個未有錢買（或唔捨得買），但屋企有訂，仲係去便利店拎嗰種。初中嘅我好怕上體育課（高中時已經變成人無恥則無敵），但嗰時正係撞正係換壹週刊嘅一日，叫做幫我戥勻返啲不安情緒。（後來學校變cycle制，啲回憶打亂晒，發明呢樣嘢嘅人應該落地獄）
林振強在2003年已經教曉我Steve Jobs點樣說服百事嘅John Sculley過檔（留意當年Steve Jobs仲係廿幾歲，後生過John Sculley十六年），就係著名嘅「你想下半世繼續賣糖水，定係同我一齊去改變世界？」，而我到好多年後睇戲先發現我一早聽過呢句對白。林振強自己亦夫子自道，在佢篇經典嘅 《我的野蠻廣告生涯》講過，講佢點解離開廣告界加盟壹傳媒。對，於佢嚟講，做廣告就即係賣糖水咋（又，江湖傳聞，正係因為林振強崇拜Steve Jobs，所以壹傳媒叫Next Media，份報紙叫蘋果。至於《忽然一周》就真係源自「出前一丁」，都係佢老哥大作）
《我的野蠻廣告生涯》原文在此：
講咁多，其實係想講返《我的野蠻廣告生涯》呢篇文（當時分咗三期定四期在壹週刊登），正係2003年，林振強死嗰年。之前佢仲寫過佢在美國留學。然後佢寫過篇文，呢幾日都有人講，叫做《汽水．燕子．姐姐》，入面講佢童年回憶，同埋提到佢家姐林燕妮。林燕妮事後講返，睇到篇文就知道弟弟命不久矣，同佢告別—但當年嘅我慒然不覺，明顯唔識人情世故。林振強唔係成日都咁唔正經（雖然多數都係，你見佢寫《我的野蠻廣告生涯》都係幽默多），忽然咁正經寫童年往事，事後睇返，應該係就死—事後先知咯。當年佢嘅死，唔止我覺得好愕然，娛樂圈中人都係。知嘅人好少，因為佢一路都keep住寫稿（呢個亦係寫稿為生嘅好處／定壞處—換著你踢波，一生cancer冇乜可能冇人知？寫文就得，寫咗都冇人知）
想講嘅係，林振強同家姐感情真係極好。對，林振強個妹林雁妮最早死（都係淋巴癌），林振強寫咗首《笛子姑娘》悼念佢—但亦謹此而矣。喂大佬佢填咁多詞—即係側田都寫首《情永落》畀佢條舊菜啦（我知有點不敬，但即時諗起呢個例子）。其他文章，好少見林振強寫佢個妹，或佢細佬（遲過林振強少少死，佢諗住捐骨髓幫林振強—點知就驗到有淋巴癌，夠晒黑色幽默）。有錯請指正，但我有理由相信佢同家姐感情最好。
林燕妮唔止捐骨髓幫林振強，仲幫佢好多嘢。林振強天才橫溢當然唔使討論，但，你都見好多天才橫溢嘅人鬱鬱不得志丫。林振強在《我的野蠻廣告生涯》都提過，佢覺得佢天生就係食廣告呢行飯，個行業注定係要由佢改寫，佢睇香港啲廣告時覺得「挑！咁老土嘅！等我嚟啦！」（呢句我而家都成日講）。於是佢寫信自薦，但完全冇人請—最後佢點入行？就係因為家姐。林燕妮同黃霑搞《黃與林》，佢同家姐講要做廣告，家姐就畀佢做（黃霑為咗泡林燕妮亦都當然唔會拒絶）。唔止，甚至連買太古城，佢都係靠姐幹，同家姐講想買樓，家姐就買畀佢。（呢排新聞話林燕妮買衫都成百萬，當年嘅一百萬，咁買樓真係輕而易舉）
對，林振強係個通俗填詞人，係個廣告人，係畫洋蔥頭嘅鹹濕阿伯，係寫《一個人在床上》嘅鬼才（壹仔最尾嗰頁）。佢大部份時間都係麻甩佬一名，但在林燕妮筆下，我見到童心未泯嘅佢。
講返林燕妮，忽然過身都令人有啲意外（儘管之前已知佢患癌，明顯係我唔太關心佢啲新聞）。因為佢同佢細佬一樣，寫稿寫到最後一刻。唔止，死咗之後都仲有稿出！我今日在Facebook分享呢張相好多人like 。知唔知有乜啟示？就係—十分明顯地，係冇人比錢買報紙的！
咪講笑，我覺得真係好喎，好型。林振強寫文寫到最後一刻，林燕妮都係寫稿寫最後一刻。戰死沙場先係士兵嘅榮譽，正如寫稿佬最好死在原稿紙上（而家就係伏在電腦上死），或者好似青文書屋羅志華咁畀書壓死。
真的，如果我今晚死咗，你都仲會見到我在Facebook出多幾日嘅文，我死咗幾日你先會知。對於寫作嘅人嚟講，最好嘅文，永遠係「下一篇」
