[菲賓的天馬]Crazy Rich Asian嘅公主,真係公主,仲早早拍過港產片
Facebook 專頁有更多短文: https://www.facebook.com/ivanliresearch/
呢排Crazy Rich Asian 《我的超豪男友》大熱。其中一個批評話入面其實所有Asian都係Chinese,得兩件印度仔做保安。前輩 Eddie Tam 譚新強 指出唔係,有個菲律賓公主做經濟學者出席婚禮。呢條女來頭就大 ,Kris Aquino,睇名有冇印象?佢正係阿基諾三世個妹。邊位阿基諾三世?菲律賓人質事件果位西口西面嘅賓仔總統。而佢地阿媽就係阿基諾夫人(廢話),aka科拉桑 ,亦係前總統,盧海鵬在歡樂今宵扮過幾次(嗰個年代江欣燕晚晚搽黑塊面扮賓妹,冇人話政治不正確)
講返,當年Kris Aquino都去醫院探望人質,仲同香港人講希望大家”forgive our country”。係咪黑面白面Good Bun Bad Bun冇人知,但門面功夫係做足的。

但,比較少人知嘅係,呢位菲律賓公主,一早已經拍港產片。講緊1991年,正係黃百鳴嘅呢套開心鬼5上錯身。由黃百鳴自編自導自演。劇透話埋你知隻狗變咗黃百鳴(我當年未入場以為黃百鳴變左隻狗),真係夠晒創意,咩super hero片全部行撚開

同場加演仲有徐寶鳳(唔係徐小鳳)。徐寶鳳以乜出名?字母咯。你懂的。識笑嘅識笑,唔識嘅就少年你太後生。
以下係劇情簡介,唔睇真係走賓:小詩有一隻很可愛的小狗叫Magic(也叫梅基),在她去美國探親期間交由男朋友阿傑照顧。詩去後,阿傑只顧吃喝玩樂,完全忘記照顧Magic,以至 Magic離家出走。後Magic經過一廟宇,救了一尊被香燭燒著的開心佛。開心佛立即現身,為答謝Magic相救,願意達成Magic之心願。原來Magic希望做人,開心佛答應給它四十九天做人的滋味,期間有苦有樂,如看到了主人小詩後但又無法表明自己的身份。在期限的最後一天,Magic為了保護小詩而中槍犧牲,此時小詩才發現它確實是自己心愛的Magic……
彩蛋係,呢套1991年嘅開心鬼,廿年後先拍續集,變咗《開心魔法》。女主角由菲律賓公主變咗吳千語。不過男主角之一繼續係黃百鳴,足足由太古城三千蚊尺拍到兩皮嘢一尺。不變嘅係套戲依然咁垃圾。我點知?因為兩套我都入場睇。港產片支持者嘛。
Facebook 專頁有更多短文: https://www.facebook.com/ivanliresearch/

