自己炒iPhone 然後鬧黃牛不公義係咩玩法？
Facebook 專頁有更多無聊短文: https://www.facebook.com/ivanliresearch/
呢篇文講黃子華同黃牛，但如果你預期我會狂鬧黃牛點賤格，Sorry，你入錯地方，網上大把呢啲文，即食又開心，施主請過主。
黃子華黃牛事件，網上一面倒都係鬧黃牛「抬價」，「炒高票價」，「阻住真正粉絲」之類。夠膽/夠癲出嚟唱反調嘅，得獅子山學會，當然畀人鬧到九彩。
但，世事真係咁簡單？黃牛係咪唔合情合理合法？未必。黃牛係咪「炒高票價」？好似唔係。實名制係咪靈丹妙藥？炒黃牛嘅拎去打靶係咪一天光晒？一半半啦。
先講合唔合法。好多人拎外國嚟做例子。我冇乜點在外國生活過，唔敢質疑啲當地港人，但我幾肯定佢哋係選擇性咁舉例。
殺人放火差不多在任何國家都犯法。但黃牛呢？好多地方都灰色地帶。香港都係，唔同場館唔同規定。外國更加複雜，由好嚴到好鬆都有。香港人最鍾意打飛機嘅英國如何？足球波飛黃牛犯法，演唱會演奏會就完全合法，最多係場地規定唔畀你入。況且，犯法還犯法，有冇點執法？唔覺噃。我好容易搵到一百幾十個網友買過黃牛飛睇英超，我都試過，冇一個畀人拉，亦冇見隻黃牛有事。
唔止，快樂指數爆燈，人類文明楷模，樣樣嘢都夠平等嘅瑞典仲惡。黃牛係人權，絶對合法 — 仲要係凌駕主辦方限制，即係主辦方無權禁止你轉售。估唔到呢？黃牛十惡不赦人人得以諸之？世界唔止係你個Facebook
其他地方，各處鄉村各處例，但罰得好重嘅，好似冇見過。Viagogo算係「合法黃牛」嘅大哥，拎正牌經營，60個網站，客戶嚟自160個國家 — 而冇見佢畀人查封。創辦人有頭有面，哈佛畢業生，唔係縮在投注站嘅古惑仔。
點解咁多地方都係灰色地帶，甚至默許黃牛？正係因為好有爭議性，唔係好似你估咁一面倒。況且，你唔歡迎黃牛啫，其實官方可能好歡迎。Viagogo在好多地方（包括英國）同埋球會合作，實行黃牛企業化制度化。球會唔使煩，政府唔使煩捉人。你捱貴飛？你嘅事。
我試過幫襯街邊黃牛，買到假飛，激死。後來經Viagogo，黃牛制度化，有投訴機制有得回水，保證真飛。我畀一千蚊港紙睇到場歐聯，好開心。相信賣嗰位球迷亦好開心（反正佢自願的）。何樂而不為？邊個最唔高興？係堅持只肯畀兩百蚊但又要睇嘅人。
歸根究底，點解有黃牛？就係因為供不應求，或者叫定錯價。當年睇關淑怡演唱會絶無黃牛（利申：多年歌迷），啲飛多到要在Neway送。我去日本睇足球睇棒球亦從無黃牛，因為根本坐唔滿。
講市場畀人鬧，但你無法逃避嘅係，呢個都係一個講市場嘅世界。點解麥當娜賣到幾千銀而關淑怡唔會？市場咯。唔好咁自欺欺人。既然僧多粥少，就要有個機制決定咩人有份，用咩機制其實好睇背後要分配嘅係乜。
而家講市場難聽過粗口，咁我唔係話咩嘢都要講錢。有時道德上大家覺得唔好，畀夠錢可以免服兵役不能接受，李小龍追思會都拎去炒好多人都會鬧。有時係公眾利益，大學學位應該畀成績好嘅人讀，如果香港主辦奧運或世界盃，我都贊成唔畀炒黃牛，等大家都有機會參予下盛事。
但，黃子華喎，黃子華咋喎。唔係香港主辦奧運，唔係李慧詩祝捷會，咁都要講公眾利益？唔係十號風球我坐地起價唔係起劏房賺到盡喎，睇黃子華都又要講Michael Sandel？老人家好忙。幾時三百蚊睇黃子華係基本人權？推而廣之，點解要畀錢先有得睇世界盃？點解唔係政府貼錢？或者抽獎？正係因為乜嘢應該係「公眾利益」嘅問題。香港主辦世界盃嘅，公帑包底我都贊成。俄羅斯主辦嘅，自己畀錢裝樂視啦仆街。
無數咁多人講實名制，理論上可行。但事實上我見識少，冇乜見外國嚴格執行，可能實在太麻煩，可能影響到某啲人嘅利益。而我幾肯定嘅係，你上Viagogo睇下，外國嘅球賽演唱會等等，一樣全部有黃牛，唔好咁天真以為香港先有人哋就冇。
你話李慧詩選手祝捷會，唔應該係中產專利，我同意。咪抽簽咯，冇問題的，或者鬥早起身咯（益左學生哥同阿婆）。但，睇黃子華，價高者得，有何問題？你話應該留比忠心華粉。咁憑乜你覺得出兩千蚊睇黃子華嘅廢老就唔係忠心，而應該同你鬥早起身或者鬥好彩？
你堅持覺得應該大鑊飯，鬥早排隊，鬥快襟飛，你可以有你嘅想法，好難說服到你。而其實如果你堅持做左膠（好奇怪，人人鬧左膠，到黃子華事件就爭住做左膠），我唔認同，但畢竟只係價值觀。
問題係，我在啲討論區呀咁，見到好多人，平時自己就炒iPhone抽毛記新股，而家就出嚟鬧黃牛不公義，變臉夠晒快夠晒偽善。點解不公義？因為我冇份賺咯。講過好多次，韓寒一句 「很多人恨特權，因為特權沒有在自己手中」，道破晒啲人嘅心態。早兩年寫過篇《我們痛恨的是特權 還是特權不在自己手中？》，正義撚鬧到七彩，但仍然係我最得意之作。
有人認為股票本身係投資（定投機？）物品，唔應該同門票拎埋嚟講。我唔同意。首先，咩係有得炒，又係你最憎嘅市場決定。上文都有講，大把地方完全容許門票轉讓。股票「原意」都唔係畀你有得炒。要有得炒時，招股書有得炒，一套勞蘇公仔有得炒，嘉麟樓月餅都有得炒，唔係由「本質」決定。
就當你話炒黃子華同抽新股唔同，咁炒iPhone呢？大把人自己炒過iPhone然後鬧人炒黃子華。兩者有何不同？喂，至少我炒黃子華冇令到用家遲咗有得睇，但你炒iPhone真係阻住用家喎。
鬧人無本生利嘅，唔見佢抽中毛記新股會原價沽畀人，唔見抽中iPhone會原價賣畀用家 — 更加唔好講叫佢買樓用返當年買嘅價沽畀人。喂，安居樂業人生大事，點都比黃子華更加唔應該拎嚟炒啦？
傳媒梗係做標題黨，話點喪炒。但上Viagogo望下，千幾蚊張飛任你買。好忠心嘅fans，拎千幾蚊出嚟，有幾天價有幾過份？你鍾意話杯葛黃牛寧願唔睇，我阻止唔到。但，負擔唔到？唔係下話。你炒部iPhone都唔止賺千幾蚊啦老細。
要解決黃牛，當然有方法啦。實名制又得，抽簽又得，一開始拎出嚟拍賣都得。但點解其他地方一路都唔做？當然有原因。篇幅所限，都未講埋眾多贊助商啲利益，仲有主辦公司呀藝人呀球會呀自己嘅利益。
講到尾，乜都炒一餐嘅香港人，忽然出嚟齊齊聲討黃牛不公義，本身就好笑過黃子華楝篤笑。入唔到場嘅，睇呢幕都明白咩係「搵食啫，犯法呀？」
鄭重聲明：本人從來無接受Viagogo任何金錢或非金錢利益，只係用家一名。
Facebook 專頁有更多無聊短文: https://www.facebook.com/ivanliresearch/
