仙道彬的話│男排女將重燃熱血 力圖打到散班你有喊出來嗎？
其實我都唔知點解。
食完飯，坐低睇《男排女將》，然後睇到力圖散班，忽然就說不出聲，眼有淚光。做乜呀，諗起乜呀，你問我，我說不出所以然。
香港的環境，確實如此，幾喜歡運動也好，去到中五中六，最多大學，就開始要為未來設想，忍痛放棄。
打波嘅朋友一定會遇到，當開始出來工作，當要拍拖，當要結婚，當有仔女，幾難先再有機會打波；當以為自己仲係十八廿二，打完一場就發覺傷完又傷，斷乜斷乜，然後你知道，時代已經唔同咗，你以為仲燃燒緊的熱血，早已因為各種原因，被各種人淋熄了，不留半點火花。
最後，大家都會退出，由熱血變成平淡，由想打職業變成打份工緊要啲，由冇咗籃球／足球／排球／網球唔得，變成連對鞋都封塵。
打一場少一場，慢慢你會明白點解。
仙道彬的話 | 由Real 帶來的感悟 「你有堅持到最後嗎？」
https://www.patreon.com/posts/44257009
— — — — — — — — — — — — — — — — — — — — — — — -
廣告時間：Patreon年費計劃上線啦！
多謝大家的支持，雖然進入休季，但見到大家仍然繼續捧場，當然開心。本來小弟Patreon的收費是分以下三種，都是「月費」價錢，由訂閱起收費，之後每月1號起過數。
- Rookie（10美元）
- Allstar（20美元）
- MVP（30美元）
Patreon的信息開始了「年費」計畫，一次過付費的朋友，將可獲5%折扣，但要留意，一按訂閱就要付出整年的年費，以Rookie為例，即10x12x0.95=114 (美元)，大家可自行衡量。謝謝大家。
— — — — — — — — — — — — — — — — — — — — — — — -
✋我的FB，歡迎大家上來留言討論
https://www.facebook.com/sendohbunnotes/
✋仙道彬手記 (Medium舊文)
🖖我的ig
— — — — — — — — — — — — — — — — — — — — — — — -
唔係每個人都有機會打職業，打甲一，但每個鍾意運動的朋友，都會有個夢想，可能係贏會長盃，可能係出國打一次比賽，可能係挑戰自己的極限，盡力咁去打足每一分鐘；那怕只係私league的一場名次賽，因為你懷念那熱血的歲月。
我喺呢段旅程，遇過好多人，有中學的隊友，有大學的隊友，有打乙組甲二的朋友，出到蘋果， 更加大大話話打過三代籃球隊，仲有其他無數球隊；有教練，有啦啦隊，有助教，有球迷，總之會覺得，就算最後行唔到咁遠，收獲仍然比想像中多。
「有數得計就唔係緣份啦！」
係，我冇贏過咩大賽，至少，都贏咗一班朋友。
十幾歲開始打波，到今日打咗差不多三十年，每次大家一齊落場，比賽也好，在花墟牛津修頓維園源禾打波也好，我仍然好珍惜每一個一起打過波的隊友；有啲隊友不歡而散，有啲試過嘈交，有啲夾咗一排就離隊，到最後，一樣珍惜，因為一齊打過波，已經係緣份。
其實你問我，我都答唔出點解會喊。套戲太熱血？Stephy做得好？定係因為疫情關係，太耐冇打波？我真係答唔到。
或者最大的原因，係知道冇可能再返番舊時可以只係開心打波的香港。
期待今晚的大結局，也期待疫情重開後，可以再落花墟同老友們一齊打波。
家瑜話，冇咗力圖，佢唔會有勇氣追夢。
我會話，呢三十年，冇花墟同所有陪我一齊打過波的隊友支持，我唔會捱過一關又一關。
識得打波，曾經熱血，已經無悔。
