太耐冇返嚟Medium好抑鬱，都係出吓文。本文原本打算放《迴響》，決定唔放（我喺《迴響》出稿又冇錢收）。
首先：買書去>呢度<。（原文版，らいとすたっふ出版，2020年）
呢一件事係發生喺廿幾年前，我仲係喺廣州留學，讀緊大學嘅事［*1］。
雖然已經係回歸咗，不過我哋香港人或者澳門人仍然因為國情問題，有別於國內當地學生，同外國留學生一樣，一律被廣州呢間大學視為外國人，只係情感上有個好聽啲嘅名，稱為「僑生」［*2］。對住呢班港澳僑生，又唔識國情、又唔識普通話（我識講國語嘅）、又唔讀書、上堂又瞓覺、淨係識得成日玩同走堂（你估我唔到，我冇走堂），其實間學校都慣晒，對住你班僑生隻眼開眼隻閉。學校安排咗公共課，不外乎都係嗰啲「基本法概論」（仲要分開澳門同香港兩個地區嘅基本法）、「普通話拼音」、「道德課」之類，你班僑生Year １第一個學期就要上晒，咁就算係認識咗國情㗎喇（所以Year １真心難捱）。
呢啲咁嘅豬頭骨公共課，主要都係搵一啲資歷比較淺嘅教師去做，與其話係大學課堂，不如話似係高中預備班。我嗰一年「普通話拼音」課堂兩個學分，係由一位嚟自烏魯木齊嘅女教師負責。咁當時我呢啲港豬都有一啲既有印象嘅，成日以為烏魯木齊呢啲北方地區（收皮啦港豬，正確嚟講地理位置係中國大西北，但係我當年真係以為喺東北。無知可恥。），無論男男女女都生到八呎高大大隻咁，應該會好粗魯，講嘢大大聲。不過呢位烏魯木齊嘅老師完全唔同，雖然膚色比較黑，但係身形嬌小，留咗一把黑色長髮，講嘢好斯文，仲好有氣質，係個堅強嘅成熟女性，喺我眼中係黑珍珠一樣，顛覆咗我對北方人嘅印象。同其他公共課相比，上佢堂至少賞心悅目。
老老實實普通話拼音大家都冇乜心機學，香港人心態，求其聽得明講得你明咪算囉（黐線咩，我打倉頡㗎，點會同你背啲普通話拼音）。不過見到呢個老師都好用心去教，好快知道邊啲學生係唔聽書，邊啲係認真上堂，以課堂效率嚟講完全跟足課程，考試仲要open book，咁好相與嘅老師去邊度搵？香港都未必有啦。
我係屬於認真上堂嗰種學生，有時會同個老師傾吓偈，大家上堂開心，好嚟好去。佢有一次提到自己對生活嘅滿足，就係因為「懂一點點普通話拼音（本人真係咁講）」，所以可以教書，可以有錢養得起屋企嘅小朋友。言語間聽得出佢原本喺烏魯木齊嘅生活唔算好好，但係佢亦都唔係特別鍾意教普通話拼音，只係為咗生活而去做。我哋冇再問深入啲，因為見佢已經開始眼濕濕，好驚佢突然間爆喊。
於是就轉個話題，唔知點解吹水吹到去花木蘭。老師原來都幾鍾意花木蘭故事，但係就慨嘆冇人寫花木蘭夠全面。呢個時候我就推介我極度鍾意嘅一本花木蘭小說，田中芳樹寫嘅《風翔萬里…
