2016年4月~2017年3月香港出版日本漫畫RANKING TOP 20

以往每年我都會向漫畫批發商查詢呢份資料，再共享俾日本各出版社。數據就是說話，有時無需向日方哭訴香港市場幾慘幾慘，俾數據佢哋睇就夠。另一個原因係明明其他國家及地區都有銷售榜，點解香港冇？

望望下面個銷售榜，唔知有幾多你有買？我指買，唔係睇。或者，有幾多你又睇過？

以下係2016年2月～2017年3月期間，香港出版日本漫畫銷售榜，由TOP 1～20。睇吓有冇機會整理新嘅資料，或者又公佈吓最唔好賣嘅TOP 20。

戴定頭盔先。
註：
☆資料由香港漫畫批發中心提供，但按個人調查三中商及報攤銷售情況而有所調整。
☆資料不包括各直銷活動由出版社直接售出數字。（即係假如有出版社喺動漫節入面錄得一人買一百套嘅紀錄，呢份資料係反映唔到）
☆此資料只供參考，或與實際銷售有出入。
☆此資料只反映香港出版社所出版之日本漫畫，不包括由台灣出版而運送香港之中文版本。（即係指出版社喺香港有公司、而又喺香港出版、版權上屬香港中文版嘅漫畫）
☆以下圖片可能太UPDATE，唔好咁介意。
☆啲圖下面有我個人無責任亂噏，可以飛。

第１位 《ONE PIECE》尾田榮一郎 ［天下／集英社］

毫無懸念穩佔第１位，不敗紀錄應該超過十年。一本漫畫養全家嘅好例子。只係希望作者身體健康，近幾年尾田老師身體真係唔好，我唔想叫個孫燒ENDING俾我。

第２位 《龍珠超》鳥山明、とよたろう ［文化傳信／集英社］ ★新上榜

相信下年度2017–2018年度嘅銷售榜，不滅嘅《龍珠超》會係TOP 1。又一次證明，香港人對《龍珠》嘅愛係異常級數。好彩漫畫版比動畫版節奏快，作畫又冇咁崩，的確有收藏價值。外傳《亞樂轉生》《暗黑BATTLE》都即將出版，冇理由唔買。

第３位 《ONE-PUNCH MAN》ONE、村田雄介 ［文化傳信／集英社］ ★新上榜

老實，ViuTV未播之前，《ONE-PUNCH MAN》係銷售榜第5-6位左右。電視仍然有好大影響力。同埋，香港版漫畫係冇中文名，呢一點係日本版權方要求，唔好問我點解台版有中文名。

第４位 《BORUTO-火影新世代-》岸本齊史、池木幹雄、小太刀右京 ［正文社／集英社］ ★新上榜

明明都換咗人畫，但係依然有番岸本齊史嘅味道，日本國民漫畫果然好勁。而且小忍者令人諗番起一開始鳴門嘅故事，係有種情意結喺度。

第５位 《HUNTER X HUNTER》冨樫義博 ［文化傳信／集英社］

相比起第34期相隔3年出版，第35期係隔一年，真係有進步。無論冨奸老師出咩作品都會買，死忠不止我一個。連續兩期都係古勒比加封面，難道武內直子真係咁愛佢？

第６位 《PLATINUM END-明日的天使-》小畑健、大場鶇 ［文化傳信／集英社］ ★新上榜

廢青做世界，勵志到一個極點。都係嗰句，小畑健畫咩都會買。就算成班廢青係中二病，都係個靚仔嘅中二病。HKD 35本漫畫，有5蚊係俾咗個封面嘅閃閃效果。

延伸閱讀：（個人推介）
廢青必讀！勵志到爆嘅《PLATINUM END》
在《PLATINUM END～明日的天使～》中找彩蛋

第７位 《金田一少年之事件簿R》天樹征丸、佐藤文也 ［香港東立／講談社］

《Ｒ》14期完。然後新開《37歲》版本金田一。唔通兩位老師已經畫厭咗阿一？但係其實佢哋繼續出落去，都係會繼續睇。

第８位 《遊戲王ZEXAL》 高橋和希、吉田伸、三好直人 ［文化傳信／集英社］

台版係冇咭送，呢個相信係香港版有高銷量嘅最大原因。新一輯《ARC-V》喺香港出版機會唔大，好嘢，炒咭嘅不良營銷手法，一拍兩散。

第９位 《龍狼傳》山原義人 ［香港東立／講談社］

又一次證實，「穿越＋三國」係不滅方程式。（其實《回到三國》喺另一層面上都係經典。）

第１０位 《天使之心II》北条司 ［玉皇朝／德間書店］

有朋友話惠香死咗唔睇、男主角唔係叫孟波唔睇，我完全明白。但係不如真係睇啦，真心係好睇。淨係睇北条司嘅畫功已經抵番晒。2019年重製版《城市獵人》都令人好期待。

以下TOP 11～20

第１１位 《ULTRAMAN-超人再現-》清水榮一、下口智裕 ［文化傳信／Hero’s］
第１２位 《Jo Jo Part 8》荒木飛呂彥 ［天下／集英社］
第１３位 《攻殼機動隊》士郎正宗 ［玉皇朝／講談社］
第１４位 《龍珠 彩色版 菲利篇》鳥山明 ［文化傳信／集英社］
第１５位 《魔導少年》真島浩 ［香港東立／講談社］
第１６位 《青之祓魔師》加藤和惠 ［正文社／集英社］
第１７位 《名偵探柯南》青山剛昌 ［安樂文潮／集英社］
第１８位 《龍珠 彩色版 人造人．斯路篇》鳥山明 ［文化傳信／集英社］
第１９位 《20世紀少年 完全版》浦澤直樹 ［玉皇朝／小學館］
第２０位 《MIX》安達充 ［天下／小學館］

睇完以上2017年度TOP 20，係意料之內？定係估佢唔倒？
（至少我以為《銀魂》、《島耕作》呢啲BRAND會榜上有名，但係只係第37、38位）

我淨係覺得好悶。

明明日本有咁多好漫畫，但係香港人只係來來去去睇嗰幾套。

對於一啲人嚟講，人生中可能只係睇一兩套漫畫，但係出版社就要出版大量唔知市場係點嘅漫畫。就算一本養全家咁好，不過下面一大堆赤字書，出又唔係（因為明蝕），唔出又唔係（話晒都有少少人睇，又簽埋合約）。

我都會怪香港出版社唔引進好作品，啲死書又賴死唔出，又出得唔好。怪之餘，都諗吓，最近一次買漫畫係幾時？係邊本？

預告：真係數下銷售由尾數上20本作品先。

My Medium Record：(Update中)
https://medium.com/@ishi014/my-medium-record-e1f290f9c470
每月月頭會將部份上月免費文章轉做會員限定文章。

順手睇埋吖～

2017~2018年香港出版日本漫畫RANKING TOP 20

寧願《隊長小翼》喺亞視播

［考古］讓變態擴闊視野 — — 《オカマ白書》

看《英雄本色 漫畫版》產生的疑問：港漫與港產片結合，只有這個玩法嗎？

個人BLOGss~
☆伊死的漫畫特區 （講漫畫、讚漫畫）

伊死的漫畫特區