2017~2018年香港出版日本漫畫RANKING TOP 20

2017年4月~2018年3月銷售排行榜

終於有時間整理銷售排行榜,但係,突然發現,2018~2019排行榜都差唔多係時間截數…離開咗出版社之後,時間過得超快。

2017~2018年期間,香港出版日本漫畫情況都幾係SAD,睇到TOP 20嘅排行榜,同之前一年唔係太大分別。冇新作品咩?唔係呀,但係啲新作品硬係唔好賣…(有時就唔關套作品事,係睇間出版社點SELL嘅啫)。

繼續戴頭盔。
註:
★資料由香港漫畫批發中心提供,但按個人調查三中商及報攤銷售情況而有所調整。
資料不包括各直銷活動由出版社直接售出數字。(即係假如有出版社喺動漫節入面錄得一人買一百套嘅紀錄,呢份資料係反映唔到。WELL,睇完全篇文,你知我講邊套啦。)
★此資料只供參考,或與實際銷售有出入。
此資料只反映香港出版社所出版之日本漫畫,不包括由台灣出版而運送香港之中文版本。(即係指出版社喺香港有公司、而又喺香港出版、版權上屬香港中文版嘅漫畫)
★圖片CAPTION繼續有我個人無責任亂噏,可以飛。
以下圖片盡量就番呢個排行榜內嘅出版時間,上次係我做得唔好。
★以「↑」「↓」表示同舊年相比嘅排行昇跌,但係有上有落唔代表賣多咗書/賣少咗書。始終排行榜係只顯示高低,而唔顯示實際銷售數字。
想知道邊本作品排行第幾位嘅話歡迎查詢。

回帶:


正式睇吓成績表:

第1位 《龍珠超》鳥山明、とよたろう [文化傳信/集英社] ★↑

同上次預告嘅一樣,《龍珠超》輕易成為TOP 1,力證作品地位超然,就算唔再係鳥山明本人畫,亦都無阻FANS嘅愛。當然とよたろう嘅畫功都好似鳥山明,而且亦都捕捉到鳥山明嘅打鬥場面,最重要係喜感亦都好中。話晒,鳥山明原本打算畫冒險+搞笑漫畫嘅。2019年相信都係《龍珠》嘅世界。

第2位 《ONE PIECE》尾田榮一郎 [天下/集英社] ★↓

《ONE PIECE》繼續一本養全家。《ONE PIECE》一日未完,天下出版社依然會存在。應該係,除非唔係。

第3位 《金田一少年之事件簿R》天樹征丸、佐藤文也 [香港東立/講談社] ★↑

我等緊37歲版本出中文版呀!

第4位 《HUNTER X HUNTER》冨樫義博 [文化傳信/集英社] ★↑

由於冨樫義博出書密咗,相對地都刺激到銷售。香港同日本一樣,第35期嘅首週銷售數字比第34期勁。而喺日本亦都成為「連續N星期打救《少年JUMP》」良方,有連載嗰N期係可以賣多至少100萬本《少年JUMP》。
第34期香港中文版推出嘅時候,我手痕砌咗呢條玩嘢FB BANNER(主要都係想出番呢一招嘅直譯,香港中文版唔知點解俾前人改咗做另一個中文名。唔好問點解,我都答你唔到),點知集英社又話OK喎。……編輯部,你哋面對冨樫真係咁大壓力?(笑)

第5位 《ONE-PUNCH MAN》ONE、村田雄介 [文化傳信/集英社] ★↓

好衰㗎,喺封面尋找埼玉遊戲到第15期完,第16期之後封面就連主角都冇埋。第二季動畫期待霸王哥(安元洋貴)同餓狼(綠川光)。

第6位 《BORUTO-火影新世代-》岸本齊史、池木幹雄、小太刀右京 [正文社/集英社] ★↓

新故事延續《NARUTO》世界,喺翻炒作品嚟講,係非常高明嘅劇本,唔係一味SELL懷舊FEEL。

第7位 《天使之心II》北条司 [玉皇朝/德間書店] ★↑

兩輯《天使之心》證明咗讀者仲係好掛住孟波,於是今年有新嘅《城市獵人》動畫版,正。

第8位 《PLATINUM END-明日的天使-》小畑健、大場鶇 [文化傳信/集英社] ★↓

廢青做世界。日版已經出現咗最後一個神嘅候選人,見到故事入直路喇(終於)。

延伸閱讀:(個人推介)

第9位 《ULTRAMAN-超人再現-》清水榮一x下口智裕 [文化傳信/HERO’S] ★↑

終於谷到《ULTRAMAN-超人再現-》上TOP 10!我喊出嚟!第12期開始係「香港篇」,兩個作者堅係嚟咗香港取材(對唔住,我編咗份香港人都未必識去嘅旅遊行程…),令到第12期封面變咗「古惑仔」咁款。最近作畫嘅下口智裕老師唔係好舒服要休載,擔心咗一陣,見佢喺TWITTER話冇事喇,又放心番。而家最期待係呢套嘅4月新番動畫!超想聽到用廣東話講「十字電光」呢招!焦焦焦焦…

第10位 《烙印戰士》三浦健太郎 [天下/白泉社] ★↑

日本有讀者喺TWITTER話,佢爸爸追呢套作品,但係未等到結局就自己過咗身。真係要個孫燒俾自己睇,簡直係漫迷之痛。三浦建太郎老師,你唔好掛住打機同出個人誌啦,真係完埋套作品,等我哋安心上路好嘛?我已經唔介意又一次BAD END或者砍掉重練個世界觀&隊友,只求有生之年見到真結局。舊年呢套作品冇新書出,喺香港銷售排名係第31位,一有新一期,就上到第10位,你話KEEP住出書係幾咁重要吖。

以下TOP 11~20:
第11位 《青之祓魔師》加藤和惠 [正文社/集英社] ★↑
第12位 《Blame!新裝版》貳瓶勉 [玉皇朝/講談社] ★新上榜
第13位 《Naruto 710 Quiz Book》岸本齊史、JUMP編輯部 [正文社/集英社] ★新上榜
第14位 《名探偵柯南》青山剛昌 [安樂文潮/小學館] ★↑
第15位 《龍珠彩色版 魔人布歐篇》鳥山明 [文化傳信/集英社] ★新上榜
第16位 《龍珠超畫集》鳥山明 [文化傳信/集英社] ★新上榜
第17位 《冥王神話Next Dimension》車田正美 [秋田書店/玉皇朝] ★↑
第18位 《Gantz殺戮都市:G》奧浩哉、飯塚啓太、大崎知仁 [文化傳信/集英社] ★新上榜
第19位 《Jo Jo Part 8》荒木飛呂彥 [天下/集英社] ★↓
第20位 《幪面超人古迦》石之森章太郎、橫島一、井上敏樹、白倉伸一郎 [文化傳信/HERO’S] ★新上榜


以上排行榜並冇出現以下兩本高銷量作品,原因係咁嘅:

★《火鳳燎原》陳某

加咗條日文字嘅BANNER,成套作品當堂好似變咗日本作品咁。BANNER設計非常重要!可惜香港嘅BANNER就九成因為所謂嘅「第II類出版物」警告,而變到冇設計、冇宣傳,仲趕埋客,兼冇咩實際作用。相關條例由90年代到而家都未UPDATE過,而喺執行上,未夠18歲都買到二級書,電報辦點做嘢㗎?

以單行本形式出版嘅漫畫當中,銷量高嘅當然仲有陳某嘅《火鳳燎原》。但由於唔係日本漫畫,而係香港漫畫,同舊年一樣唔放喺個排行榜。《火鳳燎原》嘅銷售亦都同舊年一樣,喺排行榜係第3位。

講多一樣,《火鳳燎原》係有日版嘅(日本人咁愛三國),不過由於日本連載《火鳳燎原》嘅雜誌摺咗,後來連出版社都回歸咗佢嘅母公司而變相唔存在,總之日版出版到第9期就停咗……。

★《男兒當入樽 新裝版》井上雄彥

可唔可以淨係出新裝版封面POSTCARD或者畫集俾我哋收藏呀?啲內容識背喇…

可能你會問:「有咩可能《男兒當入樽 新裝版》冇上榜?」
我會答你:「喺馬SIR嘅世界,一切都有可能。」

《男兒當入樽 新裝版》以及之前復刻嘅《男兒當入樽 完全版》都一樣,流出市場做零售嘅數量,只係佔總發行量嘅10~20%左右。主要銷售途徑,係動漫節會場,同埋天下官方訂購。

據聞天下嘅舊同事每日淨係接呢套書嘅個人訂單已經做到PK,唔駛做其他嘢。(不過咁,天下員工而家嘅工作都只係得出版《ONE PIECE》《入樽》《食㦸之靈》《烙印戰士》《SKIP BEAT》。其他書?唔好問啦…)。

由於呢個排行榜係基於漫畫店嘅銷售做統計,既然漫畫店都冇貨賣,《男兒當入樽 新裝版》嘅銷售喺漫畫店非常低,入唔到排行榜係非常之合理。
點解會咁少書放出零售市場?
賺要賺到盡,肥水怎能流出別人田…
(想食花生嘅話,可以SEARCH番高登/連登喺動漫節相關討論;至於而天下FB嘅相關投訴就大部份已經唔存在了…)

冇新作品出版咩?

有呀。不過銷量差囉。

我哋睇吓2017年3月~2018年4月期間,香港出版社有咩新作品推出,一共有27套:(按銷售多→少顯示)

《Blame!新裝版》、《Naruto 710 Quiz Book》、《龍珠彩色版 魔人布歐篇》、《龍珠超畫集》、《Gantz殺戮都市:G》、《幪面超人古迦》、《潮與虎完全版》、《龍珠彩色版少年篇》、《機動戰士高達Aggressor》、《ORIGIN》、《犬屋敷》、《破壞雙亡亭》、《我的英雄學院》、《3x3 Eyes鬼籍之闇的契約者》、《Inifini — T Force》、《東京愛的故事After 25 years》、《怪頭現像》、《刀劍亂舞Online Anthology》、《DR.STONE》、《人面》、《零里》、《鳥葬巴別塔》、《殺手寓言》、《破風弱男》、《電影版妖怪手錶》、《精靈寶可夢地平線》、《Battle Spirits烈火魂》

或者你會覺得:

「咁多《龍珠》嘅?」

呀…對唔住,堅係關我事。鬼叫《龍珠》真係好受歡迎咩。養全家㗎。
(我臨走嘅時候同舊同事講,成間公司打跛腳淨係出版《龍珠》就安全,情況同天下只係出版《ONE PIECE》、《入樽》一樣)

當年手痕砌嘅宣傳Banner。用咗閃咭底之後,當堂咩回憶都番晒嚟。

「啲書名…未聽過嘅?」

出版社唔理市場需要,而出版一啲佢哋推介嘅作品,當然係想介紹好書俾讀者,但係都要做吓RESEARCH(雖然我知冇),睇吓啲作品背景、喺日本嘅銷售等等參考吓㗎(當然日本好賣唔代表香港好賣)。睇吓呢一年賣得唔好嘅作品,並唔係唔好睇(我幾乎睇晒),而係冇咩知名度。

但係,即使喺日本好爆嘅《DR.STONE》《ORIGIN》(兩套都係我喺2018年最愛),喺香港都賣得麻麻。賣得唔好,關邊個事?關冇MARKETING事。喺香港,呢一行一向都冇嘅。

《INFINITY T-FORCE》賣龍之子,老餅必睇!《ORIGIN》賣暴力美學,正嘢!《殺手寓言》…唔知賣咩。當年K談社推介呢套作品俾我,我睇咗3期都唔知點SELL好,唯一覺得可以試吓嘅方法,係用廣東話寫對白,因為作品涉及黑幫仇殺,用廣東話寫對白會好爽皮。不過,我自己一秒推翻咗呢個主意,套作品當時出到16期,計吓成本,賣得唔好嘅話,要還16期債。事實證明,玉記還緊債。

「全部都係啲翻炒嘢?」

係呀,咁啲出版社嘅高層認為,得呢啲作品受歡迎同賣到吖嘛。情況同《龍珠》一樣。
完。

「翻炒作品好賣」嘅謎思,用數據反擊:《3x3 Eyes鬼籍之的契約者》排行榜第39位、《東京愛的故事After 25 years》排行榜第43位、《電影版妖怪手錶》第69位、《精靈寶可夢地平線》第73位(鬼咩,邊個知咩係夢咩寶咩啫?)。好在,《Gantz殺戮都市:G》排行榜第18位,最近再版咗,令呢套力保不失,多謝支持。

小總結

漫畫銷量跌係事實,網上侵權人人唔俾錢睇都係事實,但係,呢個唔係出版社要放棄嘅藉口(對唔住,我放棄咗間出版社)。打逆境波從來唔容易,參考島本和彥《逆境NINE》,越係逆境就越要撐落去,越爛嘅牌就越要俾心機打,可惜成本唔容許。

過去一年大贏家係天下,攬住套《ONE PIECE》《入樽》過世,其次係文化傳信,有《龍珠》墊底。玉記就最慘,投資最多新書,但係又唔識SELL,明明好書變存庫。心算過,玉記全年埋單應該係赤字。

遠觀台灣彼岸,為谷銷量繼續推出特別版、送嘢、出電子版,但係香港呢?停滯不前。

我每年新年嘅願望都係一樣,中六合彩幾千萬,可以俾我唔理成本而瘋狂出版本地原創+日本漫畫。