我是咁樣回應啲廢藍的

伊死
伊死
Nov 13 · 4 min read

當嬲到一個頂點,就唔會同班廢藍嘈。

不過,如果你仲係谷住谷住道氣,我係咁回應:

「有冇見又一城呀?裝修師傅都冇拆得咁快。」
咪好囉,裝修師傅有工開。

「好地地做咩燒聖誕樹啫?」
係囉,好地地689做咩預言棵聖誕樹會燒啫?

「好似話個叔一燒危殆?」
醫管局出咗聲明未?危殆嘅話實出咗聲明啦。

「有人掉汽油彈呀!」
有冇人因為汽油彈出事?有人因為子彈危殆。我就驚子彈多啲喇。

「啲學生唔搞中大,差佬就唔入去啦。」
吓,喺中大宿舍瞓緊覺,朝早7點有差佬爆咗入去喎。
(唔好笑,我老母真係咁講嘅)

「唔一定要罷課啫。」
係㗎,不過搭車返學就俾差佬拉喎。

「中環唔冧嘅話香港就冇問題啦。」
咦,中環西裝友同OL好勇喎。

「晚晚9點幾10點就鳩叫,唔駛瞓咩。」
咁燥音管制由11點開始嘅。
咦,你咁早瞓嘅?又唔見你早返工?

「個學生哥鬧警察吖嘛,抵打啦。」
你老豆鬧你,你唔打你老豆?

「中大班學生放火呀!」
係呀,快啲叫消防員嚟啦,警察唔包救火㗎。

「水炮車係救火吖嘛。」
Madam話係掩護伙記走喎。你信Madam啦!

「啲示威越激進,咪越冇偈傾。」
200萬人和平上街嗰陣有傾過咩?

「示威還示威,唔駛裝修人吓嘛?。」
拘捕還拘捕,唔駛打人吓嘛?

「林鄭下台都冇用㗎喎。」
係咩?都係下咗台先講啦。

「警察係衰,但係示威者都唔啱喎。」
唔知示威者啱唔啱,但係到咗今日撐警察一定唔啱。

「政見唔啱啫,駛唔駛咁激退GROUP呀?」
唔退GROUP嘈得仲激喎。

「親戚都敢鬧?」
行政長官都敢鬧啦,邊個親戚大得過行政長官?

「何君堯都中咗一刀,打和啦?」
個男仔中咗槍要切肝,切埋何君堯個肝就打和。

「個男仔搶槍喎!差佬咪開槍囉。」
差佬唔拎支槍出嚟,點會怕有人搶呀?

「間黃店啲嘢都唔好食。」
去第二間黃店囉,有咁多間。

「間藍店啲嘢係好食喎。」
食咗背脊骨落,你食埋我嗰份。多謝。

「都唔知信邊樣,而家FACEBOOK咁多假新聞。」
信咩都好,唔好信TVB新聞。
信咩都好,唔好信東方新聞。
信咩都好,唔好信大公/文匯新聞。

「破壞啲公共設施就可以爭取訴求?」
打傷啲示威者就可以停止示威?

「示威啫,唔駛光棍日罷買淘寶㗎。」
係唔駛,不過我一向都唔淘寶嘅,淘寶咁多假嘢。

「阻人返工就唔好啦。」
咁鍾意返工,不如唔好放工?

「啲人根本就係仇共!」
咦,你總算明喇。

==完==

好冇心機寫文。
同埋,多謝你有睇呢篇廢嘢。

中大同學加油!



伊死講故仔

諗到咩講咩

伊死

Written by

伊死

冇得救的聲優迷。 冇得救的香港迷。靠爛到不行的日語搵食。前某日漫公司總編,好勇咁炒老闆魷魚,點知老闆一個月後都唔撈。商業著作有:《腐女子的日語 工口50音》(「錫巴斯陳欣」名義)。《澳門日報》不定期專欄作者(「醫神」名義)。

伊死講故仔

諗到咩講咩