兔神的啟示:食得鹹魚抵得渴,搵人笨者自笨之

想睇浪漫戀愛故仔嘅,而家可以消音喇。
今次講嘅,係一隻想移民嘅古惑兔,喺移民途中想搵人笨,但係又冇本事又笨又實,反而搞到自己一身傷嘅故事。

伊死
伊死
Oct 23, 2019 · 16 min read

(冇呀,冇影射咩人呀)

<日本神話 005>#大國主 #兔神 #你都有今日 #搵笨論

古代稻羽(いなば)一地,現今一般被認為係鳥取縣嘅鳥取市(我個人係唔同意嘅),所以嗰度而家有個白兔海岸,仲有人整咗呢個「戀人之聖地」嘅雕像。啋!唔知頭唔知路嘅話,會以為係大國主溝咗隻白兔呀陰功!唔係囉。睇埋今次個故事再講。

~開始講故仔~

一般講到「因幡之白兔」,應該只得《古事記》記載,但係隨住傳說、創作流傳可能會衍生咗唔同嘅版本。

係咁重溫吓《古事記》原文先。

今次嘅主角係大國主,呢個造型冇得輸。留意右下角真係有隻兔。(出處:PAD)

以下,我流廣東話翻譯。

話說大國主好很多兄弟八十神*,但係班兄弟個個都好鬼高竇,唔鍾意同大國主玩,仲有個國家都唔理,掉比大國主搞,有咩麻煩嘢都交比個兄弟執手尾。要講點解會咁,主要因為呢一班兄弟,不愛江山愛美人,個個都想娶喺稻羽呢個地方嘅靚女八上比賣,於是帶住大國主做跟班幫佢哋拎行李,成班佬浩浩蕩蕩咁去提親。
(提咩親吖,咁多男人去,搶親就真啦)
(嗱,唔好問我日本古代係咪興多夫一妻,呢一刻答你唔到)
*八十神:唔係80條佬,係個眾數,意思係many many巴打。(睇上面註釋)

佢哋途中去到一個叫到氣多嘅地方,八十神嘅行裝輕便,行得快,見到有一隻裸兔趴喺地下喊。

八十神同兔仔講:「得,唔駛講,明晒,你而家咁嘅身世,聽我哋話,去浸吓氣多呢度嘅海鹽,然後吹吓風,再去高尾山趴喺度啦。

隻裸兔照佢哋講咁做,點知啲海水乾咗,啲鹽黐喺身上俾風吹一吹,搞到皮膚都裂埋,痛到黐肺,佢就忍唔住又趴喺度喊。

呢個時候,大國主孭住八十神啲行李龜速嚟到,見到隻兔喊到咁慘,又問佢咩事啦。

兔仔老點鯊魚圖。咦,又真係有繪師好細心咁幫兔仔畫咗件衫喎。(出處:絵本《因幡の白兎》

兔仔話:「我原本住喺淤岐嶋㗎,想嚟呢個地方,但係又唔知點嚟。咁我呢啲出嚟行嘅,醒目㗎嘛,就老點啲鯊魚,同佢哋鬥叠馬囉。

班鯊魚死蠢,真係吹晒雞浮晒出嚟,一個個排喺度俾我數。我扮晒數人頭咁樣,逐隻踩住佢哋過海,咁就嚟咗呢度喇。

咁我又衰得戚嘅,就嚟上岸嘅時候笑鳩佢哋:『死蠢,你哋俾我呃咗喇,自願俾我踩!』,點知排最後條鯊魚咁喪,突然間衝埋嚟,仲除晒我啲衫!變態㗎佢!

你班兄弟八十神又老點,叫我去浸海鹽同風吹,好撚凍呀!我全身傷晒,我頂唔順喇!痛撚死兔喇!

大國主教兔仔去水口用水沖身,再用水口附近生嘅蒲黃花花粉灑落地,轆啲花粉上身,身體就會回復原來咁樣。

兔仔照做之後果然好番。

佢原來唔係兔,係兔神!

兔神仲同大國主話:「信我,雖然你成個阿四咁,孭住咁多行李,但係八上比賣嫁硬你,唔會SHOW你班兄弟。

果然,同兔神所講一樣,八上比賣真係唔鍾意八十神,嫁咗俾大國主。

大國主你着短褲犯晒規!(出處

呢個就係《古事記》入面講嘅兔神故事。
因幡白兔嘅故事之所以咁出名,可能因為講追女仔夠浪漫,又因為啲角色性格鮮明。

同好多人一樣,我一開始接觸呢個故事,都會第一時間有一種既定睇法,
覺得八十神蝦細佬,又老點隻兔仔,抵撚死啦你哋娶唔到老婆、白兔衰呃人、鯊魚會報復、大國主好心有好報,娶到靚老婆。

但凡神話/童話都有啲教育意義。咁不外乎係嗰啲「唔好當兄弟係阿四」、「唔好講大話」、「要樂意助人日行一善」、「唔好踩鯊魚」之類。

不過,《古事記》係皇室下令編嘅書,真係咁簡單?

一齊用以下方法,咁樣睇《古事記》嘅兔神故事,可能有另一種完全唔同嘅睇法。

★唔係白兔咩?點解變咗裸兔?

原文從來冇寫「白兔」兩個字,而係寫「稻羽之素菟」。
菟者,兔也。
素兔,周作人譯本係寫「赤裸無毛的兔子」,睇埋個故事,兔仔俾班鯊魚除咗衫,梗係赤裸啦。
吹多句,甚至隻兔仔係咪白色都冇人知,可能係灰兔、黑兔都唔定㗎喎。
(我屋企兩隻兔都有一黑一白啦~)

介紹番,右邊白色嘅,個名叫仆街仔,左邊黑色嗰隻,個名叫旺財(試吓搵佢對眼?)。係,你冇睇錯,係仆街仔同旺財。兩隻都已經去咗彩虹橋,享年8歲同10歲。有啲掛住佢哋。

★嗰啲唔係鱷魚咩?點會變咗鯊魚?

原文係寫「和邇」,讀「わに(WANI)」,現代日文直譯係鱷魚,不過喺好多地方嘅方言,わに都係指鯊魚,品種應該係鱷鯊。
當然,史學家都嘈緊係咩魚,我就覺得,咩魚都好,解讀背後象徵性嘅意義比較重要。

★八十神咁衰㗎,咁樣老點隻兔!

今次要幫八十神翻案。
八十神叫兔仔做嘅事,原來係一種「禊」,即係祓除儀式。
再講簡單啲,即係我哋講嘅,「用碌柚葉沖涼」。

大家仲記得伊邪那歧由黃泉國敗走番嚟之後,第一件事做咩?
咪就係洗走啲衰氣囉!
佢去嘅地方係阿波岐原,用海水清洗污垢。
個儀式係:裸身浸完海水清淨身體,先至可以上山參拜。所以會吹風兼靜吓心咁啫。

★既然係個儀式,點解隻兔話會傷晒皮膚,又喊到咁慘?

咁天氣凍浸海水,真係唔係個個頂得順,成身鹽又真係會乸住乸住好辛苦。
不過以前啲人做海水禊,個個都係咁㗎啦。
八十神呢班老江湖,見兔仔初嚟步到,其實係想幫佢,點知隻兔咁唔捱得啫,又怕水凍,又怕風吹,仲要喊晒。

而且,以前啲儀式,一做就做7日,即係兔仔要連續浸7日海水連吹風,頂唔順都好合理。
而八十神男人老狗,除衫浸海水呢啲嘢小兒科啦,做慣㗎啦。

★鯊魚咁變態,除人衫都有嘅?

按上面嘅解釋,又可以幫鯊魚翻案。
個儀式係要赤裸去做,所以既然兔仔到咗目的地,初嚟步到,入屋叫人入廟拜神,就幫佢手除埋衫,等佢可以去浸海水做海水禊。
(除衫之餘有冇做其他嘢,就任憑想像)

★鯊魚俾兔仔呃喎,真係咁好心?

鯊魚係想報復嘅話,就唔會除兔仔衫咁簡單,食鬼埋佢啦。
而且真係咁大仇口嘅話,都唔只係排最後嘅鯊魚郁手,應該係所有鯊魚齊齊圍佢啦。

你估鯊魚真係傻的嗎?話明鬥叠馬,得兔仔一隻走出嚟,就知成件事只係一個藉口,兔仔係想過海就真,所以根本就冇介意過係咪俾兔仔呃,仲送兔仔過埋海上岸,幫埋佢除衫去做祓除儀式。
鯊魚係好人嚟㗎!

睇吓啲鯊魚嘅表情係幾咁善良?眼神係幾咁誠懇?可愛いいいい!(出處:繪本《いなばのしろうさぎ》

★咁兔仔喊咩啫?

係囉,兔仔喊咗兩次,喊咩啫?
第一次喊,俾鯊魚除咗衫,覺得好委屈又羞家。
第二次喊,頂唔順皮開肉裂嘅祓除儀式。

咁睇法,兔神你又真係自己攞嚟嘅。
後生仔,食得鹹魚抵得渴,又係你自己要渡海、又係你自己呃啲鯊魚,然後又要求救,又頂唔順斯巴達式嘅儀式,係咪咁玻璃身呀?
喺兔仔最慘嘅時候,大國主出手,兔仔梗係覺得佢好人㗎。

所以做人要做大國主,唔好做老江湖八十神,睇定啲先行動,出個最好嘅主意俾人,自然會得人心。

因為呢個故事,大國主喺日本同時係一個同醫學、農業有關嘅神。

★大國主嘅沖水加花粉療法真係有效?

大國主直情係大國手啦!有效到爆!
上面提到,浸海水係一個海水禊嘅祓除儀式,唔係咁易頂得順。
大國主見兔仔捱唔住,所以提出咗另一種祓除儀式,就係淡水禊。

原文係咁寫「今急往此水門、以水洗汝身」。
水門,即係有水出嘅地方,內陸有水出嘅地方,可以係井、湖,但係提到療效,更加可能係指溫泉。

蒲黃,係中藥嘅一種,花粉有止血、化瘀嘅功效。蒲黃一般生長喺淺水嘅池、沼附近,咁喺溫泉附近有蒲黃,都好合理。
兔仔俾身上嘅鹽同風吹到皮開肉裂,去溫泉沖洗身上嘅鹽,再用蒲黃治療,堅係有效嘅。

★既然又未必係白兔而係素菟,咁「因幡之白兔」呢個講法點嚟㗎?

咁唔通講明「裸兔」咩?
啲家長點同小朋友講睡前小故事?

因幡,讀「いなば(INABA)」,原文寫「稻羽」,讀音同因幡一樣,相信係同音字誤傳。

★兔神即係咩神?

兔,日語讀「うさぎ(USAGI)」,同音漢字可以係「宇佐歧」,亦即係宇佐神,又或者係屬於宇佐呢個地方嘅一個部族

兔神嘅預言係,大國主可以成功娶到八上比賣,仲可以打敗兄弟八十神,所以後世覺得,兔神一定係姻緣神,同埋有求必應嘅神。

即係咁,如果兔神嘅預言係咁準,佢又預唔到自己會俾人剝光豬同埋皮開肉裂嘅?
古惑吹神就真啦。


講到呢度,回顧番劇情嘅重點。

渡海、上岸、海水禊祓除儀式、男人、除衫、浸落海、上山參拜。
個劇情好似有啲熟口熟面?

可能你仲記得呢個故仔:
宗像三女神~日本最早女子偶像組合~

宗像三女神田心姬守護嘅沖之島,咪就係有咁樣嘅儀式囉!

「沖之島沖津宮大祭」,只準宗像族男人入島,上山之前要除衫,喺海水潔淨。

點解兔仔頂唔順海水禊?點解佢俾鯊魚除咗衫會覺得好羞家然後喊?
種種原因指向一個,就係故事入面嘅白兔係兔女,佢完全冇做過呢種只有男人可以做嘅儀式。
於是,大國主提供另一種溫和啲嘅淡水禊祓除儀式俾佢。
而八十神並唔知道兔仔住嘅地方,女神係唔比女性做呢啲儀式,就建議佢跟傳統做法潔淨。
成件事咁就解得通。

假設兔仔係兔女,佢唔識海水禊都合理。CV:八ッ橋きなこ(出處:戦国プロヴィデンス

★兔仔嚟自沖之島,有咩根據?

睇番我嘅參考書講咩。
兔仔話過,自己本來住喺「淤岐嶋」,日文讀成「おきのしま(OKINOSHIMA)」,有史學家話係「隠岐の島」。
《諸神流竄 — — 論日本《古事記》》嘅作者,哲學家梅原猛覺得,係「沖ノ島」先至啱。

沖島/沖之島=意思係海中嘅島。
日本大大話話都有幾十個叫沖島嘅島,又點可以指定到係宗像三女神嗰個沖島?

《古事記》咁樣寫過宗像三女神嘅誕生:
「此三柱神者胸形君(宗像)等之以伊都久三前大神者也。…(略)上菟上國造。下菟上國造。,伊自牟國造。津嶋縣直。遠江國造等之祖也。」
「上菟上國造」「下菟上國造」嘅「菟」字,亦都即係兔。

《日本書紀》係咁寫:
「即以日神所生三女神者,使降居於葦原中國之宇佐島矣。今在海北道中,號曰道主貴。」
三女神下凡,係降落喺宇佐島(うさしま),亦係「兔(うさぎ)」同音

唔係淨係睇字源,梅原猛親自去過沖之島考證,體驗過「沖之島沖津宮大祭」。

沖之島一帶嘅海域大浪,水性幾好嘅人都會拋到暈船浪(如果參拜嘅人喺上島之前近過女色,女神仲會令個海再大海啲www),到咗沖之島之後,會浸海水潔淨,然後再去沖淡水洗走身上嘅鹽,吹乾身體之後穿過鳥居,上山上面嘅沖津宮參拜。

成個過程就同兔仔經歷嘅一樣,《古事記》呢一段「因幡之白兔」,記錄咗一個儀式嘅轉變過程。


總結吓今次嘅故仔先。
兔仔唔單止利用咗鯊魚對佢嘅信任,又錯怪咗八十神玩鳩佢,仲詛咒八十神娶唔到八上比賣。

你仲會唔會覺得「因幡之白兔」係個浪漫故事?
仲覺唔覺得兔神係戀愛神?

自己做錯咗,就猛咁話人哋錯;又被害妄想,以為個個都要整死佢,好人當賊辦。

想搵人笨,但係又衰無知、冇常識,去到人哋嘅地方,都唔知咩叫入鄉隨逐。

今次兔神嘅啟示,大概係,想搵人笨,唔該自己唔好咁笨。

搵人笨者自笨之。逃犯條例真係踩到應一應。

完!!!!!


聽完故仔,而家睇多次呢張圖。
大國主嘅表情,真係好似望住個傻仔咁…

<預告!>仲有後續!

大國主大冒險,喺稻羽之素兔之後,先至正式開始。
精彩預告包括:
★大國主抱得美人歸,竟招殺身之禍!
★兄弟反目成仇!立誓!殺.大.國.主!
「你幫我哋挽鞋㗎咋,搶我哋條女!」 (設計對白)
「國家可以唔要,條女我哋要硬!」(設計對白)
★大國主絕地能否大翻身?

<個預告係假嘅>


★關於參考資料

好耐以前有人話想聽因幡白兔嘅故仔,但係因為我唔見咗N年前買落至勁嗰本參考書嘅中文版,一直都搵唔番個故仔要點講。
好在!全能嘅GOOGLE神幫我搵番本參考書喇!
神々の流竄 (集英社文庫) | 梅原 猛 |本 | 通販 | Amazon
(多謝名古屋仁久堂嘅店員姐姐,好快幫我搵到呢本書。我當時超開心嘅表情連我自己都未見過…)

原來我當年買咗本咁勁嘅書…

日版、中譯版(簡體)都係絕版書,我自己買嗰本中譯版(簡體)又唔知塞咗去邊(我屋企係黑洞),我連書名都唔記得,好在GOOGLE神幫到手~

寫呢篇文嘅時候,喺網上搵到呢本書嘅中譯版(簡體)PDF,令我終於整理番個故仔。可惜呢本嘢嘅中譯本(簡體)其實係大陸譯文,啲中文都係奇怪同超錯譯,好在買到日版,可以睇番原文。(其實當年我買呢本中譯本嘅時候,雖然已經入U,但係未入日語系,未識睇日文,仲喺歷史系發緊瘟。)

有興趣睇呢本書嘅中文版嘅話,可以喺呢度嘅文字版:
諸神流竄 — — 論日本《古事記》/梅原猛
(已轉換繁體,但有奇怪字體及超錯譯嘅中文,完全唔得閒執番好,亦都唔打算執)

大家有興趣嘅話真係可以睇吓呢本參考書,作者仲喺中津宮搵到以前大祭嘅舊相,係一堆漁船護送祭祀船嘅情況,就好似兔仔踩住鯊魚渡海一樣。入面仲講咗好多民族遷徙嘅觀點,可能同古時日本打高麗敗陣有關,講得太遠了,大興趣可以自己睇。

呢本書入面有更多有關日本神話、歷史嘅不解之謎,而梅原猛自己立論完、論證完,過咗幾年又自己推翻咗。例如,好多人認為出雲地區係日本神話體系所在之地,但係梅原猛認為,根本就係後來嘅統治者夾硬喺修書嘅時候,將日本神話中嘅神「流放」咗喺出雲,原本日本神話嘅地點,可能喺更加東方,咁樣「流放」日本神,統治者就可以將自己嘅政權立於正統地位。後來梅原猛今日的我打倒昨日的我,批評自己以前亂咁估。

呢位個名同佢本人一樣咁猛嘅學者,有行動力、有尖銳批判精神,除咗歷史,仲有研究大自然與人類嘅關係、研究佛教、基督教喺日本嘅發展等等。
梅原猛喺今年(2019年)1月過身,享年93歲。
我後悔太遲了解佢,最近買番佢其他書,但係都未有時間睇。

堅係完!!!!

聽歌聽故仔~(畫到大國主咁靚仔)

Originally published at www.plurk.com. May 13, 2019 23:43PM Last edited
多謝噗友成日捧場!歡迎點唱(?)~




伊死講故仔

諗到咩講咩

伊死

Written by

伊死

冇得救的聲優迷。 冇得救的香港迷。靠爛到不行的日語搵食。前某日漫公司總編,好勇咁炒老闆魷魚,點知老闆一個月後都唔撈。商業著作有:《腐女子的日語 工口50音》(「錫巴斯陳欣」名義)。《澳門日報》不定期專欄作者(「醫神」名義)。

伊死講故仔

諗到咩講咩

More From Medium

More on 廣東話 from 伊死講故仔

More on 廣東話 from 伊死講故仔

罩一罩,世界更美妙~

Mar 21 · 4 min read

312

More on 廣東話 from 伊死講故仔

More on 廣東話 from 伊死講故仔

銅記鬼佬薩魯曼

Feb 1 · 10 min read

439

More on 廣東話 from 伊死講故仔

More on 廣東話 from 伊死講故仔

《極主夫道》快撚啲拍日劇啦!

339

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade