呢 10種人,《逆流大叔》唔啱你睇㗎,算把啦!

套戲咁多人話好睇,當然會心郁郁去睇。
有啲人入場之後,發現套戲唔係自己想睇嘅嘢,就鬧爆唔好睇,呢啲人喺香港真係周街都係。

呢啲人可能睇過吓影評全部都讚好,所以入場睇吓。我就貼心啲,話俾呢啲人知,套戲其實唔啱你睇,唔好嘥時間。

以下10種人士,你哋都係唔明㗎喇,我勸你哋都係唔好入場喇。(歡迎推俾呢10種人睇呢篇,歡迎加LIST)

  1. 現充,不分男女。
  2. 鹹魚or老海鮮
  3. 仲係覺得吳鎮宇=𡃁坤嘅人
  4. 覺得入戲院就係要睇「大片」嘅人
  5. 唔鍾意OPEN ENDING嘅人
  6. 覺得TVB CUT《體育世界》係啱嘅人
  7. 覺得唔應該俾錢入場睇TVB演員嘅人
  8. 唔覺得喺香港講普通話有問題嘅人
  9. 唔係叔控嘅人(眾所周知,我係)
  10. 政府官員,講緊求其有個名銜嗰啲

真心,以上10種人千祈唔好入場睇《逆流大叔》,又唔啱睇,又睇唔明,睇嚟做咩啫?好啦,如果你覺得想振興吓港產片,咁梗係好,但係堅係唔啱睇嘅話,唔好鬧人fake你,或者鬧人bad taste、鬧套戲唔知做咩(有啲戲就算係爛片,都可以用爛片嘅角度去睇嘅)。可能係你自己bad taste,係你自己唔知做咩。

我只會話,係你冇晒夢想,你做咗鹹魚,你仲停留喺以前某個年代,你覺得大形勢嘅嘢冇得對抗,你由得自己嘅地方被人侵佔,你又要怨個社會但係又唔去改變,你甘心所有嘢都一成不變,你希望留喺自己嘅comfort zone。

你唔再青春,唔係你變咗中坑,係你個心已經老化,拒絕再青春。

《逆流大叔》,係俾一班個心仲想逆流嘅人睇,上面嗰10種人(or more),你哋唔啱睇㗎喇,算把啦,唔好勉強扮啱睇扮貼地。

成套戲太多驚喜,好多人都講咗,有時間嘅話想入多次場撐多次~


SHIT,我腦人面套緊呢首歌入《逆流大叔》…。原諒我,對我嚟講套戲嘅主題曲,就等如《衝上雲霄 II》嘅情況一樣…(拍額)

成套戲我都鍾意,唯一唔鍾意嘅,係啲歌。明明係隊BAND,完全冇火唔ROCK,我幾乎瞓咗,如果換咗隊BAND就正。可能得我一個咁覺得,點聽首歌同《衝上雲霄 II》嘅主題曲一樣。我期待更加ROCK嘅音樂,結果熄咗火。幻想吓,將《逆流大叔》首歌MIX落《衝上雲霄 II》可能都冇咩唔妥(咪又係吳鎮宇)………