天忍穂耳命──日本賭神必勝秘笈:賭唔一定贏,唔賭一定唔會輸
<日本神話 003>#正勝吾勝勝速日天忍穂耳命 #天孫降臨 #朗基努斯之槍 #大國主 #邇邇藝命 #瓊瓊杵尊 #賭神 #勝利神 # 天逆鉾
好多人覺得日本啲神嘅名,用廣東話讀係特別難讀?
唔好意思,用日文讀一樣咁蹺口巉手。
例如我私人叫佢做「日本真★賭神」嘅勝利神:
正勝吾勝勝速日天忍穂耳命
(マサカツアカツカチハヤヒアメノオシホミミ)
(Masakatsuakatsukachihayahiamenooshihomimi)

正勝吾勝勝速日天忍穂耳命,係天照大神(=陳玉蓮版小龍女)同素盞鳴(=黃秋生)之前「簽約」嗰陣,素盞鳴咬爛咗天照大神信物後,吹出嘅霧氣而生,係5兄弟中嘅長子,所以亦都係天照大神嘅大仔,血統非常優良。
貴為皇太子,可能個名太長,喺《古事記》入面佢個名只係出現過幾次,而《日本書紀》就記載寫做「正哉吾勝勝速日天忍穂耳尊」。都係簡稱叫「天忍穂耳命」啦,或者跟我,叫佢賭神。
賭神之名,唔係浪得虛名,睇個名就知勁。
正勝吾勝勝速日天忍穂耳命
「正勝吾勝(マサカツアカツ)」
意思係「我贏咗喇,贏得非常精彩!」「勝速日(カチハヤヒ)」
意思係「贏要贏到盡,快到你唔信!」
睇吓,連個名都霸氣過人,唔叫佢賭神都唔得。
好似話大叫佢個名,就會沾番啲旺氣,人都醒神啲。
覺得自己唔會咬到痢嘅朋友可以試吓。
分享吓賭神名言:
「賭唔一定贏,唔賭一定唔會輸」

開始講故仔~
<1> 收復葦原中國

話說天照大神當年因為佢驚咗素盞鳴發爛渣,於是匿咗入山洞,搞到世界冇咗太陽,葦原中國(凡間)長久一片混亂。
呢個時候,葦原中國有個靚仔,叫做大國主成功趁亂上位,同佢外父素盞鳴努力搞地產霸權,成為一代大地主。
天照大神想平定番葦原中國,但係又唔知下面咩環境,於是派賭神天忍穂耳命落去葦原中國望吓。
賭神天忍穂耳命遙望吓凡間,發現下面打仗打到七國咁亂。
尤其大國主啲阿哥,嬲個細佬溝咗佢哋條女八上比賣(So99y,八上比賣對靚仔大國主係一見鍾情),得閒冇嘢做就攪吓個細佬刺殺佢,又掘地起高鐵陷阱,又放火燒山,總之烏煙瘴氣。
賭神點睇都覺得唔對路,就番去同天照大神話:「Your Majesty,下面亂七八糟(真實對白),不如都係算把啦(設計對白)。」
潛台詞係:由得班友自己爭崩頭咪好囉,插隻手落去做咩啫Your Majesty。
天照大神望吓賭神,心入面都係嗰句「知你走得快,靠你死得,都係算把啦(設計對白)」,於是派聽聽話話嘅建御雷下凡平定,仲逼大國主讓位。
呢個係日本神話最出名嘅「大國主讓國」嘅開始,後來為咗收復葦原中國搞咗好耐,高天原仲冇咗兩個天神。
諗番起上嚟,賭神天忍穂耳命一早就睇穿晒:「都話咗唔好㗎啦,我有提你㗎喎。(設計對白)」。
唔攪咪冇事囉,由得班友自己籠裏雞作反,不知幾好睇。
戰果:賭神忍穂耳命一個贏晒!


<2> 大國主讓國+天孫下凡
同中國收番香港一樣,收番葦原中國係命運不能選擇之痛。
天照大神知道葦原中國而家係由大國主打骰,派咗兩次天神下凡,要同大國主講數收番笪地。
大國主坐擁成片大地,又妻兒成群,加上佢最勁嘅外父叫做素盞鳴,根本係山寨王,冇必要睬個喺天上面咁遠嘅神吖。
講遠少少先,大國主食咗素盞鳴邊個女?
有睇「伊死講故仔」嘅你都識㗎,咪就係史上最早女團,宗像三女神嘅大家姐田心姬!
果然好識食呀食家~
但係名門正娶嘅係素盞鳴另一個女,須勢理比賣。
喺大國主乖乖地讓國之前,天照大神已經派過天菩比命、天若日子去同大國主講數,但係兩個都拜倒喺大國主家族嘅美色之下,唔肯返上高天原。(證明大國主堅係靚仔!)
到最後,天照大神唯有派火神死前留低嘅男神建御雷去平定葦原中國。建御雷本身係伊邪那岐直系嘅神,對大國主家族嘅美色免疫,而且又好打,係個超級真男神,靚仔都要企埋一邊。

雖然大國主知自己已經冇運行,同意讓國同埋隱居去出雲,但係都開咗個條件:就算冇咗葦原中國咁大,都要有番個碧桂園級數嘅地段,起番一堆豪宅,至少夠佢180個老婆同班仔女住。
賭神天忍穂耳命暗自搖頭,「唉,都話㗎啦,搞咩呢?啲神又跟咗大國主,又要割地賠償。咁咪輸晒囉。(設計對白)」
點都好,天照大神收返葦原中國,都要搵個醒目嘅人去管嘅,佢第一時間諗起精甩尾嘅賭神天忍穂耳命,希望賭神天忍穂耳命可以代替大國主。
因為其實原本葦原中國一帶,係由賭神天忍穂耳命管治嘅,唔知係因為天照匿埋咗一輪,定係原本賭神天忍穂耳命都冇咩興趣玩Age of Empire,後來搞成七國咁亂。
賭神天忍穂耳命聽倒天照大神話要俾番笪地佢,立時後退一步,鞠咗個90度嘅鞠躬禮。
「Your Majesty,權勢於我如浮雲,我鍾意嘅係過程,唔鍾意執手尾。但係皇兒我都想Your Majesty你可以安心嘅,(設計對白)」係喎,賭神天忍穂耳命係當年天照同素盞鳴「簽約」嗰陣生嘅5個仔之一(仲係太子),唔怪得古古惑惑呢方面似足老豆。「我介紹我至Fit至聽話嗰個仔俾你吖?有晒Your Majesty你嘅優良血統。(設計對白)」

於是一手推咗自己個仔邇邇藝命出去。
「嚟~!NiNi乖~叫嫲嫲~聽靚嫲嫲話,去葦原中國做坐館。(設計對白)」
「Yes, Daddy~I'll be the man.(設計對白)」Said Ninigi.
邇邇藝命(ににぎのみこと),係賭神同栲幡千千姬命個仔,亦即係《日本書紀》寫嘅瓊瓊杵尊,全名係 「天邇岐志國邇岐志天津日高日子番能邇邇藝命」。
個名咁長咪玩啦!仲長過佢老豆天忍穂耳命!
通常佢Daddy賭神都係叫佢做「邇邇藝」,讀音好可愛,讀「Ninigi」,係咪易記咗好多呢?佢死後葬咗喺「可愛之山稜」,連個墳嘅名都可愛過人。
貴為天照大神個孫,天孫就係咁降臨大地,成為葦原中國嘅新話事人,開創咗日後天皇紀元。
戰果:又係賭神天忍穂耳命一個贏晒。佢個仔仲做埋新世界的神。
賭神故事故訓我哋:慳返啖氣啦,搞咁多嘢。

講完故仔,又係時候旅遊推介:
朝聖要去鹿兒島!
有咩好睇?
去睇朗基努斯之槍!
乖乖聽話嘅邇邇藝命,帶咗支朗基努斯之槍…Sor呀上咗腦,係「天逆鉾」先真。NiNi帶住「天逆鉾」落葦原中國,好快平定咗亂世,開始咗天孫統治大地嘅新紀元。
呢支「天逆鉾」,而家仲插咗喺鹿兒島高千穗峰上面。真係可以上山去睇吓呢支天逆鉾㗎!

去睇坂本龍馬放閃之地!
N年後,有個叫坂本龍馬嘅傻佬,同老婆新婚旅行,拍拖拍到去鹿兒島嘅霧島神宮,放閃交換情信不特止,仲喺信上面提到,一齊拖手仔上山睇朗基努斯之槍www
相傳霧島神宮就係NiNi天孫降臨嘅地方,所以好值得去睇。拍拖都要拍得咁浪漫,我信坂本龍馬係情聖!
推Medium上旅遊文:
賭仔必去旅遊推介:去太郎坊宮拜賭神!
太郎坊宮有超過1400年歷史,由滋賀嘅東近江市坐火車,喺「近江八幡駅」出發,去到太郎坊宮本殿,再行742級石梯上去後面嘅赤神山,先至可以真正去參拜賭神忍穂耳命。嗯…呢條路線大約用兩個鐘頭左右啦。至攞命都係742級樓梯,不過為咗拜賭神,鬼叫你窮呀…。
原本你見倒「天忍穂耳命」個名有個「穂」字,都知道佢係農業神,原本名嘅意思係「高天原上面生命力頑強嘅稻穗」。唔知幾時開始,日本人相信,忍穂耳命係個保佑倒旗開得勝嘅神。就連太郎坊宮個官網都寫住佢係個「勝運之神」,別名又叫「正勝之神」。
你話你唔賭,有咩好拜?
咁佢保祐嘅範圍都幾廣闊嘅,例如比賽必勝(出親手要有十成把握,仲唔贏晒?)、生意興隆(個仔係天孫喎,打跛腳唔駛憂啦)、考試合格,大病可以快啲好番。甚至,如果你同天忍穂耳命一樣,享受人生嘅話,佢都會保祐同道中人。


賭神都會俾人火燒後欄
講真嘅。

奈良吉野山嘅勝手神社一直供奉天忍穂耳命,傳說有超過2000年歷史,係全日本28間勝手神社嘅總本山,靈力自然好勁。
喺2001年,位於奈良吉野山嘅「勝手神社」就俾人縱火,於是賭神都要敗走,被搬咗去附近嘅「吉水神社本殿」暫時頂住先,唔知幾時先至可以歸位,陰功。
大家去開奈良都不如去吓吉野山,去晒勝手神社同吉水神社添吓香油,希望勝手神社可以早日重修。
本文原於
2015–2–3刊於個人PLURK :https://www.plurk.com/p/kqc5qn
2015–8–7刊於個人PLURK:https://www.plurk.com/p/l58g83
My Medium Record:(Update中)
https://medium.com/@ishi014/my-medium-record-e1f290f9c470
每月月頭會將部份上月免費文章轉做會員限定文章。
<伊死講故仔>日本神話系列:
<001>桃太郎~日本最早英雄神=最強暗器~
<002>宗像三女神~日本最早女子偶像組合~
<003>日本賭神必勝秘笈:賭唔一定贏,唔賭一定唔會輸
<004>月讀 — 雌雄莫辨非男也非女
<005>兔神的啟示:食得鹹魚抵得渴,搵人笨者自笨之
<伊死講故仔>中國神話系列:
<001>真偽娘觀音姐姐:見證佛道Cross Over
<伊死講故仔>中國歷史系列:
同朕Check吓:關於《超時空男臣》<上>袁崇煥大將軍冇可能同小李子李進忠咁老友的八卦
同朕Check吓:關於《超時空男臣》<下>袁崇煥與謀臣SO GAY的八卦
順手睇埋吖~
個人BLOGss~
☆伊死的漫畫特區 (講漫畫、讚漫畫)

