泰禾財困盡見監管漏洞，收購戰展開、小保民受害
投資大師霍華馬克斯(Howard Marks) 係反思金融海嘯發生成因的時候，曾經用「競相比爛」（只着重銷售賺錢，漠視背後的風氣同埋法規要求，越做越差）一詞形容貪婪而漠視風險的華爾街投資銀行家。將高風險的投資產品賣比投資人，你唔做的話人地都會做，大家「競相比爛」為咗賺錢互相競爭。產品的品質越嚟越低，但評級越來越高，最後造成災難。次按同雷曼爆煲，引發骨牌效應。
以歷史為鑑，今次泰禾財困，母公司連1.2億人民幣嘅債務都還唔到，「賣仔救母」發生的機會好大，泰禾人壽的保戶又點算呢？想當初筆者見呢間公司大灑金錢宣傳，推出高保證回報的儲蓄計劃（4%，預繳保費更加有5.15%），筆者收到好多朋友有興趣或者了解緊類似計劃，自己嗰陣時都有疑惑，無風險的短國債嗰陣時回報都係得一厘幾，長債都係兩厘幾，點樣做到「保證」4厘/5.15厘呢？兩個可能，一係就係承擔高風險，一係就係蝕錢。
有趣的係，財困的公司大家反而爭相收購，「競相比爛」，理論上低回報高風險，陷入財困的保險公司越有人有興趣，提出不合理的天價去買香港保險公司，究竟原因何在？收購對投保人來講有咩影響？
答案係，原來係借香港保險監管嘅漏洞去「圈錢」、Cap 水。紅色資本借關連交易（母公司同子公司或者公司同大股東之間的交易），將保險公司嘅錢買好多同大股東有關嘅資產或者佢旗下嘅唔知隔幾多重嘅公司嘅錢，間接用平錢幫有財困嘅大陸公司。但呢啲公司可能債務危機深重，發債分分中10幾20厘都冇人肯借，偏偏就利用監管制度嘅漏洞將香港保險公司當提款機，之後嘅結果大家都想像到，通常都係「一去無回頭」。
咁你話，咁香港嘅監管機構唔理架咩？佢哋就容許呢啲事係佢哋眼底下發生？
可以話係，亦可以話唔係
點解咁講呢？因為香港嘅監管機構係用定期檢查嘅方式檢查相關交易，但係通常都係事後先發現。發現咗咁點呢？咁當然要「填氹」啦！所以之前收購富通的九鼎集團，後來被收購保險業務的時候都要承諾畀返攞咗的錢，對方先完成收購。
所以只要呢一個內地公司收購香港保險公司關連交易的監管機制一直唔變，財困的公司永遠都可以用呢個機制當廣大買保險的保民嘅錢係提款機，出咗問題之後就期待有人用更高嘅價錢收購。而市場亦都睇到呢個漏洞，樂於收購，「音樂（收購漏洞）未停止的時候大家繼續跳舞」，繼續競相比爛，製造更大嘅泡沫。音樂幾時停止，冇人知道。當有一日規例收緊時，就係呢啲出天價的人爆煲嘅時候。
便宜莫貪，係好似好吸引的Offer嘅情況之下，大家更加要留意背後嘅風險。最好都係搵穩陣嘅大保險公司投保。因為大型保險公司財務比較穩健之餘，亦都係關連交易上面受到《上市規則》第14A 所限制，要求上市公司關連交易涉及到市值某個比例的時候必須以公告方式作出披露，重大利益嘅事項必須股東批准，而唔係好似細公司咁樣成個過程都係黑箱作業。投資者可以睇到嘅時候，亦都對保戶更有保障。
今次分享到呢度，之後再分享。
Arthur
保險解決師
本文為保險解決師創作，未經授權，請勿轉載。本文內容只供參考，保險解決師對任何人因使用或誤用任何信息或內容，或對其依賴而造成的任何損失或損害，不承擔任何責任。保險解決師為 AIA 的業務員/代理人。在這個網站所表達的是我個人的聲明或意見，並非當然代表 AIA 陳述意見。
