【派錢】1萬蚊點拎最著數？投資/消費點先最精明？
聽日(21號）就係登記攞政府1萬的消息啦，你準備好未呢？就住呢個消息，同大家分享唔同機構的優惠。而大家攞到錢之後，買野消費又好，展開投資大計亦得，係策略同心態上，究竟有的咩地方要注意？今日同大家仔細「解謎」。
相信大家呢段時間唔多唔少都有睇下銀行有咩優惠，以下可以分享截至而家呢刻，究竟有邊一啲大家可以多啲番意下：
滙豐 — 最大機會中有價值獎金獎品
對於一係唔抽，一抽就要抽到好野的你黎講，有1個月10%港元儲蓄年利率，上限1萬（即$83）。另外，合資格客戶亦有機會獲得1萬元（30個名額）、iPhone SE 128GB電話（60個名額）或蘋果iPad Air 256GB平板電腦（20個名額），獎品份份大，岩哂「一係唔中，一中就要好野」的你。用滙豐流動理財或個人網上理財登記，仲有4次抽獎機會添。不過要記得8月31號前登記，9月17日或之前成功攞到錢先合資格。
相關連結：https://www.hsbc.com.hk/zh-hk/campaigns/cash-payout-scheme/
Citibank — 最大獎金
用網上理財登記現金發放計劃，可即賺68港元現金獎賞，仲有機會抽10萬。幸運的「一位」得獎者一注獨贏10萬，金額最大，岩哂「以小博大」的你。新登記客戶透過手機銀行遙距開戶，仲可以額外賺$500，只需將5萬元轉戶半年就得架啦。
相關連結：https://www.citibank.com.hk/chinese/banking/cash-payout-scheme.html
DBS星展 — 攞到錢又做到善事
你可能會話，優惠固然好，但如果想「兩者兼得」，幫到自已又幫到人，又得唔得先？得，聽到你的需求啦。星展銀行推出雙重優惠，只需要係9月30日前透過星展網上或流動銀行登記，就有三個總值50元的電子印花。如經活期及儲蓄帳戶進行指定電子交易，仲有高達150元電子印花。慈善上，每1萬個以星展戶口登記領取政府現金發放計劃的客戶，星展香港將會向膳心連基金捐贈1千個食品包予有需要的家庭。幫到人自己都開心啦！
相關連結：https://www.dbs.com.hk/personal-zh/deposits/accounts/gov-cashpayout
投資/消費點先最精明?
不過，可能大家攞完錢之後，包括筆者自己，都心思思諗緊點用。究竟係洗左佢呀，定係儲起佢或者做投資呢？其實作為一個為客戶規劃財富的財務策劃師，其實兩種方式都可以。但無論你點決定都好，都可以留意下面的小貼士，咁樣做決定果陣，就可以做得更好。
選擇投資理財的你
如果你係想大展拳腳投資的，恭喜你，你有正確的投資概念。而家係全世界中央銀行（央行）都印銀紙的情況之下，紙變得唔值紙，「Cash is Trash」，貨幣變得「虛無」，只有係消費「交易」同埋之投資資產價格大跌的時侯，先發揮到「撈底」趁低吸納的作用。
係呢個前提之下，資金長線投資，先可以保住購買力，令你的財富長遠增長，跑贏通脹。若果投資經驗不足，奉勸千萬唔好亂咁聽推介、「攞冧巴」。投資路上，最好「先求知再投資」，呢個世界唔會一直靠運氣可以一直贏。「輸錢皆因贏錢起」，最好就係買的穩陣的投資項目，例如追綜市場的指數基金（如盈富基金）或如果覺得自己心態上未必能夠承受股市的波動，亦可考慮部分資金擺係一的平穩增長的美元儲蓄保（尤其最近「港區國安法」的爭議，你懂的），分散投資係股票和美國國債，賺取5–6%複利回報，起碼跑贏好過一半以上的散戶。
適當的財務策劃，雖然唔係一夜致富，但亦可以比缺乏規劃有更好的財富增值的作用。凡事謹慎，以「不要損失」為本，唔好當政府派的錢係天跌落嚟，因為，「錢只會去最重視佢的人」果到。
選擇消費的你
哈哈，選擇消費的朋友，睇到呢到，又唔使灰的。始終我地平時做野咁辛苦，都要平衡現在的需要同為將來投資。「適度消費」係「絕對」無問題的，只需要留意以下幾個重點，你就可以放心消費：
1. 需要為主，解決問題
消費前，最重要的係，先了解自已係唔係「真係真係真係」（重要的事講三次）需要果樣產品或者服務。一部用幾年的電視機定係一餐大餐，邊一個更加可以長遠發揮提升生活質素的作用。相信大家都有各自各的價值判斷。如果分唔清呢兩者的分別，就較難擺脫消費陷阱，離財富增值愈來愈遠。
2. 配合優惠，取得折扣
你可能會話，我明你意思，但香港人工作壓力甘大，尤其係今年疫情殺到，唔通有時偶爾獎勵下自已都唔得咩？事先聲明，我係唔反對的，我自己最近都有買下名牌獎勵下自已。不過，即使你決定左，亦都有的「精明」的做法，可以用更抵的價錢，買到同一樣野。例如名牌店OUTLET，或者限時優惠，一般都有折扣，想買心頭好的朋友可以去留意下。而最近各大信用卡公司為左刺激消費，都有簽帳回贈優惠，大家可以查詢相關詳情，賺回贈慳錢。（利申，唔係鼓勵大家「先洗未來錢」，係特定情況先做，平時自控能力低的朋友，都係用現金好）說穿了，就係提醒大家做個精明消費者。
3. 制訂預算，了解收支情況
好的財務管理的前提，係要有好的收支紀綠，等自已了解自已的財務狀況，可動用的資金比例，從而可以更有效咁制訂預算去買心頭好，而確保自己有能力負擔。如果係呢個情況下消費，即使想買的野未必同賺錢或者工作相關，將來無錢攞番都好，都問題不大。如果消費對工作有用，例如造西裝或者進修裝備自己，對將來事業發展或者收入或者人脈有用，屬於有回報的消費，咁就更好。始終，最好的消費同投資係應用係自己身上，對自己將來有用。
希望以上的資訊同分享幫到你，相信你睇完之後，都會有更好的決定點樣好好利用呢一筆錢去做消費或者投資。如果大家睇完之後，有的咩諗法或者意見，歡迎留言同我交流。期待你的意見同想法。今次分享到呢到先，我地下次見。
Alphaman
保險解決師共同創辦人
財務策劃師學會會員
