【國安法】對你的保單以及對保險公司有咩影響？

上星期五（5月22日），各大媒體突然引述「權威消息」，全國人大即將討論將「港版國安法」以基本法附件三形式直接在香港實施，「一石擊起千重浪」，引起巨大迴響。中央決定「落重藥」，係中央的角度黎講，《中華人民共和國憲法》第三十一條，「國家在必要時候設立特別行政區…制度由全國人民代表大會以法律規定」中央同特區係一個授權關係，收緊、放寛甚至取消，都係由國家決定。國安法直接係《基本法》附件三實施，因為基本法第18條規定，涉及國防、外交，及不屬於香港自治範圍內的事務。全國性法律於基本法附件三內直接在香港實施，無需立法會審批同埋本地立法。

分析員指出國安法同移民搜尋登上熱搜，相關度達99%，表示大家因為呢一件事而產生移民嘅意欲。另外，作為財務策劃師，我亦收到好多朋友查詢關於投資策略（因為市場恐慌、期指大跌）同埋保障理財相關嘅查詢🔍

今日就簡單剖析一下在呢幾方面需要注意的地方。

緊急法會唔會對保單有影響？

大家必須認知到，香港實行普通法，內地實行大陸法，係一國兩制最大嘅分別之一。好記得舊年社會運動高峰嘅時候，特區政府引用「緊急法」訂立《禁止蒙面規例》。當時，保險業聯會及保險公司先後發聲明，指出《禁止蒙面規例》對香港保單有效性並無影響。

肯定的係，中央放得風，基本上一定去馬。全國人大將緊急法定係議程第五項，通過冇難度。不過具體如何實施，細節仍然未有，六月時先會出台。一般黎講，睇唔出此法對《合約法》係保單在香港的有效性有何影響，始終，國安法會唔會要求到保險合約失效或者保險公司唔履行合約，雖然話「never say never」，但機會應該係低的。

我比較擔心的係，會唔會因為觸犯國安法而被納入不保事項，而被保險公司拒絕賠償呢？如果觸犯條例，出現傷亡，甚至槍斃，受唔受保單保障？例如，意外保險就不保障非法行為的受傷和死亡。呢個問題相信等細節出台先有「確實」的答案，但可以參考的是，舊年社會運動「721事件」及「831事件」業內資深人士的解釋，意外如非令自己「刻意處身危地」或不知道事情係果度發生，賠償機會係較高。

另一邊箱，人壽保險係一個人即使犯法死亡，亦受保單保障。因為普通法看待原則是「人命無價」，不受彌償的限制影響，所以除左一年內自殺不賠的「自殺條款」或者係投保時有「重要事實」（影響投保申請結果的資料）冇申報，法律原則下，理應得到賠償。

緊急法會唔會對保險公司有影響呀？

如果外資撤資，會唔會有可能影響到（外資）保險公司呢？

問得好，根據香港法例第41章《保險公司條例》，保險公司需具有充足的償付充足率比率（Solvency Ratio，即保險公司的資產減負債後，流動資金除最低資本比率的比例），監管機構規定，保險公司至少有150%嘅儲備金。理論上，保險公司的財務應該係穩健的（但「紅色資本」收購的風險較高，詳參我另一篇文章《泰禾財困盡見關連交易監管漏洞，收購戰展開、小保民受害》）萬一真的有撤資的問題，撤資問題應觀察哪些是外資公司，哪些是中資公司，哪些是港資公司。因為外資公司撤資機會較高，國內公司大家亦見識過財困企業（如九鼎集團、泰禾控股）的情況，或國企係國難當前的時候要「為國捐軀」，犧牲企業或客戶利益。建議大家慎選公司，挑選大型和財務穩健的公司比較穩妥。

中國保險監督管理委員會2018年《保險資金運營辦法》，國內保險公司的投資方向，通常都只是在國內的股票和債券。相比之下香港的保險公司，投資範圍沒有國內的限制，好多都係環球投資，亦有不同的資產配置（股票、房地產、債券及其他投資），無數的研究和特許金融分析師協會CFA 期刊以清晰指出，環球投資能有效提高回報，並減低風險。所以，香港今次因國安法而增加的市場風險和潛左被外國制裁或評級機構調低評級的風險，相信對環球投資的香港保險公司影響不大。

今日先講到呢到先啦！之後再分享。希望無論將來發生咩事都好，大家都做最好的準備、最壞的打算，迎接未來的新挑戰。

天佑香港 共勉之！！！

Arthur Lam
保險解決師
理財策劃師
認可家事調解員