做聰明錢嘅先決條件

方如玉帥│方卓如

(資料圖片)

馬雲下年退休,即係阿里巴巴唔再需要同股不同權?同股不同權係因為創辦人無可代替,要佢幫公司發揚光大。既然強如馬雲都可以退下來而唔影響公司未來發展,其他例如美團又點解釋冇咗創辦人就世界末日,要同股不同權?馬雲能夠輕鬆退休,證明「沒有話冇咗邊個唔得」這條商業定律,千古不變。

美團同海底撈都在近期招股上市,但近期市況氣氛差到無可再差,是否等於現時招股是自尋死路?未必。正因為而家股票冇得炒,新股反而可以博大霧。隻隻股票你都估計會向下跌,只有新股你唔知頭一日會升定跌。股票市場始終有班炒鬼,唔炒唔知身體好,新股是現在唯一可以炒的股票,所以美團、海底撈這些有名有姓嘅股票,始終有捧場客,入飛,搵餐茶錢。


9月開始大市跌到冇底,究竟是否股災嘅開始?中外都有唔少預測,大多數估大難臨頭,亦有人估好景未完,但只限美股。睇返2009年,當美國開始救市,當時亦有大量預測,估計未來點走。通縮又有,超級通脹又有,大衰退又有,但肯定沒有人估計2009年開始會是美國有史以來最長牛市。這表示,根本冇人能夠準確預測市場,又或者準確預測市場的人根本唔會向外公布。特朗普當選那天,股票跌半日,下半場已經反彈,然後一直升。聰明錢永遠係先做,密密做,然後先出嚟講少少。到做完晒,再出嚟大大聲講。而家港股跌唔停,聰明錢梗係唔會而家先沽。到而家咁多人出嚟講未來市場預測,會有幾準確?

9、10月往往是股市最危險嘅月份,9月一開始就咁悽慘,是否股災嘅前奏?正如2009年所見,人類係冇水晶球,聰明錢只係夠膽早一點落注,贏咗就聰明,輸咗就收山執包袱。

你要做聰明錢,首先練嘅唔係頭腦,係膽量。夠膽落注,係做聰明錢嘅先決條件。


拍手(Clap)讓我們知道你看過/喜歡這篇文章吧 : )
原文載於2018年9月11日信報財經新聞。
【專題】金融海嘯10周年

信報財經新聞有限公司版權所有