《事先張揚》的閱後事件
睇呢到書，就當然係捧 Ivan Li 李聲揚 -君子馬蘭頭 場。埃汾對筆者既影響，係不惑之年系列已經有提過，不贅。咁埃汾出書，當然就會買返本黎支持支持。至於點解唔係《楊枝甘露的誕生》，變左做唔知係《事先張揚》定係好多人以為既書名「一書保平安」，建議讀者去Follow埃汾既Facebook專頁，親自去問下佢。
本人不是貴人，但最近亦的確係事忙，慢慢睇慢慢睇先睇左一半。黎到長假黃金週先有時間可以一次過搞掂埋淨返呢一半，終於可以寫下讀後感。
全書分三個篇章三個求生方向：埃汾自己既成長，到職場，然後就係大家最喜歡既股巿。實不相暪，作為埃汾長年讀者，亦有訂閱Patreon（其實Patreon有冇中文名？Google一下話「合作伙伴」，怪怪地），所以其實好多內容及想法對我黎講亦不算係第一次睇。
第一章「我的求生指南」，差不多就好似睇龍珠咁一集20分鐘用左8分鐘去睇上集回顧咁。但，冇問題既，舊瓶新酒，一樣可以再細味一次。
而第三章既「股巿求生指南」，就大多佢識我我唔識佢，可以學既野就更多，但以我呢啲金融盲黎講，實在難以一次就全盤吸收。不過，因為有訂Patreon，長期睇慢慢吸收下，其實唔多唔少都開始似懂非懂（推薦金融盲訂閱呀下）。不過認真，「我又唔知有幾多股民真係理解股票巿場既本質啦下」。但初學者黎講，淨係睇到四大定律，唔明白都記住佢，其實應該係裨補闕漏，有所廣益。
你見我Skip左第二章，就知我其實想講一講第二章啦。「職場求生指南」，職場呢一樣野就好似足球、溝女、政治，個個都識少少就變左專家。無他，每個人玩過就有經驗，有經驗就會有體會，有體會就會上Facebook、Twitter指點江山。而除左啲二世祖、富二代或者啲浪客劍心定麥路人，大家都要返工，大家都早已進入職場。
然後？然後就有啲文員仔充滿優越感咁向啲一時忍唔住上網呻兩句既企業管理人員教路。指點江山呢家野咁爽皮，又點會係廢老既專利？
當然，唔駛好波過美斯先可以評價（埃汾最鍾意咁講），我亦無意係到評論埃汾既職場求生指南。因為，其實我相信每一個人心入面除左有一坐斷背山，亦會有自己既「職場求生指南」。
但係咪代表唔駛睇其他人既指南？又唔係既。即使你有自己既一套睇法，睇下其他人既睇法，其實係有幫助既，畢竟一個人既經歷有限，但你建基於自己既經驗，去吸收下其他人既意見，可能有野契合令你更加了解自己既諗法，又或者有啲野睇法唔同可以做下思想辯論，一樣野有所廣益。
而我特別想拎出黎提一下既，就係埃汾提到玩遊戲，就要了解個遊戲規則。
講出黎就好似好簡單，但好多人做唔到，點解？遊戲規則，唔同行業、唔同公司、唔同老闆治下，都可能會有分別。但有一點好多人忽視左既，就係呢一堆差異，其實就有一個更大既框架係上面，就係商業法則。
我相信比較多人都係響營利機構打工啦下。基本上就係呢一堆差異之上，無論你叫佢乜都好（ROI又好、商業策略又好、Cap水方法都好），你公司內部既架構、政策、制度，其實都係為左呢一個目標。而同佢他公司、行業有幾多差異都好，其實都係左獲利。
當你目光只能夠維持係自己眼前，你係落石屎既，就只睇到落石屎技巧對自己部門、自己公司、甚至行業既影響⋯⋯which is a peanut。一搵唔到錢，真係話撚知你如何花式人工智能大數據高技術地落石屎。搵到錢，就話之你外判去到孟加拉班友連石屎係乜都唔知但錢已袋。
一個熟悉行業運作或公司商業模式既人去帶領公司，就當然有其優勢，因為佢識既係行業遊戲規則，呢啲就真係隔重山。至於落石屎好叻叻果啲，就要繼續收啲唔識落石屎既老闆錢去落石屎。認真，作為呢幾年係工程師部門入面不停搵人出黎幫手做生意既管理人員，有呢類八重山盲點既技術人員真係佔大多數。
話哂我都係科技業界丫，我都好尊重技術能力高既工程師，甚至係我每年一度向公司解釋點解我地花多啲錢請有能力既人。但你睇闊一啲，睇下一間公司有幾多技術人員？但有眼光既技術領導、有眼光既業務人員，就少好多喇。所以，你話邊樣值錢？仲係唔明既就睇下《事先張揚》入面第二章既「職場求生指南」，應該就會明白架喇。
