「創新自會找到出路」
題係改自電影《侏羅紀公園》裡面，謝夫高拔林飾演既Dr. Malcolm一句貫穿成個故事既對白”Life finds a way”（生命自會找到出路）。
持續兩年幾中美貿易戰，當中關稅部分當然對筆者身處既行業有直接影響，但想討論既，反而係當中有關創新科技既睇法。
不過入正題前，都係想提一提關稅係科技及製造業界既問題。中國輸美商品徵收高昂關稅，其實真係唔係特朗普所講「中國要埋單」，極其量係削弱大陸佬既競爭力，埋單既其實仍然係美國自己。
處境題：你係一個月陪啲客去唱兩、三次KTV既東莞廠佬，砌好既產品成本連利錢$100美元單價一隻賣俾你個美國客人。進口有10%關稅，就當個客叫你負責科水，咁你好自然咪收佢$110。咁關稅加到25%呢？你咪收佢$125咯，而家係你「賣」野嘛，因為佢張單而出現既成本就緊係轉嫁俾佢啦。
所以同理，進口商收到產品，成本多左$15，可以的話就緊係轉嫁落消費者到啦⋯⋯所以最後埋單承擔關稅增幅既，就當然係美國進口商或消費者。
所以話，從科技及製造業，關稅既影響就係削弱大陸既競爭力，無論係直接從中國出口到美國，一話本來在中國完善既供應錬被迫要增加物流及管理成本，送到外國進行最後組裝及出口等等。
唔知道有幾多讀者係有參與創新科技研發，對何謂「創新」有乜野睇法。其實所謂「創新」同「創意」最唔同既地方在於「創新」係指「創造出新既價值」。（咁咩叫價值？$咯）
初創之所以叫初創，點解開間茶餐廳唔叫初創，重點就係「新既價值」，無論係新既Business Model或原有既Business Model應用新既技術去大覆改善產品或服務，研發技術只係手段，價值先係目的。
創新既過程就係為「今日」既「困難」找出解決方法以獲利，而「困難」可以係「問題」、可以係「瓶頸」。所謂太陽底下無新事，好似同「創新」好矛盾，但人類「自古以來」就係要滿足自己既需要，「所以創新者，一路以來都係搵出新方法叫人科水者是也。」
創新既流程：「選題，投資，人材，研發，成果」。
好似好難，但又其實唔難。筆者自問自己係一個頗有能力及經驗既軟件工程師，對軟件架構及開發流程有一定心得，但其實亦不過如此。與真正才智過人既一流技術工程師，真係差左何止十萬八千里。但，其實呢個世界擁有聰明才智既人好多，唔難搵架，「只要你有錢，你就可以搵到一班才智過人既技術人員，去幫你解決你想解決既問題。」
美國矽谷乜野人都有，印度、中國、以色列、乜乜乜人物物物人，其實就係咁之嘛。
所以大陸目前多個科技領域既技術能力落後於美國，亦係不容否定既事實。簡單來講，過去幾十年人類科技登展一日千里，資本同人材都匯聚係美國，Let’s say，矽谷。而科技策略本身既命題就係「搵最有著數果範黎做」。既然人地已經有我科水就可以用，咁我就唔會去碰呢範啦。
簡單來講，咪你有modem我咪去做個塔、你做高端我咪去搞山寨，無謂爭飯食有錢大家搵，等等等等。即係華為有Android可用，就自然唔會有鴻蒙。合理既創新策略，大陸本身從來要追既並唔係人地已經有既野，而係大家都仲未有既野。
但而家有人玩串左party，就自然唔到大陸佬唔望下個後欄。但係咪好似本港既政治青講到咁悲觀？本人從來不輕敵，我認為即使鴻蒙今日唔掂左抄右砌，其實長遠發展，有錢就自然有人材，「又有幾難？」
當然想過下口癮既，就當然可以繼續好似網友講恥笑大陸佬係咁叻就一早做左出黎啦駛等到今日一味抄唔駛R&D之類。筆者冇呢種「大陸唔撚掂」情意結，「亦慣性面對敵人時會小心謹慎」。
大陸佬係有啲「發展中國家式」既怪雞野（我成日同啲同事講，同啲鮑魚刷頭做野就要小心啲），係有文化既問題，呢啲筆者都可以算係近距離觀察，唔駛多講。但從高角度去睇，其實冇必要著眼於「今日」既「困難」甚至去write-off，呢啲係早晚可跨越既瓶頸。
筆者寧願按自己對科技創新既經驗，從科技創新大原則既角度去睇。研發、創新以及科技既本質就係要解決「今日」既「困難」。大陸科企投入資源（仲有美國佬最鍾意話中共補貼國家隊等等）去研發或加速剽竊（Well），只不過係一條人類反覆走過無數次既研發創新之路，一定會有或大或小既成果。
都係果句「選題，投資，人材，研發，成果」，多年來也是如此。
我仍然係相信「創新自會找到出路」，一直如是。（所以如果你想大陸佬成世都俾美國佬騎住，就真係要問侵侵一句「你又想點撚樣呢？」）
