實戰！分享內地校園招聘經驗！

最近筆者又一次協助人事部在國內進行校園招聘，面試了一大波（發明呢個講法果條友真偉大）應徵軟件工程師、測試工程師及電子信息處理工程師職位既準畢業同學，同一時間自己團隊又因為「自然的身陳代謝」（淡化加唔夠人工既問題），又面試左好一輪不少國內既有希望新一代。

實不相暪，筆者自問用人要求其實相當高，非常看重「態度」。我地當然唔鼓勵stereotype刻板印象，但自問在國內工作幾呢年間，我就睇到國內無論軟件工程師定項目經理，最普遍而核心既通病就是「批判思維能力不足」。而因為批判思維不足，就會引發好多諸如「死口唔認」、「思想保守」、「為服從而服從」等等既奇難立雜併發症。

剛剛9月底到桂林電子科技大學既宣講及做題，最近HR唔俾筆者用英文宣講了，話上一次在桂電同學們反應不好云云（攝於2019年9月23日）

原因就無謂推敲，反正一講到國內既野，大把友成世人深圳河都冇過幾多次，都可以成篇輪文都寫得出黎甚麼「強國人因為乜乜乜所以乜乜乜」。

筆者只係想分享少少經驗之談，以現實為本，分享實戰經驗。

國內招聘年輕既軟件工程師呢味野，要搵出能力較高，較有潛力陪養出批判思維能力既有希望新一代，其實唔難，唔駛拎本《李天命的思考藝術》問佢思方劍定天人琴。

就用以下兩點篩選，可保你揀到：

1. 畢業於重點大學
2. 英語能力好

相信各位讀者既反應不外乎「關咩事呀？」「我夠知啦。」「咁都得？」（有其他心理或生理反應者，唔該留個言）

廣州大學城之仔仔一堂（攝於2017年3月12日）

唔好心急，無論你覺得聽落簡單或無稽，都有啲智識與技巧可以為你分享一下，耐心睇埋落去。（咁就緊係唔係因為medium改左計錢方式所以先叫你睇耐啲啦⋯⋯嘻嘻）

所謂國內重點大學，即係間大學係咪「985」或「211」。乜野係「985」、「211」，睇維基就可以。反正筆者又唔係國內讀書、又不在學術界內打滾，對985工程及211工程跟本談不上係專家呀下。

唔想睇的話，筆者用兩句講完：就係在90年代初，有一系列約百所大學被納入211工程（21世紀的100所），視為重點大學。1998年5月，211工程中再有39所大學被視重點中的重點，目標為打造成世界級高等院校，就是所謂的985工程。

985工程

211工程

所以，簡單黎講，國內大學分三大等，排名按水平先後：985、211、野雞。

而又，雖然你睇維基話，教育局慢慢淡化及正式中止985及211工程。但你可以放心，內地既HR又好，同學仔又好，睇到間大學第一個問題都係，「係咪985定211大學？」

位於四川省成都巿既電子科技大學，985院校，電子及信息工程在國內俱首屈一指，圖為清水河校區（攝於2016年10月17日）

本人校招曾經到過985大學，平均水平實在是遠超野雞。引用返本人大一時代既宿舎同房：「人地個個行出黎講句野都唔同啲。」（不過當時佢係用黎指出科大GBUS同其他商學院學生既差距）同一份卷既平均分係985同野雞真係天與地。

簡單黎講，我份卷係野雞應考30人，一般會有一、兩個做得好好，三至五個人過得去，其他人就全部0–10分左右。去到985呢？大部份都過得去，唔少人做得好好。

985及211院校既水平去到邊，一般從各種大學排名既指引下，大概係本港排前列既三間大學（唔係仲要拗邊三間掛？）就是在985前列，其餘大學就在985中後段左右。

但，實不相暪，筆者認為呢個指引雖離現實不遠，但套用在校園招聘上也要微調一下：整體985院校既畢業生能力，大致上跟本港前列大學、學科的畢業生能力相約，其餘本科生大約跟211所差無幾。即是，同香港既大學作比較的話，我認為國內重點大學的本科畢業生水平指標，高於院校整體排名。

除左專業學科，思想教育成績比例亦甚高。何輝話齋，「想做得細緻啲」既，不仿面試時問清楚（攝於2016年10月18日）

一來，香港既大學其實都港味濃郁：港味者，精於搵食者也。目標為本、排名遊戲呢啲野，香港既高等院校亦頗為擅長。

二來，筆者見過唔少、團隊內亦曾經有985及211本科生及碩士生，亦見唔少野雞本科及碩士生。我自己所見，大陸畢竟人多院校多，sample size夠哂大，即使院校有自己既強項，但挾著985之名非強項一樣大把友想入，要作比較的話，985甚至211既本科生能力比本港大學要平均得多，唔會好似香港咁科大都會出好多廢青（如本人當年，而家就變左廢老阻新一代上位），即係水平較低者都唔會距離中線太遠。

簡單來講，你入去面試前，見佢CV間大學係211甚至985，就心裡有數條友應該幾好的。如果再寫埋GPA3.5、全班排前20%等等，就多數係相當優秀（正如筆者今日面試完兼出offer果位）。

咁係咪野雞大學冇好野呢？緊係唔係。不過，你知啦，漁翁撒網就當然向大魚群丟過去，正如你溝女就緊係去City。中大冇靚女咩？實有架，不過就少咁左啲要爭餐死咁咯。

又講到英語能力，先提一下，筆者經常被HR質疑我份校招英文卷好多英文字，怕啲有能力既學生睇唔明，錯過左一啲有能力既學生。

而事實上，野雞大學既學生，只要係有能力，跟本睇一睇就心領神會，一樣做到得，更何況，睇唔明既就算過到CET-4都係僅僅過咯。呢一點一次又一次得到印證，好多HR質疑過後疑慮俱一掃而空。

桂林電子科技大學花崗校區，位於深山，不過係幾靚既（攝於2017年11月8日）

基準好簡單，做得到我份卷既就實有CET-4（全國大學英語考試，College English Test），面試時同我講到兩句英文既，就係可以過到CET-6果啲。

再講多啲，高分既CET-6既，IELTS就約6–6.5分。工程專業喎，大陸喎，好好架喇。要講IELTS 7分或以上既，就唔係CET-6定乜，就要去睇更高級既TEM（Test for English Majors）。但其實都在本行都唔多駛理架喇，除左你搵Technical Writer咁解。

咁英文能力又同技術能力有乜關？講過啦，大約就係，大陸啲人能力心態有問題既英文99%都唔掂既。學得好英文果啲（相對），能力同心態都好有保證。不過，好文不仿一睇再睇，筆者誠意推介大家睇多次下文啦。（Okay）

論國內軟件開發人員水平與英語能力的關聯