當初創要買專利
講到專利係有資本大企業既遊戲，咁一啲頗為成功既科技初創公司又如何呢？
又，入正題之前先講一下專利大玩家—IBM。
2019年，IBM破紀錄於一年內係美國獲得9262個專利授權，已經連續27年獲得年度第一，自1920年以來前後已經獲授權過140,000個專利。
你可能會問，「乜IBM好有創意咩？點解我都唔覺佢有乜創新產品既？」
重點，拎專利又唔一定係想出產品既，之前亦都曾經講過，行使專利權係一種商業行為，可以用黎「進攻」，例如主動去告人、去排斥對方既產品、搵上門去收「專利稅」授權金；亦可以用黎「防守」甚至用黎「威嚇」對手。所以呢，其實係只有IBM告人，冇人敢告IBM。
除此以外，專利更可以用黎買賣。
冇錯，專利權係可以用黎買賣既。跟據IBM 2019年既財報，2019年IBM既智財專利授權金收入為367M美元，智財客製開發費用為246M，而賣專利既收入為34M。
多唔多？緊係唔多啦，IBM 2019年既revenue講緊77B。
「車，講到咁乜乜乜，原來都唔係好值錢咋喎。」咁講返轉頭，真正值錢既專利，就係會生金蛋既鵝，你會唔會拎去賣左佢？
咁你又會問，有乜野人咁笨會去買啲唔值錢既專利、買啲唔會生金蛋既鵝呢？
Google係IBM專利既大客戶，手上有超過2000過來自IBM既專利，主要就係用黎防守硬件、手機以及作業系統等等。
而其實主要想提既就係Facebook。Facebook係2012年用83M美金從IBM手上買左696個專利。
Facebook行將係2012年IPO前，單係2011年就有22宗專利侵權訴訟。當中比較高調既就有剛剛宣佈要IPO就馬上被Yahoo控告十個專利侵權，其中包括網上廣告系統與方法。Facebook從IBM手上購入696個專利，用意實在非常明顯，簡單來講就係加強自己既武器庫以作防守之用。
今年疫情關係，旅遊業不景氣，但Airbnb仍然想如期上巿。但都話，商業世界係好現實，一切都係講利益架姐，IBM就唔理得你係咪旅遊業寒冬，既然你IPO，我搵你收「專利稅」你又唔肯俾，「一於雪中送屎」，法庭見！
2018年，IBM告Groupon要求賠償83M而最終得到57M和解費。同年，IBM亦曾經狀告Priceline，秘密和解後又用同一堆專去告Expedia，其中更用上1988年有關web application相關專利。
呢一類Web app相關既專利，例如告Airbnb時用到既有關bookmark、single-sign on等等2010年左右既「早期專利」。其實呢例技術今時今日已經廣泛流行，我相信好多初創公司做相類似既網上平台，跟本未入有人認真讀過IBM呢啲係互聯網尚在起步時申請落既專利，覺得「唔通要搞哂全世界？」、「人人都係咁做點會有事？」
「等你做到好似Airbnb咁大，有大把錢賠果陣，你就知道有冇事了。」
一直都話，專利係好講資本既遊戲，初創公司好多年輕有活力追求快速既「管理層」都多數未玩過呢啲遊戲，強如小朱都係後知後覺。
當然，你見好似Facebook係2012年其實已經跟本唔缺錢，你可以話俾人告咪和解費咯。但其實你諗深一層，2011年Facebook俾人告左22單，每單賠幾千萬美金，其實都唔係野少既。而更重要係，專利訴訟有排打，訴訟有結果前被禁止使用該技術而重要係你產品既核心技術，咁你重駛做生意既？
所以你話小朱個八千幾萬美金，快速建立一個專利武器庫，係咪駛得好值呢？
所以有時一啲專利可能冇太大既進攻價值，不能夠賣到好價錢亦不會生金蛋，但當你既公司去到一定規模，尤其人怕出名豬怕肥，人人知你有錢賠既時候，你手上冇一定數量既專利做防守，即使你有龐大既律師團隊，其實輸在武器上仍然係會幾濕滯。
