科技以懶為本:「新一代智能手機在你耳朵中。」
筆者記得自己多年前(準確黎講係2009年),第一次去日本自由行,住係一間位於大阪巿梅田區堂山町既小酒店(印象中間酒店仲係有時鐘既添)。我一個人由關西空港搭列車到達大阪,拎住一份事先打印出黎既地圖,開始對地形搵方向以及問路。
當然,問路係用英文,係人來人往既大阪駅前,並不算有好多回應,而事實上我亦認錯左堂山町既位置(我啲筆跡太「污where」),本來徒步15分鐘左右,就搞左個幾鐘先去到酒店。
今時今日當然係好難想像,大家拎個係飛機上換好左自由鳥SIM咭既智能電話出黎,打開Google Maps就跟本冇乜地方會唔識去。
時間去返2009年,雖然我手上有iPhone 3G,但當年都仲未有甚麼B-mobile、櫻花咭甚麼的,部iPhone係日本亦不過是用黎當相機⋯⋯而其實我當時主要係用一部Olympus既傻瓜機,影出黎都仲要比iPhone 3G既相靚好多。
科技既發展,就係令人類係生活各個部分越來越方便。智能手機及網絡服務既進化,令大家去自由行方便左好多。再上一代,互聯網既出現其實就開啟左自由行既大門,資料搜集再不限於買本「閃閃書」(我第四次去日本自由行先再冇帶旅遊書傍身救命,原因就當然係因為而家「救命」可以用手機)
如果我地從「方便化」去睇,互聯網出現時令我地坐低係電腦前就可以接觸全球資訊;智能手機、移動網絡既組合,就令我地基本上隨時隨地就可以接觸全球資訊。
Siri等等既語音助手,其實就係想改變我地接觸資訊既模式,正如智能手機同移動網絡,其實係一個組合去促成「隨時隨地」。同樣,語音助手其實唔係目的,而係一個手段或過程。下一波,筆者既睇法就係你班懶人連手機都唔駛拎出黎、打字都唔駛,所有野都係齋噏搞掂。(而因此就會有一堆重要技術去解決齋噏時既難處及用戶體驗)
所以呢,Hearable is the new Smartphone;所以呢,唔好再諗甚麼3.5mm,科技公司跟本唔care你點聽歌音色何如。而事實上,一早一街Airpods啦,跟本就冇幾多人care。
小耳機呢樣產品類別,其實已經面臨緊一個進化過程,由聽音樂既工具變成生活用品,呢個趨勢係唔會改變,真無線化係必然既。而因為呢個趨勢,連助聽產品甚至法規都開始消費者化。
當然,你可以懶有野講音質甚麼甚麼,走返去買條有線Shure再落耳模做Custom⋯⋯即係買返一個音響產品,但呢個已經早已唔係Airpods Pro之類小耳機既重點。(又,我屌,你咁講求音質既用乜撚iPhone聽歌姐?)
更唔好講,年初Bluetooth SIG已經公佈LE Audio既Specification,預計2022年Android就會倒入,到時藍芽都可以高清音源甚麼的了。技術會依潮流研發,「科技以懶為本」,今日既問題可能聽日就唔係問題,只要係可以令人更方便既野,早晚會有解決方法。
至於再下一步係咪耳機都唔駛呢?Perhaps。我當然有我自己既睇法,但總之都係一點,「科技以懶為本」。大家恥笑科技公司乜乜乜既時候,其實回頭睇返成個科技潮流,「你真係覺得你識野過添曲?」
望住成個產業及發展,同只望住自己既個人偏好同執著,睇到野當然係好唔同了。
有時啲野,第一步會比較艱難,巿場接受度可能唔高,但佢死而不彊好多時都係有其原因。3.5mm就day 1拎走都好合理。如果只講Apple既話,HomeKit就好有雷聲大雨點少、「死而不彊」既味道。而認真,HomeKit今年又有改進,智能家居可能又係大家恥笑左好耐⋯⋯但你認為佢會死?唔會既,當所以技術或巿場難點都突破左之後,佢又會返黎的了。
因為?連Google、Apple、Amazon、華為、三星呢啲「對手」都早已同Zigbee Alliance聯手「創造一個有錢大家搵」、大家都認為是「對」既共同未來。
(按:筆者自己都唔鍾意用「真無線耳機」亦從來冇買過,兩代都係用Bose既頭戴式抗噪耳機,但亦無礙自己對真無線耳機潮流看好呀下)