《鬼滅之刃：產屋敷耀哉 同 鬼舞辻無慘，邊個先係好老闆？》
注意：所有圖片只用作研究及寫作用途 。
— — —
得，我知，今時今日先寫《鬼滅之刃》，好 out，仲 out過無綫電視。不過，我幾時有潮過？《龍珠》篇龜波氣功喺 2016年先寫好，距離《龍珠》完結差唔多 20年。所以《鬼滅》完咗一年就有呢篇文，算快嫁咧。
我又知人哋已經討論咗三十次呢套漫畫係咪經典。呢啲「乜乜係咪最好、物物係咪可以傳世」，好大程度視乎你點為「最好」、「經典」下準則同定義。連個題都未同意好，點拗？
再者，係咪經典又點？閪臭咪又要舐。對我嚟講，《鬼滅之刃》係一本不可多得嘅漫畫。由頭睇到尾之餘，仲重複睇咗幾次。
當睇第二次時，我心裏開始思考呢個問題：
產屋敷耀哉 同 鬼舞辻無慘，分別作為「鬼殺隊」同「鬼」呢兩個組織嘅最高領導同負責人，究竟邊一個係較好嘅老闆？
— — —
要判定 產屋敷耀哉（下稱產屋敷） 定 鬼舞辻無慘係一個較好嘅老闆，我參考咗幾個網站（見文末），以「團隊組織及人材管理」同「個人能力」兩個範疇共十個準則嚟衡量-
（１）團隊組織及管理
— 團隊目標清唔清晰
產屋敷 ★★★★（最高5 ★）
人如其名、名副其實，「鬼殺隊」嘅目標非常清楚，就係「消滅眾鬼，包括鬼舞辻無慘」。呢個團隊目標亦與產屋敷個人目標、眾鬼殺隊隊員嘅目標一致，眾志城城滅鬼隊。
辻無慘 ★★★
辻無慘嘅團隊目標、亦係辻無慘自己嘅個人目標，主要有兩個，一主一次：首要為「搵到青色彼岸花」，以完成藥物令佢可以喺陽光下活動（後嚟知道彌豆子成功克服陽光，改為「尋找並吸取彌豆子」），次要目標為「消滅鬼殺隊」。
