＊＊＊警告：此文並非嚴謹學術研究，亦冇任何政治立場，請務必以輕鬆心情閱讀。＊＊＊
「來生不做中國人」一句話，可謂萬能key，成日畀人喺不同場合引用，連火星人都識（笑）。呢句話來自鍾祖康同名著作《來生不做中國人》，意指中國人質素太低劣，有得揀、千祈唔好做中國人。鍾祖康呢本書已經重印又重印，印咗好幾十版，證明咗本書好受市場歡迎。
本人今世不幸成為香港人……如果經歷2012–2017幾年動盪仍然覺得香港好好彩，你唔係大地主、就係富二代。
去返主題，來生做唔做中國人，好大程度唔係自己可以控制。控制到就直接改做「來生要做個有錢又有品嘅洋人」啦。
咁假設你轉世投胎，過程同結果完全不能控制，最終成為中國人嘅機會究竟係幾多？
如果機率好高，為怕成為中國人咁一樣不學無術不識抬舉不知廉恥，當然要求神拜佛「來生不做中國人」；相反，中簽機率根本好低，低過阿仙奴拎英超冠軍，使乜怕？
去量化機會率之前，要清楚「來生不做中國人」當中三個概念：
(1)「來生」：你講得來生，無可避免地涉及投胎呢個概念。「投胎」一般建基於佛教嘅輪迴。輪迴分六道、六種境界，由高級（善道）到低級（惡道）分別係：
天道（相當於信用咭中嘅黑咭）
阿修羅道（鉑金咭）
人道（金咭）
畜生道（銀咭）
餓鬼道（普通咭）
地獄道（Yes咭)
上面提到信用咭中黑咭，都有個幾得意嘅都市傳說。話說如果你有張黑咭，可以命令廣東道啲名牌店凌晨三點開門畀你一個人入去揀手袋……相比各個都市傳說（例如黃家駒變咗馬句哥、丁蟹效應），黑咭呢個算幾流。作為男人，我好難想像到有女人睇緊魚樂無窮嗰陣無端端想要個手袋，仲要急到等唔切聽日開門而要動用到黑咭去叫啲瞓緊覺嘅員工開門畀你。你話有黑咭可以叫三哥譚仔凌晨開門煮一碗中辣米線，或者叫銅鑼灣啲仆街的士佬唔拒截，故事嚟得更真實同有說服力囉。
又講得遠咗。六道輪迴，以往不少漫畫都用作角色嘅招式－咸豐年代嘅《聖鬥士星矢》中，處女座沙加嘅絕招，就叫六道輪迴；《火滾忍者》長門用嘅六道忍術，當中嘅六道亦取名於六道如餓鬼道。
