上回提要：
《抗癌記（八）：「我買咗兩手阿里巴巴」》
為確認腫瘤位置及癌症有冇擴散，我去咗照MRI Scan（磁力共振掃描）同PET CT Scan（正電子斷層掃描）。呢兩個掃描係癌症病人最常做嘅檢查，前者主要用作偵測腫瘤嘅大小同位置，後者主要用作確定癌症有冇擴散至其他身體部位，以及擴散去邊。
兩個掃描同一日先後進行，過程尚算輕鬆，難度較高嘅係要一段時間舉高手兼保持同一姿勢，成大半個鐘唔郁得，事後背脊痛咗幾日。照PET CT嗰陣，醫護打完顯影劑，「暖意一剎那傳遍全身」，居然唔使同獨裁者握手都有同樣效果。照嘢嗰兩部儀器，穿梭機咁款、好似好精密，自我安慰畀嗰皮幾嘢超值。
做掃描嗰陣，女友喺診所大堂等我；做完，佢興高采烈同我講：
「啱啱等你嗰陣，我買咗兩手阿里巴巴。」
「吓？？？」我呆咗。
我驚訝程度不下於得悉自己患癌 — 女友甚少買股票，少到十年嚟只係買過五次以內。佢仲要好憎大陸嘢，去超市連大陸菜都唔買，而家居然去買大陸股票。
話說，佢有次終於的起心肝去投資股票，又只想投資香港公司，於是諗住買恒生H-股指數ETF……臨落盤先發現「H股」嗰個「H」係指喺香港上市嘅中資公司，而唔係H For Hong Kong Company……
只係冇見個幾鐘，女友已經買咗股票，此乃一驚；
佢買大陸公司股票、二驚；
買風險甚高嘅科技股、三驚；
買阿里巴巴，四驚 — 阿拉伯原著故事《阿里巴巴》中，阿里巴巴亦係一個偷人錢財嘅賊仔（總不成因為佢偷嘅錢係來自強盜就變成正人君子，否則共產黨都係好人），一間叫呢個名嘅公司點會唔係呃鳩你錢？
更何況，早幾日阿里巴巴旗下「螞蟻今伏」計劃上市（並非錯別字），從來唔抽新股、更遑論借孖展嘅女友，居然借咗球幾去抽！！本來，理論上佢抽到兩手，點撚知「螞蟻今伏」最後一刻被暫停上市，見財化水之餘，女友連息都蝕鳩埋！！！
