上文提要：
《抗癌記（廿四）：又有機會腸硬》
經歷三個月造口袋生活、兩次複診、幾次痛風發作，喺2021年2月農曆年後，我入院進行第二次手術，將造口關閉（即係縫翻埋條腸），重新開通肛門排便。
重溫一下，我第一個手術切走直腸，拉長大腸接駁至肛門，同時喺右邊嘅肚皮同腸整個窿，製造造口排便，等肛門位置有時間康復。
你會問，點解我縫返埋造口，唔使好似第一次手術咁，畀幾個月等造口嗰度康復呢？
原來大腸本身康復能力超強、縫返埋嗰個位好快會康復、一兩日就大致埋口，而第一次手術係大腸接肛門，始終係兩樣唔同嘅嘢駁埋，所以康復時間較長。
最終究竟可唔可以重新用肛門排便，好視乎我第一次手術個接駁位做得好唔好 — 兩次複診教授醫生探肛後都表示「埋口埋得好好，冇問題」。教授醫生講過，萬一接駁位做得唔好，中間有裂縫，重新開通後啲屎會滲出腸，搞到成個身體都係屎，名副其實「一身屎」，要即刻開刀做緊急手術，否則啲器官會畀啲屎醃壞……情形似你屋企條屎渠駁得唔好，一沖水就漏出嚟，成屋傢俬肯定玩撚完。
我睇過啲醫學資訊講癌症手術後康復，總結嚟講，手術成功與否、病人可否康復，通常取決於以下因素：
— 病人年齡：越後生越好
— 病情：冇擴散、腫瘤越遠離主要器官就越易康復
— 醫生技術：做手術嘅嘢，切高、切少一吋可能已經爭好遠
老實講，我對自己能夠重用肛門排便，可謂信心十足。我都算「後生」（其實每次啲醫生話我四十歲叫後生，我都覺得唔好意思）、冇擴散之餘個瘤又喺老練咁遠，加上搵到連行內人都推薦嘅教授醫生開刀，佢做完第一次手術後表示「非常成功」，呢鑊我肯定實食無黐牙。
_____________________
相對第一次手術，第二次手術應該簡單啲 — 起碼張單嘅銀碼細好多（十萬 vs 三十幾萬）。
不過呢，手術前見面，教授醫生表示「一樣要清理腸道，同埋又有機會腸硬」。
