今日想講下五行嘅起源。大家都知道，周易同五行係術數嘅基礎。識應用嘅朋友好多，但係識文獻學嘅相對來講就少啲，唔識文獻學嘅話，會有兩個弊病，一係將術數全部內容放喺同一個平台上面去睇，忽略術數系統係推陳出新，假設左後起嘅現象喺早期已經出現左；二係解釋唔到術數系統入面唔同元素嘅起源，容易倒果為因，或者直頭解釋唔到。
五行係啲乜？大家都知道係金木水火土五種元素，仲有相生同相剋兩種關係。但係大家又知唔知五行出現在先，五行相生相剋在後呢？五行呢樣嘢，春秋時代已經出現左，之後戰國時代先有五行相剋，漢朝先有五行相生，所以呢篇文章主要講五行嘅出現，往後嘅文章再講五行嘅相剋相生。
講到五行，最早提出嘅文獻應該係《尚書・洪範》。
「一、五行：一曰水，二曰火，三曰木，四曰金，五曰土。」
大家可以睇睇五行嘅次序，佢既唔係按相剋嘅次序，亦唔係用相生嘅次序。因為五行最早出現嘅時候，單純只係五種材質，係無相生或相剋呢樣嘢。
《尚書・洪範》相傳係商朝遺臣箕子同周武王講述治國大道嘅文獻，〈洪範〉開頭表明係喺武王登基第十三年拜訪箕子時候所寫。不過觀乎文氣，唔似係周朝初年作品。而《墨子》已經引用左〈洪範〉中嘅文字，我地可以假設〈洪範〉係春秋時代嘅作品，即係話春秋時代已經出現左五行呢樣嘢。
有啲朋友問我，點解五行唔似西方四大元素咁係有風？呢個問題，要從五行嘅本質探討。所謂五行，並唔係單純五種大自然嘅元素，五行一開始係指五樣切合民用嘅工具。
我地講返《尚書・洪範》，《尚書》係五經之一，係古代治國安邦嘅經典。而〈洪範〉係箕子同周武王講述治國大道嘅文獻。當中嘅治國大道，就係洪範九疇，直譯就係大法九章，即係治國大道九個分類。呢九個分類，第一係五行，我地睇下後面幾疇（第二疇至第四疇）：
二、五事：一曰貌，二曰言，三曰視，四曰聽，五曰思。
三、八政：一曰食，二曰貨，三曰祀，四曰司空，五曰司徒，六曰司寇，七曰賓，八曰師。
四、五紀：一曰歲，二曰月，三曰日，四曰星辰，五曰歷數。
五事係講緊君主嘅容貌舉止、八政係經濟民生、五紀係紀時。呢幾樣嘢，無不同政治有關。如果五行單純係五種大自然元素嘅分類，《尚書》嘅作者未必覺得有需要放入去。我地再睇下〈洪範〉講述五行後面嘅文字點講。
水曰潤下，火曰炎上，木曰曲直，金曰從革，土爰稼穡。
呢度係講五行嘅性質同功能。《尚書正義》咁樣解釋：
水則潤下，可用以灌溉；火則炎上，可用以炊爨；木可以揉令曲直；金可以從人改更。
五行嘅性質功能，係同人事有關，水可以用來灌溉植物，火可以煮食，木同金可以製作器具，土可以種植植物。五行同人事有關，仲有其他文獻佐證，例如成書於漢代初年嘅《尚書大傳》咁講：
水火者百姓之所飲食也，金木者百姓之所興作也，土者萬物之所資生也。是為人用。（《尚書正義》引《書傳》）
五行又叫做五材，「民並用之」，說五行為人民所用：
《左傳．襄公二十七年》：「天生五材，民並用之。」
《國語．魯語上》話：
地之五行，所以生殖也。
《國語．鄭語》又話：
故先王以土與金木水火雜，以成百物。
韋昭嘅注釋話：
雜，合也。成百物，謂若鑄冶煎烹之屬。
鑄冶係指鑄作器具，煎烹係指煮食。
點解五行無風？因為古人心目中嘅五行，係切合民用嘅工具，古代來講風嘅用途較少，所以無放入去五行入面。要認識到民生民用嘅一面，先明白五行一開始嘅時候係點來嘅。五行之後嘅發展，先慢慢同民生越走越遠，開始變得抽象，呢個時候先到術數登場。五行同方位、季節、朝代拉上關係，都係之後嘅事。《孔子家語》入面有一段記載，假託孔子嘅說話：
昔丘也聞諸老聃曰：『天有五行，木、火、金、水、土，分時化育，以成萬物，其神謂之五帝。』古之王者，易代而改號，取法五行，五行更王，終始相生，亦象其義。
呢段提到孔子同老子問道，究竟係咪真係來自孔子同老子呢？孔子提到「終始相生」，又話「天有五行」。五行由無「相生」變成有「相生」，又由「地道」變成「天道」，好明顯已經係戰國時代嘅事。
