上一篇文章講到五行最初係無相生相剋嘅次序，相生相剋係戰國同漢朝後起嘅學說。今日講下五行相剋，現存文獻最早提到五行相剋嘅係戰國時代嘅鄒衍。鄒衍係周游列國嘅學者，受到各國君主嘅尊敬，司馬遷話佢「其游諸侯見尊禮如此，豈與仲尼菜色陳蔡，孟軻困於齊梁同乎哉！」不過佢都有運滯嘅時候，《文選注》引《淮南子》話：
鄒衍盡忠於燕惠王，惠王信譖而繫之，鄒子仰天而哭，正夏而天為之降霜也。
呢個淒美動人嘅故仔應該係後來六月飛霜嘅原型，只係大家未必知呢個故事主角係乜水。言歸正傳，鄒衍提出嘅學說，最主要就係五德終始說。所謂五德終始說，就係每一個朝代都屬於五行某一元素，後一個朝代嘅五行係剋前一個朝代嘅五行。《文選注》引劉歆《七略》話：
鄒子有終始五德，從所不勝，木德繼之，金德次之，火德次之，水德次之。
鄒衍五德終始以土為首，木剋土，所以木德排喺土德後面，如此類推，咁就係「從所不勝」。但係大家要留意，鄒衍提出嘅，唔係單純五行元素嘅相剋，五行係要配上朝代先有「德」，所以引文係講「木德」等等，而唔係單單一個木字。鄒衍心目中嘅古代朝代更迭係咁嘅：
五德從所不勝，虞土，夏木，殷金，周火。（《文選注》引《鄒子》）
鄒子心目中嘅古史係以虞朝為首，之後就係夏商周。因為佢係戰國時代人，周朝仲未完，所以排到「周火」就無啦。我地可以簡單列表如下：
而《呂氏春秋．應同》亦有提出五德終始，但係比以上引文詳細得多，除左五行同相應嘅朝代，仲有當時見到嘅祥瑞，去解每個朝代點解配咁嘅德行。我地可以簡單列表如下：
無論係鄒衍定係《呂氏春秋．應同》提出嘅五德終始理論，都係少左水德。學者王夢鷗喺《鄒衍遺說考》指出，鄒衍提出嘅五行相剋係有政治色彩。鄒衍係燕昭王嘅老師，佢為咗鼓吹燕昭王及早稱帝，所以創造咗呢一套學說。燕國喺北面，北屬水，所以鄒衍提出嘅五行相剋次序，終結於水。到底呢套學說係咪為咗燕王稱帝而創造？我唔敢肯定，但係可以肯定嘅係，秦朝係第一個接受朝受五德終始說嘅朝代。《史記》話：
始皇推終始五德之傳，以為周得火德，秦代周德，從所不勝。方今水德之始，改年始，朝賀皆自十月朔。衣服旄旌節旗皆上黑。數以六為紀，符、法冠皆六寸，而輿六尺，六尺為步，乘六馬。更名河曰德水，以為水德之始。
十月屬亥，亥屬水，所以用十月做歲首。一同六屬水，所以數字用六。黑色屬水，所以衣服旗幟用黑色。秦朝用嚴刑峻法，法字從水字旁，所以都係同水有關。
以上係最早提及五行相剋嘅傳世文獻，出土文獻都有提及五行相剋嘅地方。例如《孫臏兵法》：
五壤之勝：青勝黃，黃勝黑，黑勝赤，赤勝白，白勝青。（《孫臏兵法．地葆》）
呢一段講五種土壤嘅相勝，事實上每一隻顏色都係有五行屬性，例如青屬木，黃屬土等等。如果將佢轉換成為五行，就會係咁：
木勝土，土勝水，水勝火，火勝金，金勝木。
《孫臏兵法》入面嘅五行相剋，係同政權更替無關，可能比鄒衍更為古老。講完五行相剋，我地講下古代唔信五行相剋嘅學說，例如《孫子兵法．虛實》同《墨經》都有講過「五行無常勝」。其他有學者將其發揚光大，例如《文子》話：
金之勢勝木，一刃不能殘一林之木；土之勢勝水，一掬不能塞江河；水之勢火，一酌不能救一車之薪。
金剋木，但係一片刀刃唔可以鋸爛一整個樹林嘅樹木；土剋水，但係兩隻手捧住嘅泥土唔可以塞住江河；水勝火，但係杯水唔可以救車薪。《文子》認為如果數量失衡嘅話，五行相勝就唔再成立。出土文獻《閻氏五勝》講得更詳細：
五勝：金勝木，木勝土，土勝水，水勝火，火勝金。衡平力鈞則能相勝，衡不平力不鈞則不能相勝。
水之不勝火，萬石之積燔，一石水弗能勝；金之數勝木，一斧之力，不能闢一山之林；土之不勝水，一絫之壤，不能止一河之原 ；火之數勝金，一據（炬）之火，不能熛千鈞之金；木之數勝土，一圍之木，不能任萬石之土。
是故十火難一水，十木難一金，十水難一土，十金難一火，十土難一木。
《淮南子》亦都有類似講法：
金勝木者，非以一刃殘林也；土勝水者，非以一墣塞江也。
下期我地講下五行相生。
