大嶼山個嶼字點讀？

一路以來都聽過一個講法，關於「大嶼山」個「嶼」字點讀，好多人話讀音「罪」先係正音，讀音「魚」係約定俗成既讀音。之後啲人就會爭論「正音」定「俗音」先係正確，係跟字典，抑或係從俗？我開門見山同大家講，呢種分法係大錯特錯，因為兩音都係正確既讀音，唔存在一「正」一「俗」既分法。

首先講下大嶼山呢個地名既幾種寫法。1866年一位意大利神父繪製既《新安縣全圖》，係寫成「大庾山」；雍正年間修既《廣東通志》，卷十入面係寫成「大漁山」；同樣係雍正年間寫成既《海國聞見錄》，有「大崳山」同「小崳山」兩個地名。

點解有咁多種寫法？咁係因為古代「大嶼山」呢個地名無一個官方正式寫法，「嶼」字可以寫成「庾」、「漁」、「崳」等等。而呢啲字只係通假字，甚至我地唔知邊一隻字先係正字。而咁多種寫法，共通點有一個，就係廣府話既讀音一定係/y4/。

聰明既你應該已經明白，「大嶼山」既「嶼」，同埋「島嶼」既「嶼」，根本係兩隻字，兩隻字之間完全無關係，只係咁啱撞左字形。

我地不妨標記前者為「嶼1」，後者為「嶼2」。「嶼1」係「大嶼山」既專用字，讀音係「庚」，功能係記錄廣東話/y4/呢個音節。「嶼2」解「島嶼」，係記錄「罪」呢個音節。兩者字意思唔同，語音唔同，語源都係唔同。根本就係兩者字，兩隻字都有自己既讀音，兩個讀音都係正確既讀，根本唔存在咩一正一俗呢個問題。

如果大家都係唔明白，我不妨用英文為例，去同大家說明一下。好似tear 呢個字，有兩個意思。解作眼淚，讀音係/ti:r/，係源自古英語既teahor；解作撕開，讀音係/ter/，係源自古英語既teran。

表面上tear喺現代英語入面係得一個串法，但實際上係兩隻字。兩個意思，兩個讀音，而且係兩個語源。tear 呢隻字，大家會唔會話兩個讀音係一正一俗？梗係唔會，因為係兩個字，兩個字分别有自己既讀音。

明乎此，大家就唔會再爭論「大嶼山」係點讀，亦唔應該去爭拗「庚」呢個音正唔正確，又或者去嘈係唔係俗音（或者錯音）。再講多次，呢個唔係咩俗音，因為佢係「嶼1」唯一既讀音，無話正定俗。

我自己本身唔係讀歷史既，更唔熟香港史，我有小小先秦經學既底，希望寫呢邊文出來以正視聽，同時亦想就正於方家，大家有咩補充，歡迎推出。多謝大家。