好多人問我，《周易》應該點樣讀
筆者從中文系畢業都有四五年，由於自己既興趣係先秦古文，讀周易都叫做有啲心得，所以有時都會上吓FACEBOOK講下周易，間唔中由加拿大飛返來香港，又會開班講下周易。除左一啲具體既問題，例如問吓周易某句應該點解之外，我聽到最多人問既，亦即係呢篇文想講既嘢：周易呢本書，應該點樣讀？
簡單來講，讀周易呢類先秦文獻，有兩大方法。第一種方法就係搵晒古往今來所有注釋，以周易為例，漢魏有王弼注，又有本周易集解，去到唐朝又有官方既疏。宋明以下，注本更係汗牛充棟，最出名有朱子既注。去到現代，如果將所有現代既周易注本放晒上書櫃，書櫃一冧既時候，我應該就會比啲書壓死。呢一堆書入面，高亨既注最值得參考。如果將古往今來所有主要既注釋讀一次，對周易都會有個大概既印象。問題係，古人今人都會犯錯，如果某句經文既解釋，我搵晒全部注釋都係錯既，我又可以搵邊個？第一種方法，實際上只係讀緊他人既讀書心得，想要更上一層樓，就要識得自己讀書，搵出自己既讀書心得，制造自己既研究成果。如果想做到呢樣嘢，起碼要具備以下呢幾樣技巧。
一）文獻學
古代無影印技術，先秦到唐朝連活字印刷術都無，古書既流傳，係一隻字一隻字咁抄出來。俗語話，抄都抄錯，如果古書抄錯左，而我地又執住個錯字去解釋，就算解得幾通都係浪費時間。例如《蒙卦．卦辭》：「初筮告，再三瀆，瀆則不告。」漢石經同近代出土既馬王堆帛書，兩個字「告」都寫成「吉」字，「告」同「吉」一字之差，差之毫厘謬之千里就係咁解了。所以一定要清楚所有出土文獻同古代唔同版本既異文，儘量將周易還原成最原始既面貌，周易先可以比人解讀。
二）訓詁學
五經係春秋或以前既古書，用既係當時既語言。周易最遲喺戰國晚年已經有注釋，因為當時既人已經睇唔明。點解睇唔明？因為周易成書大約喺西周初年，西周初年既語言同戰國時期既語言已經相去太遠，一般人無奈睇唔明周易，就要靠經師文士去解，呢啲解釋寫成文字，流傳後世，就係最早既周易注本。以大家熟釋既經文為例。《乾卦．初九》：「潛龍勿用。」好多人誤以為「用」係解作「任用」。清代訓詁大家王引之喺《經義述聞》引用《說文》等多本文獻，去論證「用」係解作「行動」，而唔係「任用」。如果唔重視訓詁學，一味用自己既方法望文生義咁解古書，咁就係六經注我，係對古書既侮辱。
三）音韻學
古人自有古人既語言，古書又有自成體系既通假。如果唔識音韻學，亂咁幫啲經文通假，咁只會離經文本義越來越遠；如果唔識通假，只識用本字本義去解，咁樣同樣係解唔通古書。《坤卦．六三》：「含章。」好多人照本字去讀，將「含章」解成大地「含有文章」。照本字解就好難解得通，「含」通「戡」，有攻克之意；「章」通「商」，係商朝既商。「含章」成句就係指攻克商朝，指武王喺牧野之戰大勝紂王。不單係文通義順，更係符合整個坤卦既主題，就係武王克商既歷史。至於點解可以咁通假法，其實係參考左其他好多古書唔同版本既異文，先知道啲字可以點通假，唔係講下「音近互通」就可以呃到人。
四）通諸經
古語有云：「不通諸經，不能通一經。」以上提左三種方法，就係想擺脫傳統既注疏。識左文獻學、訓詁學、音韻學，就可以開始大量閱讀周易以外既文獻，可以用周易以外既文獻去解返周易，可以提出一啲古人今人都諗唔出既新解。重要既嘢要講多幾次，一般人認為讀左好多周易既注釋就功德圓滿，實際上仲有好多其他睇落唔關事既書可供參考。當你睇到呢啲文獻既段落，你一開始根本唔知同周易有關。我舉一啲暫時得我提出過既新解，通通都有其他時代相近既文獻支持。《屯卦．初九》：「磐桓。」按《儀禮》同《禮記》記載，係婚禮現場新郎帶新娘坐上馬車繞場三周既禮節。《屯卦．六二》：「匪寇婚媾。」按《左傳》記載，係指當時軍隊入侵同古代婚姻聘禮都係好多人參加，聲勢浩大。《巽卦．九二》：「用史巫紛若。」按《左傳》同甲骨文記載，係指古代焚燒巫師來求雨既禮節。
先秦既典籍有好多，但係佢地既作者時代相近，接觸既文化相似。好多周易無詳細講清楚既嘢，都反映喺其他文獻當中。例如有個高登仔寫左篇故，如果五百年之後有人睇返，可能睇唔明屯門站天水圍站係乜東東，如果佢地攞返今日既地鐵站地圖來睇，咁就一目了然。高登故係文學，地圖屬於歷史文獻，但當佢地反映既時代同文化相似之時，就可以互相參考。周易都一樣，好多唔同種類既先秦古籍，似乎同周易無關，但只要有心讀，就連《孫子兵法》都可以同周易互證。但係你讀《孫子兵法》既時候，《孫子兵法》根本無話你聽某段可以同周易互證；當你讀到周易嗰段既時候，周易亦唔識得叫你去搵《孫子兵法》某篇某章某節去同周易互證。唯有多讀書，多睇周易同周易注釋以外既書，先可以讀到周易。
講咁多嘢，我唔單單係想教大家點讀書，而係想同大家講，台上一分鐘，台下十年功。唔好睇少古文呢樣嘢，更唔好睇少讀得通古文既人。一篇考證既文章，可能只係得一百字，但係大家根本唔知作者背後花左幾多心血，睇左幾多本書，先嘔得出呢一百字出來。醫生律師大家識得尊重，因為醫學法律唔係人人都識讀。古文都一樣，欺世盜名之輩一定有，但係擁有真功夫既人唔係唔存在。當大家問周易點讀既時候，有無諗過周易之類既古文研究，同醫學法律一樣有住精妙既體系，無才能（訓詁音韻等等學問），無運氣（遇到好老師），根本讀唔到。最多只可以被動吸收他人既研究成果，要自己去研讀周易，根本係天方夜譚，咁樣同你同我心目中「學周易」係差好遠。所以話，第一要學識尊重識得讀古文既人，第二要知道自己既能力去到邊度。能力高既人盡力傳授學問比能力無咁高既人，能力無咁高既人虛心向能力高既人學習，咁樣呢個世界先可以順利咁運作。
