之前睇到一幅meme圖，同下面幅圖類似，係講阿基米德死之前，同羅馬士兵講「唔好搞我個圓形」，之後就比羅馬士兵殺死左。就咁睇呢個故事幾得意，阿基米德臨死不忘佢既研究，精神上近乎殉道者。
不過我細心諗下，究竟呢個故事係真定假既呢。我喺網上搵到既資料，呢句說話拉丁文原文係Nōlī turbāre circulōs meōs。阿基米德係意大利城邦敍拉古人。敍拉古係由希臘人建立既殖民地，佢地應該講希臘話，所以呢句說話一定唔係阿基米德原句。最大可能係經過羅馬史學家嘅翻譯，所以我地睇到既係拉丁文。
到底邊位古羅馬歷史學家記載過阿基米德臨死嘅遺言呢？答案係無。我都好驚訝，言之鑿鑿，連拉丁文都有嘅名言，居然係無史學家記載過。但係古代有類似嘅記載，最早記載阿基米德之死既，係古羅馬既普魯塔克（Plutarchus）。佢寫過一本歷史書叫《希臘羅馬英豪傳》，呢本歷史書將歷史人物分成一pair pair，一個古希臘人物對應一個古羅馬人物。第十四篇提到羅馬執政官Marcellus，當中最早記載到阿基米德嘅死。
到底阿基米德係點死嘅呢？普魯塔克都話唔埋，因為當時眾說紛紜，佢比左三個版本嘅故仔出來。
一，羅馬士兵攻陷敍拉古之時，羅馬士兵要求阿基米德去見執政官Marcellus，阿基米德拒絕左，因為佢想證明左一個問題先，於是憤怒嘅士兵就殺害左佢。
二，第二個版本無提到羅馬士兵要求阿基米德見Marcellus，只係單純想殺死佢，阿基米德叫佢等陣，一樣係想證明左一個問題先，但係最終羅馬士兵都係將佢無情殺害。
三，第三個講法係阿基米德帶左一啲數學儀器，羅馬士兵以為係黃金，於是見財起意殺左佢。
單睇呢幾段記載，史學家普魯塔克稱得上有良史之才，因為佢都唔清楚阿基米德係點死，佢將佢知道而覺得可信既所有傳說並列埋一齊，留待後人評價，唔會因為只係記載其中一個版本而埋沒左另外兩個版本。觀乎三個講法，雖然阿基米德一樣死得好慘，但共通點都係完全無記載過阿基米德遺言原句係點，普魯塔克完全無直接引用過阿基米德臨死講過啲乜，更加無提過「唔好搞」或者「圓形」呢啲字眼。根據第二個版本，阿基米德甚至「懇求」士兵唔好殺佢住，disturb呢個字眼未免太重，唔合乎史實。
既然古代史學家都無記載過「唔好搞我個圓形」呢啲說話，咁到底呢句說話係出自邊度呢？古羅馬史學家都唔知嘅嘢，後世又點可能知道呢？我只能夠講，呢個有機會係網民嘅創作，喺網絡時代快速傳播。先有Do not disturb my circles，之後再反向譯返做拉丁文。始作俑者係邊個無辦法知道，或者網絡出現之前已經有，我唔想深究。
但係可以反思一樣嘢，有份share呢啲金句嘅朋友，可能反省下自己到底share左啲乜。網絡文化盛行，乜都要速食，乜都要快。但係最基本嘅查證都做唔到，咁樣只會以訛傳訛。我身為一個唔識西方史學嘅人，睇下英文維基都可以搵到以上資料，我唔明普通人有乜籍口去share一啲不盡不實嘅消息。口講要活在真相中，但係自身就做左一個散播謠言嘅人，我覺得非常可悲。
