二十世紀以來，地不愛寶，探險家喺敦煌發現數之不盡既唐代遺書。敦煌遺書以佛教文獻為主，但係都有唔少既詩歌抄本。其中有一個敦煌寫本P2567，係《唐人選唐詩》既殘卷，攞來同通行既〈將進酒〉比對，就發現有好多唔同。敦煌本係咁樣：
〈惜罇空〉
君不見黃河之水天上來，奔流到海不復迴。
君不見床頭明鏡悲白髪，朝如青雲暮成雪。
人生得意須盡歡，莫使金罇空對月。
天生吾徒有俊才，千金散盡還復來。
烹羊宰牛且為樂，會須一飲三百盃。
岑夫子，丹丘生。
與君哥一曲，請君為我傾。
鐘鼓玉帛豈足貴，但願長醉不用醒。
古來賢聖皆死盡，唯有飲者留其名。
陳王昔時宴平樂，斗酒十千恣歡謔。
主人何為言少錢，徑須沽取對君酌。
五花馬，千金裘。
呼兒將出換美酒，與爾同銷萬古愁。
（敦煌本）
通行版本係咁樣：
〈將進酒〉
君不見黃河之水天上來，奔流到海不復回。
君不見高堂明鏡悲白髮，朝如青絲暮成雪。
人生得意須盡歡，莫使金樽空對月。
天生我材必有用，千金散盡還復來。
烹羊宰牛且爲樂，會須一飲三百杯。
岑夫子，丹丘生。將進酒，杯莫停。
與君歌一曲，請君爲我側耳聽。
鐘鼓饌玉不足貴，但願長醉不願醒。
古來聖賢皆寂寞，惟有飲者留其名。
陳王昔時宴平樂，斗酒十千恣讙謔。
主人何為言少錢？徑須沽取對君酌。
五花馬，千金裘。
呼兒將出換美酒，與爾同銷萬古愁。
（《全唐詩》本）
兩個版本一比對，淨係詩題已經唔同。敦煌本係〈惜罇空〉，有婉惜杯中無酒之意；通行本係〈將進酒〉，即係攞住酒杯加杯進爵咁解。
最重要既異文，莫過於千古傳誦既名句「天生我材必有用」，敦煌本入面居然係「天生吾徒有俊才」。我有兩個證據證明敦煌本「天生吾徒有俊才」先係李白原詩。第一，以韻腳來睇，「天生吾徒有俊才」既「才」字，同「千金散盡還復來」既「來」字，以及「會須一飲三百盃」既「盃」字押韻。後人竄改李白既詩句，殊不知連韻腳都改走埋，露出馬腳。第二，根據詩歌，當時同李白一齊飲酒既朋友，仲有「岑夫子，丹丘生」等人，「吾徒」係包括李白本人，以及同佢一齊飲酒既朋友，「我才」只係包括李白自己，明顯係敦煌本更加合理。
通行本既「古來聖賢皆寂寞」，敦煌本係「古來賢聖皆死盡」。可能係後人見到「賢聖皆死盡」太過不敬，所以改成「聖賢皆寂寞」。殊不知李白根本係狂人一名，杜甫既〈飲中八仙歌〉描寫李白係「天子呼來不上船，自稱臣是酒中仙。」李白飲酒既時候，天王老子都無面比，天子召見佢居然可以無力上船。李白自己既詩作〈廬山謠寄盧侍御虛舟〉，佢話「我本楚狂人，鳳歌笑孔丘。」李白自比楚狂接輿，唱歌嘲笑孔子急於出仕，不如自己既放浪不羈仲好。李白仲要直接提到孔子既本名孔丘，喺古代屬大不敬。古人寫到丘字既時候都要缺尾筆，更唔好講喺作品入面直接響孔子全朵。以李白既灑脫，又點可能介意話「古來賢聖皆死盡」呢？後人既改動，完全唔理解李白既性格。
我舉左三個例子去對比敦煌本同通行本既唔同。除此之外，仲有幾個地方唔一樣，唔知聰明既你又搵唔搵到呢？
