最近喺Netflix睇咗幾套港產片，包括《頭文字D》、《龍虎門》、《破壞之王》，又睇咗外國Marvel/DC嘅，包括《奇異博士》、《自殺特攻隊》（呢套劇情貫徹DC系嘅弱智），仲有套驚世「杰作」真人版《龍珠》，猛然醒起香港拍過好多改編漫畫同動漫嘅真人電影。
上網做資料搜集嗰陣，又發現我睇咗唔少港產改編電影（尤其是2000年後嗰啲）。整理資料後，將相關電影分做三個時期，寫咗呢篇偽學術文章。
第一時期：80年代尾－90年代初
《孔雀王子》（1988）（主演：元彪）＊
《紅場飛龍》、《浪漫殺手自由人》（1990）（前者：許冠傑；後者：任達華）
《力王》（1991）（樊少皇）＊
《妖獸都市》（1992）（黎明、李嘉欣）
《夏日情人》（1992）（葉玉卿、李麗珍、莫少聰）＊＊＊＊＊
《超級學校霸王》（1993）－街頭霸王（劉德華、郭富城、張學友、邱淑貞、張衞健、楊采妮、任達華、鄭伊健）【嚴格嚟講，呢套係改編電玩】＊
《男兒當入樽》（1994）（鄭伊健）＊
《破壞之王》（1994）（周星馳）＊
＊代表我睇過。＊＊＊＊＊代表我睇過好多次。
───
呢九套改編真人電影，同恐龍骨一樣咁古老。無四十歲以上恐怕睇唔晒，我都只係睇過當中六套。朋友當中，恐怕只得庫斯克－一個見過電車拖卡嘅 living legend－睇過晒九套。識晒九套，同知道套戲本身嘅原著係乜，已經當你贏。
呢段時期改編電影，有四個明顯特徵：
第一，以日漫為主軸。
上述港產片，皆有對應嘅日漫作為參考對象：除咗係人都識《力王》（同名日漫）、《超級學校霸王》（主要係街機「街頭霸王」），《男兒當入樽》人物設定以井上雄彥嘅《Slam Dunk》作參考，《破壞之王》廢人男主角為溝女學打拳係參照刃森尊嘅《破壞王》－女主角鍾麗緹個樣同原著有95%相似，扣咗個5%係爭咗原著女主角對波。已經無乜人識嘅《妖獸都市》係來自同名既咸濕兼陰森嘅日漫《妖獸都市》。
《紅場飛龍》、《浪漫殺手自由人》呢兩套較冷門，其實同樣參考池上遼一嘅《淚眼煞星》（註）－任達華扮火野村窯，形神兼備。而《夏日情人》，係參考將桂正和嘅經典《電影少女》嘅「(1)錄影帶裏面條女走出嚟(2)幫男主角溝女(3)然後同男主角唔覺意相愛咗」呢條橋照搬。
