失敗者嘅自白
其實我從來都冇學識過任何語言
2000年，正值新舊世界交接之際，大家開始有 ICQ，電腦可以睇到新聞，可以收發電郵，又有得用地產網頁睇地圖，係一個資訊爆炸嘅年代，係 big bang 嘅起點。嗰時我由日日去圖書館揾書睇，逐漸進化，變咗得閒上網睇資訊型文章，連圖書館都懶得再去。當時嘅網絡世界有啲咩呢？Google 仲未係咁盛行，而我主要係用 Yahoo 同 Altavista 揾網頁睇嘅。嗰陣發現原來網上除咗英文之外，仲有好多各種語言嘅資訊，有啲語言係要喺 menu 度轉編碼 (encoding) 先至睇得到嘅。我嗰陣諗，呢度十幾隻語言，如果睇得明晒，應該真係會好型。於是學語言變咗我短期嘅人生目標，而我就開始揾方法，學一啲我冇乜興趣，又冇乜機會用到嘅語言。
大家都話學語言成功有兩種因素，第一就要勤力，第二就要面皮夠厚。我再望下自己，我面皮就厚過死讀書嗰班人，三唔識七嘅（只要唔係靚女）我都夠膽搭嗲；勤力嚟講我起碼可以一個星期抽兩三個鐘去讀書，自問已經非常上進。事後回想，當然好清楚呢啲通通都係誤判，成日以為自己所有性格特質都係中上水平，而事實上無論係毅力抑或溝通能力，都只屬包艇之列。但係當初嘅誤判，令我定咗一個而家都覺得戇居嘅目標：我要入大學之前學識講七隻語言。七隻語言唔係好多，廣東話、英文、普通話，已經三隻。只要加埋日、法、俄、拉丁，就已經夠七隻。學多四隻，easy job 啦。我唔知道究竟要幾咁不知天高地厚，先至會定得出呢啲咁浮誇嘅目標。
過咗將近 20 年，我依然係未做到。
要知道全香港咁多醒目仔，咁多人學語言，但係流利七國語言嘅人，一百個都唔知有冇一個，可想而知呢件事並唔簡單。你諗下要揾個流利英文嘅都唔易啦，仲要識多額外五隻喎？不過年少氣盛，對於一個未升中三嘅後生仔而言，冇咩係做唔到嘅。於是我真係試盡一切方法，上堂、睇書、聽歌、睇戲、抄寫、背詞表、學文法，基本上你諗到嘅方法我都試過。之後我失敗咗至少10次。即係話至少有十隻語言，我嘗試過學，擺咗好多時間落去，搞咗一大輪，最後係完全學唔識。而只要你不斷同一班熱愛語言嘅朋友傾偈，你就會發現其實有唔少人，都同我一樣，有啲語言學咗好長時間，硬係學唔到應有嘅水平，投入嘅時間同回報唔成比例。曾經去到某個位，我覺得啲 polyglot（學識好多語言嘅人）根本就係天賦異稟，啲方法根本完全唔可以相信。
點解要睇呢個系列？
成功嘅方法來來去去都係嗰啲，但係失敗嘅方法非常多。而大家係有需要知道用錯咗失敗嘅方法，到底有咩結果。乜嘢方法會成功呢？點樣做會失敗呢？其實最成功嘅人未必會知道。因為學一兩隻語言而成功嘅人，一定做咗好多唔同嘅嘗試，而試過嘅咁多樣嘢入面，邊樣得邊樣唔得，佢哋未必會知。整理出嚟嘅成功元素，甚至可能係最毒嘅山埃貼士嚟。如果俾我以成功者嘅姿態寫文，我一定會將自己嘅努力擺喺第一位，因為噉樣睇落最型吖嘛。但係要真正推介學習嘅方法，係要搵出乜嘢會導致失敗，然後等大家去避開，所以只有不斷重覆各種方法，不斷失敗嘅人，先至知道乜嘢方法死得最快，乜嘢方法對情況有改善，點樣判別成功人士啲貼士係堅定流。喺學語言呢方面，由我定咗嗰個黐線目標之後，我就不斷嘗試，喺失敗次數方面，我諗都有返咁上下代表性。慶幸咁多次嘅失敗，對我並唔係太大犧牲：神農氏嘗完百草可能會毒死，但係用錯方法學語言，最多都係無效，應該唔會有啲咩永久腦損害，唔會死人嘅。
當然你都會質疑，就係點解我要睇一個失敗者嘅自白呢？我嘅學語言旅程我諗就同一眾毒撚嘅愛情經驗差唔多，成功率好低，可能成世人只係得過一兩次，但係啲一做即衰嘅嘢，可能自己都做緊而不自知。
進入正文之前，俾少少劇透。
點解咁多人學極都唔識？
因為學，係唔會識嘅。
