我朋友想學廣東話,應該點樣教佢?

有人話「廣東話我瞇埋眼都識教」。我諗睇完佢就未必咁大口氣

利申1:由 2008 年開始,我斷斷續續噉教廣東話,教過個人、亦都教過大班,好希望可以喺度同大家分享我嘅淺薄嘅經驗。希望大家睇完以下嘅注意事項同建議,可以幫到身邊嘅朋友學識廣東話。
利申2:我知道任何時候講廣東話嘅嘢,都會有人挑戰我話正確嘅名係粵語、白話、廣州話、廣府話⋯⋯之類。名有個慣例,叫「名從主人」。香港講粵語嘅人口叫自己嘅語言做廣東話,我哋就要尊重返呢個叫法,唔可以拎住廣東省嘅省界就去挑戰大家對自己嘅認同。如果要執到咁緊,下次食廣東菜、粵菜,記住問人點解冇潮州打冷。

香港有 700 萬人口,但係全職教廣東話嘅教師,可能得雙位數。得咁少廣東話教師,結果大部份外地人嚟到,就算冇俾人水咗去學普通話,都好可能因為揾唔到合適嘅廣東話老師已放棄。

大家可能會覺得,「唏,廣東話我由細講到大,瞇埋眼都識教啦。」

講大家可能真係瞇埋眼都識講,我都係。但係教,就算教咗十年八年,都應該仲有好多嘢要摸索。教語言係好專門嘅學問,如果你由細到大喺香港讀書,有上過英文堂,應該都感受到教語言有幾咁吃力不討好。你試下諗諗你當年鍾唔鍾意上英文堂?十幾年英文堂學唔學得識英文?試想像下你而家要做當年教你英文嘅老師,只不過:

  1. 教嘅科目由英文變咗做廣東話
  2. 你嘅學生唔係小學生中學生,而係(記憶、模仿力都慢慢退化嘅)成年人
  3. 你冇教師用書、亦都冇人準備 Lesson Plan 俾你
  4. 你有咩唔識,冇得上 TESOL 相關網頁問人
  5. 你由細到大都未學過廣東話嘅 grammar
  6. 唔識英文大個會揾唔到食,而學得廣東話嘅學生一般都冇呢種壓力

我諗大家都大概明白到教廣東話嘅難點喺邊嘞。如果有朋友真係想學,想揾你教佢,應該點樣準備呢?無論你準備收返學費定係做免費推廣員,我都好希望你知道下面嘅嘢。唔係叫大家每人都讀返個 degree 先至開始教廣東話,只係有好多嘢大家需要知道。

第一步:訂立學習目標

目標分析

喺開始教同學任何語言之前,雙方都要理解對方嘅學習動機同目標。知道對方點解要學廣東話,非常重要。有個講法係,教師嘅職責唔係教一啲自己想教嘅嘢,而係教一啲學生想學嘅嘢。好似喺日本或者韓國教廣東話,好多時學生會係香港文化嘅 fans,佢哋同廣東話嘅接點,可能係張國榮、周潤發、劉德華,甚至係點心、風水、腳底按摩;亦都有啲係想喺香港傳教,要學識用廣東話講耶穌;仲有一啲係另一半係香港人/廣東人,想學識廣東話同外公外母/老爺奶奶溝通。學嘅原因會影響到你教嘅內容、教學方法,所以一定要問清楚。

期望管理

學一隻語言,冇乜幾多個係諗住永續學習。大家都係想喺指定時間入面,達到自己心目中嘅目標。如果你第一日就同學生講,「我學咗廿年英文喇,你睇我啲英文幾廢?所以你廣東話都要學廿年㗎。」睇怕你都未必要上第二堂。口語方面,如果只係想應付日常生活嘅簡單對話,例如買嘢食飯之類,其實係相對低嘅要求,如果方法正確,應該唔使一年半載就可以做到。如果要深層啲嘅,例如要睇得明香港嘅電影、聽得明大學嘅 lecture(香港有一間大學可以用粵語教學,大家估下係邊間)、可以喺工作上用到廣東話之類,噉就要多啲時間。如果有計劃長期喺香港居住,識聽唔識睇會係好大嘅障礙,所以要同時考慮引入漢字同書寫語言嘅教學。聽講讀寫每一方面都好,都可以參考返 CEFR 框架下嘅分級,決定相應嘅目標。喺香港,一般嘅廣東話學習者好多只係希望口語去到 A2 水平(即係 IELTS 3 分嘅水平);學漢字嘅,識幾百個已經好有滿足感。聽落呢啲目標可能好可笑,不過做到嘅目標先至係好目標吖嘛。對方開初幾咁雄心壯志都好,都唔好要人一步登天,不如就設一個低少少,易達到啲嘅 check point 俾學生。

語言背景

教師仲需要理解對方嘅語言背景。如果學生本身識漢字、識任何一種漢語、越南話、日文、韓文、泰文⋯⋯佢哋嘅學習速度會快好多。不過唔好因為對方本身識普通話,就輕視學廣東話嘅難度;同樣唔好因為對方只係識英文就覺得冇可能做到。一切都在於你嘅學習目標點樣設定,定得啱嘅,學生嘅能力就會一步一步提升;定得太急,就會趕客。

第二步:工具

無氈無線神仙都難變。唔好以為教語言係兩個人坐低喺 starbucks,每個禮拜傾兩句對方就會唔知點解識講。要教一隻語言,要準備好多架生。

首先講講啲攞唔到上手嘅工具。

拼音系統

如果你教嘅係幼稚園學生,口耳相傳嘅方法冇咩問題。我講一句你講一句,聽多幾次就模仿到。但係大人嘅聽力開始退化,一啲母語冇嘅音素,耳仔好難區分。所以啲非聲調語言嘅人會將「我今日教咗個女學生」講成「我今日搞咗個女學生」,元音唔分長短嘅人會將「我喺街」聽錯做「我係雞」。加上大家嘅記性未必咁好,冇方法記低個音,唔通下下都用諧音咩?

喺你想教廣東話之前,唔一定要學過語言學,但係最起碼要學識一套拼音。可惜廣東話嘅拼音系統仲係未統一,街外常見嘅拼音系統有「耶魯式」、「教院式」、「饒秉才等式」同「LSHK 式」四種,而且每種都會有各自嘅變體。大家要因應教學書去用適當嘅拼法。《粵典》同埋教育局嘅網頁用嘅係 LSHK 粵拼,而香港各間院校嘅粵語課程都已經(或者將會)全面使用 LSHK 粵拼,希望大家可以跟隨。

至於粵拼點樣學呢?睇住呢段 YouTube 先,其他學習策略遲吓再介紹。

聲調手勢

粵語係有六個聲調嘅語言,就算學咗好耐嘅人,都未必咁易清楚噉區分得晒。但係教學嘅時候如果要用口講「啱啱呢個係第一調,然之後係第三調」,其實都幾費時失事。《Cantonese for Everyone》教科書入面有一套聲調嘅手勢,熟習咗之後,學生就可以形象化到個聲調。喺學新詞語或者更正發音嘅時候,就好啱使。

跟住係一啲實質嘅工具。

字音 /詞典

揾單字讀音可以睇「粵音資料集叢(http://jyut.net)」,入面結集咗好多本唔同嘅字典列出嚟嘅字音。

《粵音資料集叢》 結集咗好多本唔同嘅字典嘅讀音

揾粵語詞,可以用粵典(要 Facebook 登入)。粵典提供大量粵語詞條,有粵粵、粵英嘅解釋。

https://words.hk/zidin/v/90602/hea/hae

教科書

留意返用英文寫嘅廣東話嘅教科書,初級嘅多,中高級嘅極少;針對普通話人嘅教科書呢,進度會好快,而且着重講一啲粵普嘅不同,有時會教得太深入,而唔係教緊學生需要嘅內容。

我唔打算喺度逐本列舉,不過揀教科書有幾點要注意。如果教科書用嘅拼音系統唔太方便,有一個方法係自己重排再用,但係好嘥時間。另外可以用超過一本教科書,因為就算係同一個課題,每本書嘅學習重點都未必一樣,同樣嘅學習重點又會有唔同嘅例子。

教學圖片

正所謂「有圖片有說話」,圖片可以引導學生去講特定嘅課題。拎住一張圖,可以講到好多平時好難接觸到嘅課題,亦都可以練習平時對話難啲用到嘅句式。

呢啲圖可以喺 https://www.aakanee.com/ 揾到

第三步:心態

唔好一味教拼音

我明白大家好希望啲學生「打好個底」,所以會用好長時間做發音練習、拼音訓練。長遠嚟講我哋當然希望學生睇住粵拼可以聽得到、讀得出每一個音,同埋可以靈活運用拼音系統。實行上,除非學生嘅悟性極強,否則就算你練幾多次,佢哋都會受到自己母語嘅書寫系統影響。始終溝通先至係學語言嘅最根本目的,學呢啲工具對大部份人而言係悶到九彩嘅事。提供教材嘅人(即係你)要有準確嘅拼音,但係唔好諗住用一兩個月 drill 個學生。將啲拼音知識慢慢滲入去成個課程,係更加穩妥嘅做法。

切忌追求「絕對正確」、「絕對地道」

無論係發音、用字,定係句式,學習者都冇可能短時間內做到絕對正確。所以如果有啲音難發嘅,唔好急於更正;如果某啲詞學生容易發錯嘅,避開佢先;地道嘅講法,如果太難學太難記,避開咗佢先。

所以有好多人拎起啲教科書(英文、日文、普通話⋯⋯) 都會話,「唓,一般人都唔係噉樣講嘢嘅」。我會話,係㗎,一般人真係唔會學教科書噉講嘢。但係要學得識,中間要有過程。要學識咗點樣用最簡單嘅方式,令人哋聽得明。所以初級嘅教學係會盡量用簡單嘅詞去達到溝通目標,而唔係用啲最長最絕核嘅方法去 impress 其他人,亦未必係最地道嘅講法。

教廣東話唔係淨係教粗口

唔好成日以為廣東話啲粗口真係咁博大精深。一個有正常智商嘅人,啲粗口聽幾次就會識講,唔使專登揾個廣東話教師去教。你睇,YouTube 片都有啦。

第四步:實際教學

而家科技先進,有好多嘢唔應該嘥時間喺上堂嗰陣做。聽錄音、睇短片就當然可以喺屋企做啦。記生詞都有唔少工具可以做,例如 Memrise / Anki 等等。有機會再介紹。

不過如果咁多嘢都可以喺屋企自己聽自己睇,噉面對面嗰時可以做咩呢?當然要有少少課程設計。

課程設計

就算對方係諗住長住香港,都千祈唔好話即場再諗教啲乜。用教科書比較簡單,好多都係預你用大概 2 至 4 個課時去學一課。如果要自己設計,噉就要花多啲心思喇——初學者可以用嘅詞語、句式都有好大限制,要多少少時間去舖排。

如果你係 Glossika fans,你應該會好想用 grammar point 去設計你嘅課程。不過除非學習者係語言發燒友,否則係唔會 handle 到太多 grammar point。所以針對一般人,你需要考慮嘅係情景。亦即係按照你之前問過嘅背景資料、目標、期望,去揀選一啲有用嘅情景放落去課程入面。然之後按照需要加入可以教嘅語法重點。注意呢度講嘅「語法」唔係講「small clause」「relative clause」「topicalisation」呢啲咁抽象嘅概念。教學上,呢啲語法重點可能係個別單詞嘅常用句式,好似「我想(動作)」、「我想要(物件)」已經係兩個語法重點。

課堂活動

每堂嘅設計要睇下你有幾多時間。當然最好就係每堂都短短哋,但係經常見面。具體點安排唔喺呢度講,都係傾閒計(唔好超過五分鐘)、練習舊內容、介紹新內容。

無論係練習定係新內容,都可以用以下嘅方式進行。至於幾時用邊樣,比例點樣,就睇你自己點樣安排。

傳統做法:讀生詞(老師一次,學生一次,然後老師提供簡單例子)、讀課文/對話(一句一句跟讀、然後學生輪流朗讀)、文型練習(指定文型,置換內容)、漸進式擴張句子(練習長句)。

互動學習

講明先,其實傳統做法好多人 buy,所以用任何互動方式之前要注意學生接受度。一般亞洲學生未必習慣咁多互動,但係唔互動又好難學得識。
  • 【看圖對話】俾一啲冇對話嘅漫畫學生,等佢哋用已經學過嘅生詞、句法去完成對話。
  • 【角色扮演】設定情景,然後俾學生互相交流(或者同老師交流)。例如學習數量嘅時候,就俾學生去用假錢做買賣,學問路嘅時候,就揾大家分別扮成本地人同旅客去問路。
  • 【揾資訊】用遊戲嘅方式俾學生揾出某啲隱藏資訊。例如喺學習「時間詞」嘅課堂,我就會同啲學生玩「妙探尋兇」,要佢哋揾出 某某人 喺某日某時某地 做緊啲乜。
  • 【即席演講】俾少少時間學生準備好詞彙,然後用一分鐘左右講出完整嘅諗法。(練習連詞運用、組織力、同埋喺詞彙貧乏嘅情況下嘅表達力
  • 【預備演講】學生準備物件或者經歷,上堂嘅時候同大家分享。

如果一班人噉上,仲有大量遊戲可以玩,好似「講完一句,拋豆袋,接到嗰個要答」、「超級無敵大電視估物件」、「輪流揭生詞咭,抽咭者要將上一個人講嘅句子改少少去用咭上面嘅詞」,如此類推。所有嘅互動方式來來去去都係兩類目的 ① 用廣東話解決問題 ② 練習某種特定句式。

其中一個換咭遊戲嘅指示。有啲句式,好似「每個人」「直到」呢啲,喺呢個階段佢哋未學,所以會用英文寫。指示入面亦都有指定嘅句式,叻啲嘅學生會自己發揮。圖中嘅拼音係 LSHK 粵拼,加咗 CFE 調號。

總結

上面並非咩金科玉律,但係希望都俾到個概念大家,起碼有機會去 exchange,或者有同事想學廣東話嗰陣,都知道需要準備啲咩。呢篇寫得比較急,可能遺漏咗好多重點。如果有咩想我補充,歡迎隨時話我知。