因材施教
one size does not fit all
喺資訊充裕嘅社會大家唔太鍾意撞板，可以的話大家都想行少啲冤枉路，由一開始就用啱嘅方法去完成一件事。呢種對「完美方法」嘅追求唔係一般人先至有——我估制定教育政策嘅人，心入面都同樣渴望尋求呢個方法，而中小學嘅語文教學課程，正正就係大家嘅教育觀念嘅投射。假設每一次修改課程，都係改良，而唔係破壞原有嘅制度，二戰後近七十年嘅教育改革，應該已經將語文教育改到近乎完美至係。不過如果真係咁完美，我應該唔會有機會落筆寫嘢。
究竟爭咗啲乜？
有一幅好出名嘅漫畫，講入面有好多隻動物，有老虎獅子大笨象馬騮狗同魚。本身佢哋個個都有唔同嘅才華，但係嗰度坐咗個人，名牌上面寫住佢係考官，佢叫所有人鬥快爬樹，用爬樹去考核。結果馬騮好開心，但係其他動物就苦過 deedee 。呢幅畫係用嚟比喻教育狀況，帶出用硬磞磞嘅考試去判斷學生能力，只會扼殺咗有其他才能嘅人。個道理好顯淺，用四隻字歸納，就係因材施教。
當然如果你嘅目標係爬樹，你點都冇可能呃條魚，同佢講喺水底到俾心機游就會贏到馬騮。有好多嘢，好似最近好熱門嘅 STEM 呀，又或者係啲高階嘅數理、文學、藝術，點都有少少天資成份，甚至要加上啲童子功同一啲家庭薰陶至得。撇除高深學問，世間上應該仲有好多知識、能力唔應該係有錢人嘅專利，係百分之九十九嘅凡人都學得識嘅。語言理應係其中一種。語言係溝通嘅基本功，係綜合技能嚟嘅，有好多方法去學。練基本功，有好多方式，游水叻嘅、爬樹叻嘅，可以用唔同方法去學習，練嘅嘢唔同，但係殊途同歸，最終都可以學得識至係。
學校嘅方法係將你分做「天才」「庸材」「蠢材」標籤咗再教。任何完美方法都只可以確保每年好彩被劃分成「天才」呢一班人學得識。以前用抄寫法學習，一句一句抄到識寫識串為止，專注力強嘅人有絕對優勢；教大量文法嘅年代，要掌握大量規則，記性好、數理能力強嘅人，就係天才；用溝通法教學嘅，啲社交能力高、唔怕醜嘅就係天才，毒男就係垃圾中嘅垃圾。無論點樣定義天才，都注定有一大班人係輸家。所以學唔識都唔使憾頭埋牆，唔係你錯，係社會嘅錯。
好彩，呢個世代唔使靠學校，每個人都可以決定點樣學習。認清自己嘅優勢，揀最好嘅方法去學，至少喺語言方面，要超越學校嘅進度，真係易過借火。
切記每個人面對嘅問題都唔同，所以人人都啱使嘅完美學習法根本就唔存在。最完美嘅學習方法，就係將學習回歸個人化，按自己嘅需要，決定策略同目標。
你去揾嘅，就會揾到。
初稿喺 Facebook 出過，Medium 版經過大幅修改。
