學極都唔識：日文篇

好多人想學日文，但係好多人連假名都未學識就放棄咗

我寫呢個系列嘅文，出發點係想幫啲悟性冇咁高嘅人學識唔同語言。以下講嘅嘢同大家學語言嘅模式肯定好唔同。成功學識日文嘅人，未必會用下面嘅方法，甚至會好鄙視一啲輔助工具。我好細個開始學日文，好多嘢一睇就記得；但係老咗先至學嘅語言，根本係過目即忘，每樣嘢都要好多工具，好多策略去幫自己鞏固。不求甚解，係為咗行得更遠，放慢腳步或者會見到更靚嘅風景。
有任何錯處，歡迎指出；若果只係見解同大家有出入，就請各位多多包涵。

對香港人而言，英文同普通話都係主流嘢。講得好冇人讚你，講得差會俾人笑，其實似係生存技能多啲。對好多人而言，尤其係毒撚，日文應該係第一隻為興趣而學，又要由零學起嘅語言。首先我要不厭其煩噉講多幾次，語言冇絕對嘅深淺，一切都視乎你本身嘅背景。首先我循語言特性、使用狀況、文化背景呢幾方面分析。

日本啲神社真係好靚 （取自《二月廿九》劇照）

口水乾都要講，好多人，尤其係學識咗嘅人，會同你講「唏，學語言咪不外乎聽講讀寫？」「你俾心機學就會識」「搵個男朋友女朋友咪得囉」呢類「專業意見」，大家其實可以無視嘅。我並唔係質疑大家嘅外表，但係就算俾你跨過文化嘅鴻溝識到個日本仔、日本妹，都唔代表你學得識日文㗎。

Photo by Kaori K on Unsplash

語言特性

語系

日本－琉球語系（Japonic Familiy）

同源嘅只係得十幾隻琉球群島嘅語言，仲有消失咗嘅百濟話。吖，你可能睇過好多書話日本同韓國、滿州、蒙古、突厥同源，叫做「阿爾泰語系」，不過呢個睇法受到好多歷史語言學家嘅質疑。相同語系嘅語言，語彙會相近，有啲語法特性都會接近，所以粵語人學客家話、上海話都唔算好難。學一個新語系嘅語言好多時意味住你會見到啲古怪嘅難題。
詞彙：豐富本土語彙，有大量擬聲擬態副詞
話明係獨立語系，當然會有自己一套詞彙。不過由於同中原有頻繁接觸，所以吸收咗大量漢語詞。

語序

SOV（主語‧賓語‧動詞），修飾語前置
同粵語、英文都唔同，日文嘅動詞係放最後嘅。

發音

極簡單