中港澳「符合國際標準」嘅引渡法律-都係當廢紙算喇

前華人置業主席劉鑾雄(「港女男神」劉嗚煒之父)被澳門法院判行賄罪成後,大劉留喺香港施施然消遙法外,始有呼聲加快設立港澳引渡逃犯機制,引渡大劉返澳門服刑。香港律政司司長袁國強喺2014年曾兩次訪澳,同澳門政府斟引渡協議。到2015年7月,澳門行政法務司司長陳海帆突向傳媒曝嚮口,透露港、澳政府正秘室談判嘅移交逃犯協議將會喺「一國原則」下「唔完全符合國際引渡標準」(國際之間引渡有一啲原則,例如必須要兩地均視為犯罪嘅行為先可以引渡,同埋確保被引渡者唔會受不人道對待)。

新澳門學社(本人擔任副理事長)除咗要求澳門政府公佈協議內容,亦向聯合國禁止酷刑委員會提交報告,說明澳門政府曾涉非法轉移非居民通輯犯到中國,同埋港澳政府正密斟可能「不符國際標準」嘅引渡條款。之後,喺2015年12月初,聯合國禁止酷刑委員會對香港、澳門正式嘅總結指出,關注到港、澳政府將逃犯移交至中國會有受酷刑不人道對待嘅風險,要求港澳政府不可向中國移交逃犯亦要跟隨國際公約標準。

而隨後澳門政府喺2015年12月底宣佈將推出嘅區域刑事協助法案(即會係配合中港澳引渡協議嘅法律),而記者會上政府官員多次強調會跟隨國際標準。澳門政府突轉軚,看似可透過民間社團報告引起聯合國關注後,政府終交出符合國際標準嘅區際引渡法律。令我產生咗兩個星期嘅錯覺,仲守護到一啲自由。

但經日前銅鑼灣書店股東李波疑似由香港被綁架到深圳一役,令我意識到一直針對法律、協議定咩制度,最後都會冇用,因為當共產黨有需要時,跳過一切法律限制,直接跨境捉你返去。喺香港發生跨境綁架式「拘捕」,喺澳門更加可以發生。

香港高鐵「一地兩檢」同埋澳門計劃同中國合併自助過關通道「兩地一檢」所起嘅爭議,對比之下都係「小菜一碟」,香港、澳門法律上任你寫有乜保障,不論咩人身保護令、符合國際標準嘅引渡程序,共產黨流氓手段一出,加埋港、澳政府配合扮睇唔,制度上再做咩都係嘥氣。

白色恐怖其中一個效果就係製造寒蟬效應,所以,實踐言論自由上,港澳兩地媒體更加唔可以縮,如果唔係下次佢放膽綁架更多人返大陸。


Originally published at memehk.com on January 4, 2016.

Like what you read? Give Jason CHAO a round of applause.

From a quick cheer to a standing ovation, clap to show how much you enjoyed this story.