【錯晒重點嘅反同志平權策略】

聽講5月17日係國際不再恐同日,今日香港就有個不再恐同集會。我一諗起不再恐同呢個題目,就諗起三個人,第一個係圖中嘅Trudeau(靚仔大晒呀?),第二同第三個下面會講。

呢十年嚟聽女友形容佢啲積極反同嘅朋友或同事啲教會或機構做嘅嘢,我一直覺得耶教保守派反同係錯晒焦點。佢地似乎只係用反同嚟維繫保守中產教友嘅向心力,而唔係推緊一個counter同運嘅社會運動。

其實香港反同嘅組織,基本上全部都是耶教背景的,即使是外圍組織,也脫不了耶教色彩。問題喺邊?問題係香港得好少基督徒,數盡都係得二三十萬,而且基督徒裡面唔係個個都反同。

如果你真係想以運動嚟counter同運,首先唔該洗走啲耶教味。點洗?首先搵個唔係耶教徒嘅人,搞一個家長組織,平時唔好淨係反同反情色,搞多啲正經家長題材,例如育兒、升小、教育、夫妻相處、夫妻性知識之類,慢慢聚到人,然後先至推你嗰套反同agenda。

反同agenda點推?反同班人最鍾意話《聖經》唔俾同性戀。如果《聖經》唔俾就要成個社會跟你,咁《聖經》都話唔可以拜其他神,咁點解你地唔反對其他人拜神拜佛嘅權利?連耶教徒都好多人唔buy呢套,偏偏啲反同耶膠就最鍾意講呢啲。個社會上其他人咪當你係信教信到變陳玉娥,冇人會理你囉。

要反同,最有效嘅方法係鼓動啲怪獸家長嘅恐懼。你要滲透家長嘅圈子,散佈同運點樣經荷里活電影、迪士尼、流行音樂滲透全世界,點樣會令你個寶貝仔受影響嘅訊息,就好似反疫苗咁。仲有,記住要附加啲似是而非嘅「外國研究」落去,啲家長好易會信。

雖然最有效嘅做法係向怪獸家長販賣恐懼。不過,實情係反同耶教嘅組織都有咁做,但就係做得有陣耶膠味。我懷疑佢地唔係真係要反同,而係要用反同嘅鞏固保守教徒嘅支持。佢地如果真係反同成功,邊度仲會有得年年告急、年年動員?

反疫苗有謝安琪代言,但反同就搵唔到名人,連福音派教會最愛嘅鄭秀文,都公開唔反同。支持同運嘅名人我唔講,呢啲叫訴諸權威或訴諸名人,我只係想提黃子華。黃子華喺紀念圖靈嘅活動嗰條片(圖靈即係《解碼遊戲》個故事嘅真人),而家仲喺YouTube不斷有人翻睇。一個黃子華嘅影響,已經抵得上全香港所有反同耶教組織。

咁邊度搵名人好呢?唔通你搵建制巨型教會恩福堂嗰個蘇穎智牧師咩?邊個蘇穎智?我唔熟耶教世界,但我好記得呢條友上立法會公聽會話同運會令大學生變性奴。佢一句大學生變性奴,喺支持同運嘅作用拍得住黃子華。當年嘅蘇穎智做得恩福堂話事人,佢當然唔係傻嘅,但係好多反同嘅耶教熱心人士,好不幸地好多都係騎騎呢呢。

其實反同陣營要搵名人幫手唔係冇辦法。如果你搵到何君堯、梁振英、張志剛呢班人渣出嚟… 支持同運,我擔保支持同志平權嘅人即刻減一半。

~~~~~~~~~~~

林勉一

2018.5.12

後殖人間世

1997年,香港由舊殖民地變成新殖民地,但所有東西都變得更惡俗、更無賴。

林勉一 Lam Min Yat

Written by

香港人、半個寫作人、半個文字工廠工人。文章見於《明報》、《立場新聞》、《香港獨立媒體》。FB Page: 後殖人間世。

後殖人間世

1997年,香港由舊殖民地變成新殖民地,但所有東西都變得更惡俗、更無賴。

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade